សង្គមអន្តរជាតិ
អន្តរជាតិ
លោក ណាជីប ថា លុយបានពីមូលនិធិរដ្ឋ1MDB ចាយលើកម្មវិធីសុខុមាលភាពនិងក្មេងកំព្រា
05, Aug 2020 , 10:59 pm
អតីតនាយករដ្ឋមន្ត្រីម៉ាឡេស៊ី លោក ណាជីប រ៉ាហ្ស៉ាក់ (AFP)
×![]()
អតីតនាយករដ្ឋមន្ត្រីម៉ាឡេស៊ី លោក ណាជីប រ៉ាហ្ស៉ាក់ បានបន្តអះអាងពីភាពស្អាតស្អំរបស់លោក ក្រោយត្រូវបានតុលាការចេញសាលក្រមរកឃើញថា មានកំហុសក្នុងសំណុំរឿងពុករលួយពាក់ព័ន្ធមូលនិធិអភិវឌ្ឍ 1MDB ។ លោកបកស្រាយថា ភាគច្រើននៃលុយដែលលោកត្រូវបានចោទប្រកាន់ថាកិបកេងនោះ គឺចាយលើសកម្មភាពសុខុមាលភាពប្រជាជន និងផ្គត់ផ្គង់ក្មេងកំព្រា។ 
ក្នុងវីដេអូបង្ហោះលើហ្វេសប៊ុកផ្ទាល់ខ្លួនលោក នៅថ្ងៃទី ៣ ខែសីហា លោក ណាជីប រ៉ាហ្សាក់ និយាយថា ៩៩ភាគរយនៃលុយដែលលោកត្រូវបានចោទថា កឹបកេងពីមូលនិធិរដ្ឋ 1MDB គឺត្រូវបានចំណាយលើសកម្មភាពនៃការទទួលខុសត្រូវទៅលើសង្គម (Corporate Social Responsibility) ។
«វាពុំមែនសម្រាប់ការចំណាយផ្ទាល់ខ្លួន ឬសម្រាប់ក្តីសុខផ្ទាល់ខ្លួនខ្ញុំឡើយ។ ដូចខ្ញុំធ្លាប់និយាយពីពេលមុន តុលាការ ផ្ទៀតផ្ទាត់ថា លុយពុំត្រូវបានប្រើសម្រាប់គោលដៅផ្ទាល់ខ្លួនឡើយ»។ លោក ណាជីប សរសេរបែបនេះ ដោយបន្ថែមថា ការធ្វើវិភាគទានលុយ ៩៤ ៨៥៦ ដុល្លាររបស់លោកទៅឲ្យមណ្ឌលកុមារកំព្រាក្រោមឈ្មោះលោកក្នុងក្រុង Pekan គឺដើម្បីមើលថែទាំក្មេងកំព្រា និងចំណាយលើការសិក្សារបស់ពួកគេ។
តាមការចុះផ្សាយរបស់ទូរទស្សន៍សិង្ហបុរី Channel News Asia លោក ណាជីប សង្កត់ធ្ងន់ថា លោកបែរជាត្រូវដាក់ទោស ដោយសាររឿងមនុស្សធម៌បែបនេះទៅវិញ។ អតីតនាយករដ្ឋមន្ត្រីរូបនេះ បន្តថា លោកក៏រងពិន័យព្រោះលោកបានបរិច្ចាគលុយទៅបក្សអង្គការជាតិម៉ាឡេរួបរួមក្នុងរដ្ឋ Johor, Penang និង Kedah សម្រាប់កម្មវិធីសុខុមាលភាពពួកគេផងដែរ។
ក្នុងវីដេអូដដែល លោក ណាជីប បញ្ជាក់ទៀតថា មានឧទាហរណ៍ច្រើនដែលលោកបានចាយលុយទាំងនោះសម្រាប់បក្ស និងប្រជាជនដោយពុំមែនសម្រាប់ខ្លួនលោកឡើយ។ លោកថា លោក ទទួលការគាំទ្រយ៉ាងច្រើនសន្ធឹកសន្ធាប់ក្នុងចំណោមថ្នាក់មូលដ្ឋានពីទង្វើសប្បុរសទាំងនេះ។ ទាក់ទិននឹងសាលក្រមតុលាការ លោកប្តេជ្ញាប្រយុទ្ធប្រឆាំងនឹងភាពអយុត្តិធម៌។
កាលពីថ្ងៃទី ២៨ ខែកក្កដា លោក ណាជីប រ៉ាហ្ស៉ាក់ ត្រូវបានកាត់ទោសឲ្យជាប់គុក១២ឆ្នាំ ហើយពិន័យជាប្រាក់ ជិត៥០លានដុល្លារ ក្រោយតុលាការរកឃើញថាលោកមានទោសក្នុងសំណុំរឿងពុករលួយលុយរាប់រយលានដុល្លារពាក់ព័ន្ធនឹងមូលនិធិអភិវឌ្ឍ 1MDB ។ បទចោទគឺរួមមាន ការរំលោភអំណាច ការលាងលុយកខ្វក់ និងបរាជ័យក្នុងការអនុវត្តកាតព្វកិច្ចក្នុងអាណត្តិជានាយករដ្ឋមន្ត្រី។
បទល្មើសប្រឆាំងលោក ណាជីប គឺផ្ដោតលើការផ្ទេរលុយប្រមាណ ៩,៨លានដុល្លារ ពីក្រុមហ៊ុន SRC International ដែលជាអតីតស្ថាប័នមួយរបស់មូលនិធិរដ្ឋ 1MDB ចូលទៅគណនីធនាគារផ្ទាល់ខ្លួនលោកក្នុងឆ្នាំ២០១៤ និងឆ្នាំ២០១៥។ លោកណាជីប កាន់អំណាចពីឆ្នាំ២០០៩ ដល់ ឆ្នាំ២០១៨។
ក្រោយមានការបន្ធូរបន្ថយ លោក ណាជីប ទទួលបានការផ្អាកទោសបណ្ដោះអាសន្ន ដោយរង់ចាំការប្ដឹងឧទ្ធរណ៍។ តាមទូរទស្សន៍សិង្ហបុរីដដែល លោកបានដាក់ពាក្យបណ្ដឹងតវ៉ាទៅកាន់តុលាការជាន់ខ្ពស់ ខណៈលោក Shafee Abdullah ដែលជាទីប្រឹក្សាលោក ណាជីប សង្ឃឹមថា ដំណើរការប្ដឹងតវ៉ា នឹងរៀបចំឡើងក្នុងចន្លោះពេល៣ខែខាងមុខ ហើយបើបរាជ័យ លោកនឹងលើកករណីនេះទៅកាន់តុលាការសហព័ន្ធដែលជាជម្រើសចុងក្រោយ៕
Tag:
ម៉ាឡេស៊ី
ណាជីប រ៉ាហ្ស៉ាក់
1MDB
© រក្សាសិទ្ធិដោយ thmeythmey.com
