ជាតិ
នយោបាយជាតិ
បក្សកាន់អំណាច មិនធ្វើពិធីជួបជុំក្នុងទិវា៧មករាឡើយ 06, Jan 2021 , 9:29 pm
![សម្តេច ហ៊ុន សែន ប្រធានគណបក្សប្រជាជនកម្ពូជា (លើកដៃ) និង សម្តេច ហេង សំរិន ប្រធានកិត្តិយសគណបក្សប្រជាជនកម្ពុជា ចូលរួមធ្វើជាអធិបតី កាលពីឆ្នាំ២០១៨ ក្នុងពិធីរម្លឹកខួបលើកទី៤០ នៃទិវាជ័យជម្នះ៧មករា (រូបពី AFP)](https://image.thmeythmey.com/pictures/2021/01/06/thumb2/pak.jpg)
សម្តេច ហ៊ុន សែន ប្រធានគណបក្សប្រជាជនកម្ពូជា (លើកដៃ) និង សម្តេច ហេង សំរិន ប្រធានកិត្តិយសគណបក្សប្រជាជនកម្ពុជា ចូលរួមធ្វើជាអធិបតី កាលពីឆ្នាំ២០១៨ ក្នុងពិធីរម្លឹកខួបលើកទី៤០ នៃទិវាជ័យជម្នះ៧មករា (រូបពី AFP)
×![]()
ទិវាជ័យជម្នះ៧មករា ដែលគណបក្សប្រជាជនកម្ពុជា តែងរៀបចំប្រារព្ធនិងជួបជុំគ្នាទ្រង់ទ្រាយធំជារៀងរាល់ឆ្នាំ មិនត្រូវបានធ្វើឡើងឡើយសម្រាប់ឆ្នាំ២០២១នេះ ដោយនៅបារម្ភពីការរាលដាលជំងឺកូវីដ-១៩។ គណបក្សប្រជាជនកម្ពុជា បានចេញសេចក្តីជូនដំណឹងតាំងពីអំឡុងខែតុលា ឆ្នាំ២០២០មកម្ល៉េះ ស្តីពីការមិនប្រារព្ធទិវា៧មករានេះ។
ថ្វីបើគ្មានការប្រារព្ធនិងការជួបជុំគ្នាទ្រង់ទ្រាយធំ តែគណបក្សប្រជាជនកម្ពុជា ដែលដឹកនាំរដ្ឋាភិបាលជាង៣ទសវត្សរ៍មកហើយនោះ បានណែនាំឲ្យគ្រប់សាខារបស់ខ្លួន ឲ្យរៀបចំស្លាកសញ្ញា (Logo) និងពាក្យស្លោកផ្សេងៗ នៅតាមទីតាំងនានា ដើម្បីអបអរសាទរទិវា៧មករា ដូចរាល់ឆ្នាំកន្លងមក។
លោក សុខ ឥសាន អ្នកនាំពាក្យគណបក្សប្រជាជនកម្ពុជា បាននិយាយនូវពាក្យ ដែលគណបក្សរបស់លោក តែងនិយាយកន្លងមកថា ថ្ងៃ៧មករា ឆ្នាំ១៩៧៩ គឺជាថ្ងៃសច្ចធម៌ប្រវត្តិសាស្ត្រ និងជាថ្ងៃកំណើតទី២របស់ប្រជាជនកម្ពុជា។ លោក បន្តថា មានថ្ងៃ៧មករា ឆ្នាំ១៩៧៩ ទើបមាននយោបាយបង្រួបបង្រួមជាតិ និងឈានដល់ការចុះកិច្ចព្រមព្រៀងសន្តិភាពទីក្រុងប៉ារីសថ្ងៃ២៣តុលា ឆ្នាំ១៩៩១។
លោក បន្ថែម មានថ្ងៃ៧មករា ឆ្នាំ១៩៧៩ ទើបមាននយោបាយឈ្នះឈ្នះ ដែលធ្វើឲ្យអង្គការចាត់តាំងនយោបាយនិងយោធាខ្មែរក្រហមត្រូវរលំរលាយទាំងស្រុង ហើយនាំមកនូវសន្តិភាពពេញលេញនិងការឯកភាពជាតិនៅក្នុងប្រវត្តិសាស្ត្រកម្ពុជា។ លោក មានប្រសាសន៍ទៀតថា មានសន្តិភាពនិងការឯកភាពជាតិ ទើបកម្ពុជា មានឱកាស ដើម្បីកសាងនិងអភិវឌ្ឍប្រទេស ឲ្យមានការរីកចម្រើនដូចសព្វ។
តាមរយៈសារក្នុងបណ្តាញទំនាក់ទំនងតេឡេក្រាម អ្នកនាំពាក្យគណបក្សកាន់អំណាចរូបនេះ សរសេរដូច្នេះថា៖«មានថ្ងៃ៧មករា៧៩ ទើបមានជីដូនជីតាយើង មានឪពុកម្តាយយើង មានបងប្អូនយើង និង មានយើងថ្ងៃនេះ។ មានថ្ងៃ៧មករា ទើបមានអ្វីៗទាំងអស់នៅថ្ងៃនេះនិងទៅអនាគតទៀត»។
នៅថ្ងៃទី៧ ខែមករា ឆ្នាំ២០២១ គឺជាខួបលើកទី៤២នៃទិវាជ័យជម្នះ៧មករា។ ៧មករា ឆ្នាំ១៩៧៩ ត្រូវបានចាត់ទុកថាជាថ្ងៃ ដែលរបបខ្មែរក្រហម ត្រូវបានផ្តួលរំលំ៕
© រក្សាសិទ្ធិដោយ thmeythmey.com