អន្តរជាតិ
សកម្មជនវ័យក្មេង Joshua Wong ត្រូវប៉ូលិសហុងកុងចាប់ខ្លួនពាក់ព័ន្ធបាតុកម្មឆ្នាំ២០១៩ 24, Sep 2020 , 6:29 pm
![លោក Joshua Wong សកម្មជនប្រឆាំងរដ្ឋាភិបាលហុងកុង។ រូបភាព៖ Reuters](https://image.thmeythmey.com/pictures/2020/09/24/thumb2/joshao.jpg)
លោក Joshua Wong សកម្មជនប្រឆាំងរដ្ឋាភិបាលហុងកុង។ រូបភាព៖ Reuters
×![]()
សកម្មជនប្រឆាំងរដ្ឋាភិបាលហុងកុង លោក Joshua Wong នៅថ្ងៃទី២៤ ខែកញ្ញា ត្រូវប៉ូលិសចាប់ខ្លួន ពីបទធ្វើបាតុកម្មខុសច្បាប់នៅក្នុងឆ្នាំ២០១៩។ ក្រៅពីសកម្មជនរូបនេះ ប៉ូលិសហុងកុងក៏បានចាប់ខ្លួនសកម្មជនជើងចាស់ម្នាក់ទៀតផងដែរ។
តាមរយៈបណ្តាញសង្គមTwitter របស់ខ្លួន លោក Joshua Wong សកម្មជនប្រឆាំងរដ្ឋាភិបាលហុងកុង បានបញ្ជាក់យ៉ាងដូច្នេះថា៖ «Joshua ត្រូវបានចាប់ខ្លួន ទៅស្ថានីយប៉ូលិសប្រមាណម៉ោង ១រសៀល»។ សកម្មជនរូបនេះ ត្រូវចោទពីបទចូលរួមក្នុងការជួបប្រជុំខុសច្បាប់ និងបំពានច្បាប់ហាមពាក់ម៉ាស់ នៅថ្ងៃទី៥ ខែតុលា ឆ្នាំ២០១៩។
ចំណែកសកម្មជនសង្គមជើងចាស់វ័យ ៧៤ឆ្នាំ ក៏ត្រូវបានប៉ូលិសហុងកុងចាប់ខ្លួនផងដែរ ពីបទទាក់ទិននឹងការចូលរួមក្នុងការជួបប្រជុំខុសច្បាប់ក្នុងខែតុលា ឆ្នាំ២០១៩។
ច្បាប់ហាមពាក់ម៉ានស់នេះ ត្រូវបានហុងកុងអនុម័តនៅក្នុងខែតុលា ឆ្នាំ២០១៩ ដើម្បីហាមឃាត់ក្រុមបាតុករ មិនឲ្យពាក់ម៉ាស់ក្នុងអំឡុងពេលធ្វើបាតុកម្ម។ ប៉ុន្តែនៅចុងខែវិច្ឆិកា ឆ្នាំ២០១៩ តុលាការជាន់ខ្ពស់ហុងកុង បានប្រកាសថាច្បាប់ហាមឃាត់ការពាក់ម៉ាស់ គឺមិនស្របតាមច្បាប់មូលដ្ឋានរបស់ហុងកុង។ ការប្រកាសនេះ បានធ្វើឲ្យប៉ូលិសហុងកុងផ្អាកការអនុវត្តច្បាប់ជាច្រើនខែ។
រហូតដល់ខែមេសា ឆ្នាំ២០២០ តុលាការឧទ្ធរណ៍ហុងកុង បានសម្រេចថា រដ្ឋាភិបាលហុងកុងអាចហាមឃាត់ការពាក់ម៉ាស់បានក្នុងការជួបជុំដែលខុសច្បាប់ ប៉ុន្តែច្បាប់ហាមការពាក់ម៉ាស់នេះ មិនអាចយកមកប្រើប្រាស់បានឡើយ ក្នុងការជួបជុំស្របច្បាប់។ នេះបើតាមការចុះផ្សាយរបស់កាសែតហុងកុង South China Morning Post។
សូមបញ្ជាក់ថា បន្ទាប់ពីច្បាប់សន្តិសុខជាតិហុងកុង ចូលជាធរមាន អាជ្ញាធរហុងកុង បានចាប់ខ្លួនមនុស្សជាច្រើននាក់ ទាក់ទិននឹងការធ្វើបាតុកម្មនៅក្នុងឆ្នាំ២០១៩។ ប៉ុន្តែក្រោយមក អ្នកទាំងនោះត្រូវបានដោះលែងឲ្យនៅក្រៅឃុំវិញ៕
© រក្សាសិទ្ធិដោយ thmeythmey.com