COVID-19
អន្តរជាតិ
លោក គីម ជុងអ៊ុន បញ្ជាឲ្យដកតំណែងមន្ត្រីដែលទទួលបន្ទុកសាងសង់មន្ទីរពេទ្យមួយព្រោះខ្ជីខ្ជា 20, Jul 2020 , 10:39 pm
![មេដឹកនាំកូរ៉េខាងជើង លោក គីម ជុងអ៊ុន ទៅត្រួតពិនិត្យការដ្ឋានមន្ទីរពេទ្យក្រុងព្យុងយ៉ាង ។ រូបភាព៖ AFP](https://image.thmeythmey.com/pictures/2020/07/20/thumb2/aphsh.jpg)
មេដឹកនាំកូរ៉េខាងជើង លោក គីម ជុងអ៊ុន ទៅត្រួតពិនិត្យការដ្ឋានមន្ទីរពេទ្យក្រុងព្យុងយ៉ាង ។ រូបភាព៖ AFP
×![]()
មេដឹកនាំកូរ៉េខាងជើង លោក គីម ជុងអ៊ុន បានរិះគន់មន្ត្រីរបស់ខ្លួនថា ធ្វើការខ្ជីខ្ជាក្នុងការសាងសង់សំណង់មន្ទីរពេទ្យមួយកន្លែងនៅក្នុងទីក្រុងព្យុងយ៉ាង។ មេដឹកនាំកូរ៉េខាងជើង ក៏បានបញ្ជាឲ្យដកតំណែងមន្ត្រីទទួលបន្ទុកលើសំណង់មន្ទីរពេទ្យដែលមិនបំពេញការងារបានល្អ។ នេះបើតាមការចុះផ្សាយរបស់ទីភ្នាក់ងារព័ត៌មាន KCNA នៅថ្ងៃទី២០ ខែកក្កដា។
ប្រសិនបើគ្មានការប្រែប្រួលទេ មន្ទីរពេទ្យក្រុងព្យុងយ៉ាង (Pyongyang General Hospital) នឹងសាងសង់រួចរាល់ត្រឹមថ្ងៃទី១០ ខែតុលា ដែលត្រូវជាថ្ងៃខួបលើកទី៧៥ នៃបក្សពលករកូរ៉េ។ សំណង់មន្ទីរពេទ្យមួយនេះ ត្រូវបានលោក គីម ជុងអ៊ុន មេដឹកនាំកូរ៉េខាងជើង ចាត់ទុកថា គឺជា«កិច្ចការដ៏សំខាន់» សម្រាប់កម្មវិធីសុខភាពសាធារណៈរបស់ប្រទេស។
នៅក្នុងដំណើរត្រួតពិនិត្យការដ្ឋានមន្ទីរពេទ្យនេះ លោក គីម បានចង្អុលបង្ហាញពីបញ្ហាធ្ងន់ធ្ងរ លើការខ្វះខាតហិរញ្ញវត្ថុក្នុងការសាងសង់សំណង់អគារមន្ទីរពេទ្យនេះ។ បើតាមការស្រង់សម្តីពីសំណាក់ទីភ្នាក់ងារព័ត៌មានកូរ៉េខាងជើងKCNA លោកគីម បានអះអាងថា គណៈកម្មការទទួលបន្ទុករៀបចំហិរញ្ញវត្ថុ គឺធ្វើការខ្ជីខ្ជា ព្រោះគ្មានកញ្ចប់ថវិកាសម្រាប់សាងសង់សំណង់មន្ទីរពេទ្យឲ្យបានត្រឹមត្រូវ។
ក្នុងន័យនេះ លោក គីម ចង់សំដៅថា អាគារមួយនេះ គឺធ្វើឡើងសម្រាប់ប្រជាជនកូរ៉េខាងជើង ផ្ទុយទៅវិញ វាបែរជាធ្លាក់ជាបន្ទុករបស់ប្រជាជនទៅវិញតាមរយៈការស្នើសុំជំនួយ។ យ៉ាងណាក៏ដោយ ព័ត៌មានលំអិតពាក់ព័ន្ធនឹងអាគារនេះ មិនត្រូវបានគេបញ្ចេញឡើយ។
ដោយសារមន្ត្រីធ្វើការខ្ជីខ្ជា លោកគីម បានបញ្ជាឲ្យគណៈមជ្ឈិបក្សពលករស៊ើបអង្កេតលើបញ្ហានេះ និងដាក់មន្ត្រីផ្សេងដែលមានការទទួលខុសត្រូវ ជំនួសវិញ។
ការសាងសង់អាគារមន្ទីរពេទ្យនេះ ធ្វើឡើងក្នុងបរិបទ COVID-19 ដែលកូរ៉េខាងជើងរឹតបន្តឹងតាមព្រំដែន និងស្របពេលប្រទេសមួយនេះ កំពុងស្ថិតក្រោមទណ្ឌកម្មអន្តរជាតិ។ បញ្ហានេះ ធ្វើឲ្យកូរ៉េខាងជើងពិបាកនាំចូលគ្រឿងបរិក្ខាពេទ្យ និងសម្ភារសាងសង់មួយចំនួន។
សូមបញ្ជាក់ថា គិតមកត្រឹមពេលនេះ កូរ៉េខាងជើង មិនបានរាយការណ៍ពីករណីឆ្លងCOVID-19 នៅក្នុងប្រទេសនៅឡើយទេ ខណៈពិភពលោកមានCOVID-19 សរុបចំនួនជាង ១៤,៦លានករណី៕
© រក្សាសិទ្ធិដោយ thmeythmey.com