អន្តរជាតិ
អតីតមេដឹកនាំប្រទេស៥៦ ស្នើឲ្យប្រទេសខ្លួនចូលក្នុងសន្ធិសញ្ញាហាមឃាត់អាវុធនុយក្លេអ៊ែរ
22, Sep 2020 , 7:29 pm
រូបភាព៖ AFP
×![]()
ដោយ: ធៀន ភារិន្ទ
អតីតប្រមុខដឹកនាំប្រទេសជាច្រើនរូប ពិសេសបណ្ដារដ្ឋសមាជិកសម្ព័ន្ធយោធាណាតូ នៅថ្ងៃទី២០ ខែកញ្ញា បានអំពាវនាវឲ្យប្រទេសរបស់ខ្លួន ចូលរួមក្នុងសន្ធិសញ្ញាហាមឃាត់អាវុធនុយក្លេអ៊ែរ។ ការអំពាវនាវនេះ ធ្វើឡើងនាយុទ្ធនាការលុបបំបាត់អាវុធនុយក្លេអ៊ែរអន្តរជាតិ (ICAN) ដើម្បីកៀរគរប្រទសទាំងអស់ផ្ដល់សច្ចាប័នលើសន្ធិសញ្ញាហាមឃាត់នុយក្លេអ៊ែរឆ្នាំ២០១៧។ 
បើតាមការប្រកាសរបស់ ICAN នៅថ្ងៃទី២០ ខែកញ្ញា អតីតប្រមុខរដ្ឋ ប្រមុខរដ្ឋាភិបាល រដ្ឋមន្ត្រីការពារជាតិ និងរដ្ឋមន្ត្រីការបរទេស ចំនួន ៥៦រូប ដែលចូលរួមក្នុងយុទ្ធនាការនេះ មានអតីតមេដឹកនាំមកពីប្រទេសសមាជិកសម្ព័ន្ធយោធាណាតូចំនួន២០ប្រទេស, អតីតនាយករដ្ឋមន្ត្រីជប៉ុន លោក Hatoyama Yukio និងអតីតអគ្គលេខាធិការអង្គការសហប្រជាជាតិសញ្ជាតិកូរ៉េខាងត្បូង លោក បាន គីមូន ផង។
តាមការចុះផ្សាយរបស់ទូរទស្សន៍ជប៉ុន NHK លិខិតអំពាវនាវដែលមានឈ្មោះមេដឹកនាំខាងលើ បានបញ្ជាក់ថា ហានិភ័យនៃការប្រើប្រាស់អាវុធនុយក្លេអ៊ែរ កំពុងតែកើនឡើងនៅលើពិភពលោក។ ទន្ទឹមនេះ អតីតថ្នាក់ដឹកនាំខាងលើ បានព្រមានគ្រោះពីការបង្កើតអាវុធនុយក្លេអ៊ែរប្រភេទថ្មីជាច្រើន ដែលអាចបង្កឲ្យមានគ្រោះថ្នាក់ធំធេង និងគ្រោះថ្នាក់ ដែលកើតចេញពីការវាយប្រហារអ៊ីនធឺណិតលើហេដ្ឋារចនាសម្ព័ន្ធនុយក្លេអ៊ែរទាំងនោះ។
ទាក់ទិននឹងគ្រោះថ្នាក់ទាំងនេះ អតីតថ្នាក់ដឹកនាំទាំង ៥៦រូប បានអំពាវនាវឲ្យមេដឹកនាំប្រទេសរបស់ខ្លួនក្នុងពេលបច្ចុប្បន្ន ការបន្ថយអាវុធប្រភេទនេះ តាមរយៈការចូលរួមសន្ធិសញ្ញាហាមឃាត់អាវុធនុយក្លេអ៊ែរឆ្នាំ២០១៧ មុននឹងអ្វីៗហួសពេល។ លិខិតខាងលើ នឹងត្រូវផ្ញើទៅមេដឹកនាំប្រទេស២០ ជាសមាជិកណាតូ បូករួមទាំងកាណាដា អាល្លឺម៉ង់ កូរ៉េខាងត្បូង ន័រវែស និងជប៉ុនផង។ ប្រទេសទាំងនេះ សុទ្ធតែស្ថិតក្រោមឆ័ត្រនុយក្លេអ៊ែររបស់អាមេរិក និងមិនទាន់ចូលរួមក្នុងសន្ធិសញ្ញាហាមឃាត់អាវុធនុយក្លេអ៊ែរឆ្នាំ២០១៧ ឡើយ។
សូមបញ្ជាក់ សន្ធិសញ្ញាហាមឃាត់អាវុធនុយក្លេអ៊ែរ ត្រូវបានអង្គការសហប្រជាជាតិ អនុម័តនៅក្នុងឆ្នាំ ២០១៧។ គោលបំណងនៃសន្ធិសញ្ញាអន្តរជាតិ គឺលុបបំបាត់សកម្មភាពទាំងឡាយណាពាក់ព័ន្ធ អាវុធនុយក្លេអ៊ែរ ដូចជាការធ្វើតេស្ត ការសាកល្បង ការអភិវឌ្ឍ និងការប្រើប្រាស់អាវុធនុយក្លេអ៊ែរជាដើម។
ដើម្បីឲ្យសន្ធិសញ្ញាហាមឃាត់អាវុធនុយក្លេអ៊ែរចូលជាធរមានបាន ទាល់មានប្រទេសចំនួន៥០ ផ្តល់សច្ចាប័ន។ បន្ទាប់ពីមានប្រទេសចំនួន៥០ យល់ព្រមហើយ ក្នុងរយៈពេល ៩០ថ្ងៃក្រោយ សន្ធិសញ្ញាអង្គការសហប្រជាជាតិមួយនេះ នឹងចូលជាធរមាន។ ប៉ុន្តែមកទល់ពេលនេះ មានតែប្រទេសចំនួន ៤៤ប៉ុណ្ណោះ ដែលបានផ្តល់សច្ចាប័ន៕
Tag:
UN
© រក្សាសិទ្ធិដោយ thmeythmey.com
