បទយកការណ៍ / បទសម្ភាសន៍
ជាតិ
បទយកការណ៍៖ យុវវ័យកំណត់តម្លៃជីវិតខុសគ្នា! 25, Nov 2013 , 9:08 am
![](https://image.thmeythmey.com/pictures/2013/11/25/thumb2/life-values.jpg)
×![]()
ភ្នំពេញ៖ មនុស្សជាច្រើននៅក្នុងសង្គមខ្មែរបច្ចុប្បន្ននេះ បានកំណត់តម្លៃជីវិតរបស់ខ្លួនខុសៗគ្នា។ អ្នកខ្លះឲ្យតម្លៃទៅលើទ្រព្យសម្បត្តិ មាសប្រាក់ជាកត្តាចំបង អ្នកខ្លះឲ្យតម្លៃលើការងារ អ្នកខ្លះទៀតចង់បានសេរីភាព និងភាពយុត្តិធម៌ជាជាងមាសប្រាក់។ ដោយឡែក អ្នកមួយចំនួនផ្សេងទៀត ឲ្យតម្លៃជីវិតទៅលើកាយវិការចេះតបស្នងសងគុណឪពុកម្តាយ។
ទើបនឹងបញ្ចប់ការសិក្សាថ្នាក់បរិញ្ញាបត្រផ្នែកស្ថាបត្យកម្មបានជាងមួយឆ្នាំ កញ្ញា មុន្នីរ័ត្ន ទទួលបានការងារភ្លាមជាបុគ្គលិកក្រុមហ៊ុនឯកជនមួយនៅទីក្រុងភ្នំពេញជាមួយនឹងប្រាក់ខែសមរម្យ។ នាងខិតខំប្រឹងប្រែងក៏សាងប្រសិទ្ធភាពការងារ គ្មានពេលសម្រាក ព្រោះនាងបានឲ្យតម្លៃជីវិតរបស់ខ្លួននៅថ្ងៃអនាគតលើការមានការងារពិតប្រាកដ។ សម្រាកពីការងារបន្តិច កញ្ញ មុន្នីរ័ត្ន បានលើកឡើងថា៖«មានការងាពិតប្រាកដទើបអ្នកដ៏ទៃឲ្យតម្លៃ»។
មាឌរៀងស្គមបន្តិច លោក វិបុត្រ ជានិស្សិតឆ្នាំទី៤ ខំរៀនទាំងយប់ទាំងថ្ងៃមិនសូវមានពេលសម្រាកទេពីព្រោះលោកមានក្តីសង្ឃឹមនឹងមានភាពសប្បាយរីករាយនៅក្នុងគ្រួសារក្រោយពេលទទួលបានការងារដ៏ល្អមួយ។ យុវជនរូបនេះបានលើកឡើងយ៉ាងដូច្នេះថា៖«ការជួបជុំគ្នាក្នុងក្រុមគ្រួសារជាកត្តាសំខាន់
ណាស់។ ប្រសិនបើម្នាក់ៗមានលុយ ហើយរស់នៅដាច់ពីគ្នានោះទេ ជីវិតគ្មានតម្លៃឡើយ»។
ស្រដៀងនឹងលោក វិបុត្រ ដែរ កញ្ញា មករា ជាបុគ្គលិកមន្ត្រីរាជការម្នាក់ទៀត ប្រាថ្នាចង់បានភាព សប្បាយរីករាយជាមួយក្រុមគ្រួសារផងដែរ ជាជាងមានមាសប្រាក់ច្រើនតែមិនមានក្តីសុខ។ កញ្ញាបញ្ចេញយោបល់ដោយមិនខ្មាស់អៀនថា៖«ខ្ញុំឲ្យតម្លៃលើការសប្បាយក្នុងជីវិត ទើបជីវិតមានន័យ បើមានលុយច្រើន ហើយមិនសប្បាយចិត្តក៏គ្មានន័យដែរ»។ សម្រាប់កញ្ញា មករា សេចក្តីស្ងប់ក្នុងផ្លូវអារម្មណ៍ ភាពគ្មានកង្វល់ច្រើនគឺមានតម្លៃខ្លាំងជាងទ្រព្យសម្បត្តិទៅទៀត។
ដោយមើលឃើញភាពអយុត្តិធម៌ និងអំពើរពុករលួយមួយចំនួនក្នុងសង្គមបច្ចុប្បន្ន លោក សម្បត្តិ មានអាយុ៤៥ឆ្នាំ ជានាយកប្រតិបត្តិក្រុមហ៊ុនឯកជនមួយ មានប្រសាសន៍ថា៖«ខ្ញុំឲ្យតម្លៃជីវិតលើសេរីភាព និងភាពត្រឹមត្រូវយុត្តិធម៌ក្នុងសង្គម»។
ចំណែកលោក សេង សម្បត្តិ វ័យ៣០ឆ្នាំ ជាទន្តពេទ្យឯណោះវិញ លោកមានទស្សនៈប្លែកពីអ្នកដទៃបន្តិច ដោយលោកយល់ឃើញថា បន្ទុករបស់ឪពុកម្តាយក្នុងការចំណាយពេលវេលាកម្លាំងកាយចិត្ត និងថវិការយ៉ាងច្រើនដើម្បីចិញ្ចឹមបីបាច់ និងការផ្គត់ផ្គង់សម្រាប់ការសិក្សាទៀតផងនោះ ដូច្នេះ ការតបស្នងសងគុណជាគឺជារឿងចាំបាច់។
លោក សម្បត្តិ បានលើកឡើងថា៖ «ការតបស្នងសងគុណដល់ឪពុកម្តាយវិញនៅថ្ងៃក្រោយ គឺជាតម្លៃនៃជីវិតរបស់ខ្ញុំ ហើយខ្ញុំនឹងខំធ្វើឲ្យអស់ពីលទ្ធភាព»។
បើទោះជាយ៉ាងណាក៏ដោយ ក៏មនុស្សមួយចំនួននៅតែឲ្យតម្លៃលើទ្រព្យសម្បត្តិ មាសប្រាក់ បុណ្យស័ក្តជាកត្តាសំខាន់ដដែល។ ជាក់ស្តែង កញ្ញា ស្រីល័ក្ខ ជានិស្សិតឆ្នាំទី២ បានឲ្យដឹងថា មានប្រាក់ច្រើន អាចធ្វើអ្វីៗបានគ្រប់យ៉ាង ដូចជា អាចបង្កើតគ្រួសារដ៏មានសុភមង្គលជាដើម។ កញ្ញបានអះអាងយ៉ាងដូច្នេះថា៖«មានទ្រព្យសម្បត្តិ មានលុយ គ្មានអ្វីត្រូវខ្វាយខ្វល់ទៀតនោះទេ»៕
© រក្សាសិទ្ធិដោយ thmeythmey.com