បទយកការណ៍ / បទសម្ភាសន៍
ជាតិ
លោក ញឹក ប៊ុនឆៃ ៖ គណបក្សហ៊្វុនស៊ិនប៉ិចនៅតែបន្តអាយុទៅមុខទៀត 27, Nov 2013 , 9:39 am
![](https://image.thmeythmey.com/pictures/2013/11/27/thumb2/2711201394050bunchhay.jpg)
×![]()
នៅក្នុងការបោះឆ្នោតនីតិកាលទី៥ នេះ គណបក្សរាជានិយមហ្វ៊ុនស៊ិនប៉ិច ដែលធ្លាប់តែទទួលបានការគាំទ្រច្រើនពីពលរដ្ឋកាលពីមុននោះ បានបាត់បង់អាសនៈរបស់ខ្លួនអស់ហើយ ពោលគឺសូម្បីតែមួយកៅអីក៏គណបក្សនេះមិនទទួលបាននៅក្នុងអាណត្តិនេះដែរ។ ការណ៍នេះ ត្រូវបានលោក ញឹក ប៊ុនឆៃ ថ្លែងថា មូលហេតុដែលគណបក្សនេះ មិនទទួលបានអាសនៈនៅក្នុងសភា ដោយសារតែការបោះឆ្នោតមានភាពមិនប្រក្រតីច្រើន។
ខាងក្រោមនេះ ជាបទសម្ភាសន៍តពីលើកមុនរវាងអ្នកយកព័ត៌មានឲ្យគេហទំព័រថ្មីៗ លោក ជា ធីរិទ្ធ ជាមួយលោក ញឹក ប៊ុនឆៃ អគ្គលេខាធិការគណបក្សហ្វ៊ុនស៊ិនប៉ិច និង ត្រូវបានតែងតាំងជាទីប្រឹក្សារដ្ឋាភិបាល ឋានៈស្មើឧបនាយករដ្ឋមន្ត្រីក្នុងអណត្តិនេះ។
ថ្មីៗ ៖ លោក ញឹក ប៊ុនឆៃ គណបក្សរបស់លោកក្នុងអាណត្តិនេះ គ្មានបានមួយអាសនៈសោះនៅក្នុងរដ្ឋសភា តើលោកមានដឹងទេថា មកពីមូលហេតុអ្វី?
លោក ញឹក ប៊ុនឆៃ៖ មិនដូច្នោះទេធាតុពិតទៅ គណបក្សហ្វ៊ុនស៊ិនប៉ិច បានទទួលការគាំទ្រច្រើន ដូចជានៅខេត្តខ្ញុំបន្ទាយមានជ័យ និងខេត្តសៀមរាប ព្រមទាំងខេត្តដទៃទៀត ហើយគណបក្សហ្វ៊ុនស៊ិនប៉ិច ត្រូវទទួលបានអាសនៈនៅក្នុងសភា តែដោយសារតែមានបញ្ហាក្នុងការរៀបចំការបោះឆ្នោត ទើបមិនបានអាសនៈនោះ។
ថ្មីៗ ៖ លោកថា មិនបានអាសនៈដោយសារមានបញ្ហាបោះឆ្នោត គណបក្សលោកមានភស្តុតាងទេ?
លោក ញឹក ប៊ុនឆៃ៖ ខ្ញុំមានភស្តុតាងពីភាពមិនប្រក្រតីច្រើននៅក្នុងដៃ ជុំវិញបញ្ហានៃការបោះឆ្នោតនៅក្នុងអាណត្តិនេះ។
ថ្មី៖ លោកឃើញភាពមិនប្រក្រតី ហើយមានភស្តុតាងនៅក្នុងដៃទៀត ហេតុអ្វីគណបក្សនេះ នៅស្ញៀមមិនឃើញប្តឹងផ្តល់?
លោក ញឹក ប៊ុនឆៃ៖ (និយាយរាងយឺត) ខ្ញុំមានឯកសារឬភស្តុតាងនៃភាពមិនក្រតីមែន តែឲ្យខ្ញុំទៅប្តឹងផ្តល់អ្វី វាមិនសូវជាល្អមើលនោះទេ ដូចលោកបានដឹងហើយ ខ្ញុំមិនបាច់និយាយទៀតទេ ម្លោះហើយទើបបានជាយើងខ្ញុំនៅស្ញៀមមិនចេញមុខប្តឹងផ្តល់ពីភាពមិនប្រកតីទាំងនោះ។
ថ្មី៖ ខ្ញុំសូមងាកមកនិយាយពីការច្របាច់បញ្ចូលគ្នារវាងគណបក្សហ្វ៊ុនស៊ិនប៉ិច និងគណបក្សជាតិនិយមបន្តិច។ ទាក់ទងនឹងសំឡេងគាំទ្រ បើមើលទៅគណបក្សនេះ មានដល់ទៅពីរបក្សឯណោះ ដែលល្មមនឹងអាចមានអាសនៈក្នុងសភា បើទោះបីជាមានភាពមិនប្រក្រតីខ្លះ ដូចការលើកឡើងរបស់លោក។ តើលោកយល់យ៉ាងម៉េចដែរត្រង់ចំណុចនេះ?
លោក ញឹក ប៊ុនឆៃ៖ ខ្ញុំសូមជម្រាបលោកចុះ ដោយសារតែលោកសួរហើយ តាមពិតទៅគណបក្សជាតិនិយមដែលជាអតីតគណបក្សនរោត្តម រណឫទ្ធ បានចូលជាមួយហ្វ៊ុនស៊ិនប៉ិច ពិតមែន។ តែចូលបានតែក្បាលម៉ាស៊ីនធំៗតែប៉ុណ្ណោះ។ ចំណែកសមាជិកគណបក្សនេះ មិនបានបោះឆ្នោតឲ្យគណបក្សហ្វ៊ុនស៊ិនប៉ិចនោះទេ គឺគេបោះឆ្នោតឲ្យគណបក្សដទៃទៅវិញ។
ថ្មី៖ លោកមានដឹងថា ចំណុចអ្វីបានជាសមាជិកបក្សជាតិនិយមមិនមិនបោះឆ្នោតឲ្យហ្វ៊ុន ស៊ិនប៉ិច? ហើយខ្ញុំភ្ជាប់សំណួរមួយទៀតថា គណបក្សលោកនឹងធ្វើអ្វីបន្តទៀត ដើម្បីទាក់ទាញការគាំទ្រមកវិញ?
លោក ញឹក ប៊ុនឆៃ៖ គណបក្សហ្វ៊ុនស៊ិនប៉ិច នឹងបន្តអាយុទៅមុខទៀត ហើយធ្វើការកែទម្រង់នូវគោលនយោបាយមួយចំនួនបន្ថែមទៀត ដើម្បីឲ្យស្របទៅនឹងការចង់បានរបស់ប្រជាពលរដ្ឋ។ ហើយខ្ញុំបញ្ជាក់សារជាថ្មីថា បើនៅពេលខាងមុខគេកែទម្រង់ការបោះឆ្នោត គណបក្សហ្វ៊ុនស៊ិនប៉ិច អាចនឹងទទួលបានអាសនៈឡើងវិញ៕
© រក្សាសិទ្ធិដោយ thmeythmey.com