បទយកការណ៍ / បទសម្ភាសន៍
ជាតិ
បទសម្ភាសន៍៖ ការជូនកាដូទៅមន្ត្រីថ្នាក់លើមិនមែនជាអំពើពុករលួយទេ 25, Nov 2013 , 11:17 am
![លោក ព្រាប កុល នាយកប្រតិបត្តិអង្គការតម្លាភាពកម្ពុជា](https://image.thmeythmey.com/pictures/2013/11/25/thumb2/25112013111719_________________________.jpg)
លោក ព្រាប កុល នាយកប្រតិបត្តិអង្គការតម្លាភាពកម្ពុជា
×![]()
អំពើពុករលួយ ត្រូវបានប្រជាជននៅលើពិភពលោកនិយាយច្រើនជាងគេ ហើយយើងអាចកំណត់ថាវាជា អំពើពុករលួយបានរយៈសកម្មភាព ឬទម្រង់នានារបស់វា គឺអាស្រ័យទៅលើបរិបទរបស់ប្រទេសដែល ។ ទម្រង់ ឬ សកម្មភាពមួយ នៅក្នុងប្រទេសមួយអាចចាត់ទុកថា ជាអំពើពុករលួយ ប៉ុន្តែរូបភាព ឬ សកម្មភាពដដែលនេះ មិនត្រូវបានចាត់ទុកថាជាអំពើពុករលួយនោះទេ នៅក្នុងលក្ខខណ្ឌប្រទេសមួយផ្សេងទៀតនោះ។
ដើម្បីស្វែងយល់ពីប្រភេទនានា នៃអំពើពុករលួយដែលតែងតែកើតមានឡើងនៅលើពិភពលោក ក៏ដូចជាក្នុងប្រទេសកម្ពុជា ផងដែរនោះ លោក បាន សំអាង ជាអ្នកយកព័ត៌មានប្រចាំគេហទំព័រថ្មីៗ បានធ្វើបទសម្ភាសន៍ជាមួយ លោក ព្រាប កុល នាយកប្រតិបត្តិអង្គការតម្លាភាពកម្ពុជា ដែលជាស្ថាប័នក្រៅរដ្ឋាភិបាលមួយ ធ្វើសកម្មភាពពាក់ព័ន្ធនឹងការប្រយុទ្ធប្រឆាំងអំពើពុករលួយនេះ។
ថ្មីៗ៖ ដូចម្ដេចដែលហៅថាអំពើពុករលួយ ?
លោក ព្រាប កុល៖ យោងតាមនិយមន័យរបស់ ធនាគារពិភពលោក បានកំណត់ថា អំពើពុករលួយគឺជាការបំពានមុខតំណែងសាធារណៈ ដើម្បីផលប្រយោជន៍ផ្ទាល់ខ្លួន។ ចំណែកឯអង្គការតម្លាភាពអន្តរជាតិវិញ ក៏បានឲ្យនិយមន័យផងដែរថា អំពើពុករលួយគឺជាការរំលោភ បំពានអំណាច ដែលទទួលបានពីប្រជាពលរដ្ឋ ដើម្បីប្រើជាប្រយោជន៍ឯកជន។ ប៉ុន្តែក្នុងន័យសាមញ្ញវិញ អំពើពុករលួយគឺជា រាល់ទម្រង់នៃការប្រព្រឹត្តទាំងឡាយណា ដែលបានផលប្រយោជន៍មកខ្លួនឯង ឬក៏ធ្វើឲ្យខូចប្រយោជន៍ដល់អ្នកដទៃ ដោយមិនចាំបាច់ទាក់ទងតែនឹងរឿងលុយនោះទេ។
ថ្មីៗ៖ តើអំពើពុករលួយមានប៉ុន្មានប្រភេទ នៅក្នុងប្រទេសកម្ពុជា?
