បទយកការណ៍ / បទសម្ភាសន៍
ជាតិ
លោក ឈួន ណារ៉ុម ណែនាំពីវិធីលាយថ្នាំពុលសម្លាប់សត្វល្អិតផ្សំពីរុក្ខជាតិ 24, Nov 2013 , 8:24 am
![](https://image.thmeythmey.com/pictures/2013/11/24/thumb2/2411201382821thmeythmey.jpg)
×![]()
កំពង់ចាម៖កាលពីមុនកសិករបានប្រើប្រាស់ថ្នាំពុលគីមីដើម្បីសម្លាប់សត្វល្អិត នៅលើដំណាំអស់ រាប់ម៉ឺនរៀលក្នុងមួយឆ្នាំ។ ប៉ុន្តែក្រោយមកពួកគាត់បានផលិតថ្នាំពុលផ្សំពីរុក្ខជាតិប្រើជំនួសថ្នាំ ពុលគីមីវិញ ចាប់តាំងពីឆ្នាំ២០០៣មកម្ល៉េះ។ ម្យ៉ាងទៀតថ្នាំពុលផ្សំពីរុក្ខជាតិ មិនចាំបាច់ចំណាយថវិកា និងមិនប៉ះពាល់ដល់សុខភាពទៀតផង។
លោក ឈួន ណារ៉ុម អតីតគ្រូជំនាញស្តីពីការដាំដុះបន្លែឲ្យល្អតាមវិធីសាស្ត្រ IPM និងអាហាររូបត្ថម្ភ សម្រាប់គ្រួសារកម្ពុជា ដែលអនុវត្តដោយកម្មវិធីអេស្កាប់ (ESCUP) ស្ថិតក្រោមការឧបត្ថម្ភពីទីភ្នាក់ងារ អភិវឌ្ឍន៍អន្តរជាតិរបស់សហរដ្ឋអាមេរិក (USAID) បានផ្តល់បទពិសោធពីវិធីសាស្ត្រផលិតថ្នាំពុលសម្លាប់ សត្វល្អិតផ្សំពីរុក្ខជាតិដូចខាងក្រោម៖
១. ធាតុផ្សំៈ
- ថ្នាំជក់ចំនួន ០,៥ខាំ
- សំបកល្ពៅចំនួន ១គ.ក្រ
- បណ្តូលពេជ្រចំនួន ១គ.ក្រ
- សំបកស្លែង ១គ.ក្រ
- ផ្លែស្លាក់ចំនួន ២ខាំ
- ទឹកនោមមនុស្ស ចាក់រាល់ថ្ងៃ ប្រហែល ២លីត្រ
- អាចម៌មាន់ចំនួន ០,៥ គ.ក្រ
- ទឹកចំនួន ៥លីត្រ។
២. សម្ភារៈ
សម្ភារដែលត្រូវប្រើមានៈ ពាងចំណុះ ២០លីត្រ, គម្របពាងមួយ, ឈើសម្រាប់កូរមួយ។
៣. របៀបអនុវត្តៈ
មុនដំបូងចាក់ទឹកចូលក្នុងពាង បន្ទាប់មក ចិញ្ច្រាំធាតុផ្សំឲ្យខ្ទេចរួចចាក់ចូលក្នុងពាង ហើយចាក់អាចម៌ មាន់ និងទឹកនោមផងដែរ។ ពាងថ្នាំត្រូវដាក់ក្រោមម្លប់ ហើយគ្របឲ្យជិត រួចហើយកូរមួយថ្ងៃម្តងដើម្បី ឲ្យអង្គធាតុទាំងនោះឆាប់រលួយ និងមានខ្យល់ចេញចូលបានល្អ។ ក្រោយពីត្រាំទុកអស់រយៈពេល ១៥ថ្ងៃមក គេសង្កេតឃើញទឹកឡើងខៀវ ឬលឿងថ្លា មានក្លិនស្អុយ ដែលបញ្ជាក់ថាទឹកថ្នាំនេះកាច់ បានល្អ អាចយកប្រើប្រាស់បានហើយ។
៤. របៀបប្រើៈ
ទឹកថ្នាំនេះអាចប្រើប្រាស់បានលើដំណាំបន្លែ ដើម្បីទប់ស្កាត់ការបំផ្លាញពីសត្វល្អិតដូចជាៈ ពួកដង្កូវ ចៃ ទាកគូ ជាដើម នៅពេលដំណាំចាប់ឬសបានចំនួន៤ថ្ងៃ។ ការស្រោចធ្វើនៅពេលរសៀលម៉ោង២ ទៅ ម៉ោង៣ ក្នុងបរិមាណទឹកថ្នាំកន្លះកំប៉ុងទឹកដោះគោលាយជាមួយនឹងទឹក១០លីត្រ។ ចំពោះដំណាំធំ ក្រោយដាំចំនួន២៥ថ្ងៃ ស្រោចទឹកថ្នាំ១កំប៉ុង លាយនឹងទឹកចំនួន១០លីត្រ។ ត្រូវបញ្ឈប់ការស្រោចទឹក ថ្នាំនេះមុនពេលប្រមូលផលមួយសប្តាហ៍។
សូមបញ្ជាក់ផងដែរថា វិធីសាស្ត្រខាងលើនេះគឺបានឆ្លងកាត់ការអនុវត្តជាក់ស្តែង និងការពិសោធន៍ត្រឹមត្រូវ ហើយអាចយកទៅប្រើប្រាស់លើដំណាំគ្រប់ប្រភេទ និងបានចងក្រងទុកជាឯកសារសម្រាប់ឲ្យកសិករយកទៅអនុវត្តផងដែរ៕ © រក្សាសិទ្ធិដោយ thmeythmey.com