តុលាការខ្មែរក្រហម ត្រូវការថវិកាជាង៥០លានដុល្លារដើម្បីដំណើរការ២ឆ្នាំខាងមុខ

ខ្មែរក្រហម

ជាតិ

តុលាការខ្មែរក្រហម ត្រូវការថវិកាជាង៥០លានដុល្លារដើម្បីដំណើរការ២ឆ្នាំខាងមុខ

25, Nov 2013 , 9:16 am

រូបភាព

បន្ទប់សវនាការនៃសាលាក្តីខ្មែរក្រហម (រូបថត៖ សាលាក្តីខ្មែរក្រហម)

ដោយ: វិច្ឆិកា

សាលាក្តីខ្មែរក្រហមដែលតែងតែជួបវិបត្តិថវិកាញឹកញាប់នោះ បានធ្វើគម្រោងចំណាយថវិកាសម្រាប់ឆ្នាំ២០១៤-២០១៥ ហើយបានបង្ហាញគម្រោងនេះទៅថ្នាក់ដឹកនាំអង្គការសហប្រជាជាតិហើយ។ ប្រភពសិ្នទ្ធនឹងតុលាការកូនកាត់មួយនេះបានបង្ហើបអោយដឹងថា សាលាក្តីនេះត្រូវការថវិកាជាង៥៦លានដុល្លារ ដើម្បីដំណើរការសវនាការក្នុងរយៈពេល២ឆ្នាំខាងមុខនេះ។

ចុចទីនេះដើម្បីទទួលបានព័ត៌មានរហ័ស

គម្រោងចំណាយថវិកានេះ ត្រូវបានធ្វើឡើងដោយរាប់បញ្ចូលទាំងផែនការកំណែទម្រង់រដ្ឋបាល និងចំណាយរបស់សាលាក្តីរួចហើយ។ នេះបើតាមការបញ្ជាក់របស់ប្រភពដដែលនោះ ដែលមិនហ៊ាននិយាយលំអិតជាងនេះ។

គួរបញ្ជាក់ថា ដោយសារតែការបិទបញ្ចប់សំណុំរឿង០០១ និងការបិទសំណុំរឿងរបស់អៀង សារី និងអៀង ធិរីទ្ធនោះ ព្រមទាំងការបញ្ចប់ការងាររដ្ឋបាលមួយចំនួនផងនោះ សាលាក្តីពិសេសនេះ បានកាត់បន្ថយបុគ្គលិក២ដងក្នុងមួយឆ្នាំ ដោយម្តងៗត្រូវកាត់ចំនួនបុគ្គលិក១០ភាគរយ។

នៅចុងខែធ្នូនេះ ភាគីជាតិនៃសាលាក្តីខ្មែរក្រហមនឹងអនុវត្តផែនការកាត់បន្ថយបុគ្គលិកនេះជាថ្មីទៀត ក្នុងចំណោមចំនួនបុគ្គលិកបច្ចុប្បន្នដែលនៅសល់២៣១នាក់។ នេះបើតាមការបញ្ជាក់របស់លោកនេត្រ ភក្ត្រា អ្នកនាំពាក្យតុលាការខ្មែរក្រហម។

និយាយអំពីការងារបច្ចុប្បន្នរបស់តុលាការកូនកាត់នេះ លោកនេត្រ ភក្ត្រាបានប្រាប់អោយដឹងផងដែរថា សាលាក្តីដំបូងរបស់សាលាក្តីនឹងរៀបចំកិច្ចប្រជុំនៅខែធ្នូក្រោយនេះ ដើម្បីរៀបចំកាលបរិច្ឆេទនៃសវនាការសំណុំរឿង០០២វគ្គ២។ សវនាការនេះដែលត្រូវគ្រោងចាប់ផ្តើមមុនការចេញសាលក្រមសំណុំរឿង០០២វគ្គ១។ សាលក្រមនេះអាចនឹងត្រូវប្រកាសនៅក្នុងពាក់កណ្តាលឆ្នាំ២០១៤៕