លោក ព្រាប កុល៖ អំពើពុករលួយត្រូវបានគេចែកចេញជា ៥ ប្រភេទ ដូចខាងក្រោម៖
ទី១គឺ អំពើពុករលួយតាមរយៈការសូកប៉ាន់ ឬការស៊ីសំណូក ការឲ្យលុយទឹកតែ ការឲ្យលុយលើស ឬលុយសម្រាប់ជូនជាសារគុណជាដើម។ប្រភេទទី១នេះ គឺត្រូវបានគេមើលឃើញក្រោមទម្រង់ និងរូបភាព ច្រើនជាងគេនៅក្នុងប្រទេសកម្ពុជា ប៉ុន្តែក្នុងមានទំហំទឹកប្រាក់តិចតួចប៉ុណ្ណោះ។
ទី២គឺ អំពើពុករលួយតាមរយៈការប្រើប្រាស់អំណាច ដើម្បីជំរិតយកលុយ ដែលទាក់ទងនឹងអ្នកមានអំណាច ដែលបានប្រើប្រាស់ឥទ្ធិពលនៃអំណាចរបស់ខ្លួន ដើម្បីបំរើឲ្យប្រយោជន៍ផ្ទាល់ខ្លួន។
ទី៣គឺ អំពើពុករលួយតាមរយៈការបន្លំ ដូចជាការបន្លំឯកសារ បន្លំតួលេខ ដូចជាបន្លំលុយរដ្ឋជាដើម ហើយវាមានលក្ខណៈទ្រង់ទ្រាយធំ។ ករណីនេះគឺមានច្រើននៅក្នុងស្ថាប័ន គយ និង ពន្ធដារ។
ទី៤គឺ អំពើពុករលួយតាមរយៈការប្រកាន់បក្សពួក ឬ ដែលគេនិយមហៅថា បក្សពួកនិយម ដែលទម្រង់នេះកើតមាននៅពេលដែល ប្រធានស្ថាប័នមួយជ្រើសរើសបងប្អូន សាច់ញាតិ សែស្រលាយរបស់ខ្លួន ចូលមកធ្វើការ ឬក៏ជាការឲ្យឱកាស ការយោគយល់ ឬក៏សកម្មភាពផ្សេងៗទៀត ដើម្បីឲ្យបក្សបក្សពួកខ្លួនទទួលបានប្រយោជន៍ជាដើម។
និងទី៥គឺជាអំពើពុករលួយតាមរយៈអ្នកដែលរកស៊ី ផ្ដល់ប្រាក់ទៅឲ្យអ្នកមានអំណាច ដើម្បីឲ្យបុគ្គលដែលមានអំណាចនោះ ជួយការពារនូវមុខរបររបស់គាត់ ឬក៏បង្កជាឱកាសសម្រាប់រកស៊ីជាដើម។ ទម្រង់នេះបានបង្កឲ្យអ្នកដែលរកស៊ីនូវមុខរបរដូចគ្នា ពិបាកក្នុងការប្រកបរបរនេះ ដោយសារតែឈ្មួញដែលយកបុគ្គលមានអំណាចនៅពីក្រោយនោះ អាចរកស៊ីផ្ដាច់មុខ ឬក៏អាចបង្កជាផលលំបាកផ្លូវច្បាប់ពីសំណាក់អាជ្ញាធរផងដែរ។
ថ្មីៗ៖ ឧទាហរណ៍ថា មានមន្ត្រីជាថ្នាក់ដឹកនាំម្នាក់ រៀបចំធ្វើខួបកំណើត ឬក៏ពិធីផ្សេងៗ ហើយមានមន្ត្រីតូចតាចនៅក្រោមឱវាទរបស់ខ្លួន ជូនជាកាដូជាវត្ថុមានតម្លៃ ឬជាទឹកប្រាក់ដ៏ច្រើនសន្ធឹកសន្ធាប់ សម្រាប់ជូនជាចំណងដៃក្នុងពិធីនោះ តើសកម្មភាពនេះគេអាចចាត់ទុកថាជាអំពើពុករលួយដែរឬទេ នៅក្នុងបរិបទប្រទេសកម្ពុជាយើង?
លោក ព្រាប កុល៖ នៅក្នុងច្បាប់ប្រឆាំងនឹងអំពើពុករលួយ របស់ប្រទេសកម្ពុជាមិនបានចាត់ទុកសកម្មភាពខាងលើនេះ ជាអំពើពុករលួយនោះទេ។ ប៉ុន្តែក្នុងក្រមសីលធម៌ និងវប្បធម៌ជាសកល កាលណាយើងធ្វើដូច្នេះ វាអាចជាប់ពាក់ព័ន្ធទៅនឹងការបង្កើតឲ្យមានជាវប្បធម៌ នៃការប្រព្រឹត្តអំពើពុករលួយជាប្រព័ន្ធ ឬក៏បក្សពួកនិយម។ ប៉ុន្តែសម្រាប់ប្រទេសជាច្រើនទៀតគេបានចាត់ទុកថា អំណោយមួយដែលជាអំណោយស្របច្បាប់ គឺត្រូវបានកំណត់នៅក្នុងច្បាប់ ឧទាហរណ៍ បើច្បាប់កំណត់ ៥០ ដុល្លារចុះក្រោមគឺជាអំណោយស្របច្បាប់ ហើយលើសពីគឺត្រូវចាត់ទុកថាជាអំពើពុករលួយ៕
© រក្សាសិទ្ធិដោយ thmeythmey.com