COVID-19
ជាតិ
រកឃើញករណីឆ្លង COVID-19 ចំនួន២៦នាក់ទៀតនៅកម្ពុជា 21, Jul 2020 , 8:54 am
× ក្រសួងសុខាភិបាលនាព្រឹកថ្ងៃអង្គារនេះ បានប្រកាសពីករណីឆ្លង COVID-19 ចំនួន២៦ករណីទៀតនៅកម្ពុជា ដែលសុទ្ធតែជាជនជាតិខ្មែរ។ ក្នុងចំណោមអ្នកទាំងនោះ មាន៥នាក់មកពីអេហ្ស៊ីប និង២០នាក់មកពីរុស្ស៊ី ហើយបន្តជើងហោះហើរតាមម៉ាឡេស៊ី (MH754) និងមកដល់កម្ពុជាកាលពីព្រឹកថ្ងៃទី១៩ ខែកក្កដា។ រីឯ១នាក់ទៀតមកពីកូរ៉េខាងត្បូង ហើយមកដល់កម្ពុជានៅយប់ថ្ងៃទី១៩ ខែកក្កដា។
បើតាមក្រសួងសុខាភិបាល អ្នកឆ្លងជំងឺកូវីដ-១៩ចំនួន២៦នាក់នោះ មានអ្នករស់នៅភ្នំពេញ១៤នាក់, ឧត្តរមានជ័យ១នាក់, បន្ទាយមានជ័យ៣នាក់, សៀមរាប ២នាក់, ស្វាយរៀង ២នាក់, ព្រះសីហនុ ១នាក់, បាត់ដំបង់ ១នាក់, ត្បូងឃ្មុំ ១នាក់ និងខេត្តកំពង់ចាម ១នាក់។ ចំនួននៃអ្នកជំងឺនេះ បានធ្វើឱ្យកម្ពុជា កើនអ្នកជំងឺកូវីដ-១៩សរុប ១៩៧នាក់ ដោយក្នុងនោះមានអ្នកជាសះស្បីយ ១៤០នាក់។
ដោយឡែក អ្នកដំណើរដែលបានធ្វើដំណើរមកកម្ពុជាជាមួយអ្នកជំងឺកូវីដ-១៩ ពីប្រទេសអេហ្ស៊ីប និងរុស្សីមានចំនួន១១៩នាក់នោះ ត្រូវបានក្រសួងសុខាភិបាលដាក់ឱ្យធ្វើចត្តាឡីស័ក១៤ថ្ងៃ នៅមណ្ឌលចត្តាឡីស័កវិទ្យាល័យសម្តេច ហ៊ុន សែន បុរី១០០ខ្នង។ រីឯ អ្នកដំណើរចំនួន១០៩នាក់ដែលមកពីប្រទេសកូរ៉េជាមួយបុរសខ្មែរម្នាក់រកឃើញជំងឺកូវីដ-១៩នោះ មាន២០នាក់ធ្វើចត្តាឡីស័កនៅមណ្ឌលចត្តាឡីស័កទ័ពអាកាស និង៨៩នាក់ទៀត ធ្វើចត្តាឡីស័កនៅសណ្ឋាគារមួយកន្លែងក្នុងរាជធានីភ្នំពេញ។ ក្រសួងសុខាភិបាលបានបញ្ជាក់ថា អ្នកដំណើរដែលមកពីកូរ៉េ ជាមួយបុរសខ្មែរតេស្តរកឃើញកូវីដ-១៩ គឺមាន១៣ជាតិសាសន៍៕ © រក្សាសិទ្ធិដោយ thmeythmey.com