និស្សិតឆ្នាំទី៤រូបនេះ មើលឃើញថា វិស័យកសិកម្ម មានភាពរីកចម្រើនជាងមុន បើប្រៀបធៀបទៅប៉ុន្មានឆ្នាំមុន ដោយសារប្រជាកសិករមានការយល់ដឹងច្រើនអំពីសារប្រយោជន៍ដំណាំ ឬផ្លែឈើ និងមានការយល់ដឹងខ្ពស់ទាក់ទងជាមួយបច្ចេកទេសនៃការដាំ និងថែទាំ។ សុប៉ុច បន្តថា ប្រជាកសិករក៏បានជ្រាបច្បាស់ពីការធ្វើបែបណាទទួលបានទិន្នផលខ្ពស់ និង ការពារកុំឲ្យមានសត្វល្អិត ហើយមានសុវត្ថិភាពក្នុងការបរិភោគ រួមទាំងធ្វើបែបណាឲ្យដំណាំមានទីផ្សារ។
 

និសិ្សតកសិកម្ម ឃឹម សុប៉ុច បង្ហាញពីភាពរីករាយ ដែលខ្លួនជ្រើសរើសជំនាញត្រឹមត្រូវ ដោយឃើញថាបច្ចុប្បន្នវិស័យនេះរួមចំណែកយ៉ាងខ្លាំង ក្នុងការជួយសង្គមជាតិ និងបានលើកទឹកចិត្តដល់សិស្សនិស្សិតដែលទើបបញ្ចប់ការសិក្សាថ្នាក់ទី១២ ឲ្យពិចារណាអំពីការសិក្សាមុខជំនាញកសិកម្ម។
 

«ប្រទេសកម្ពុជាយើង មានដីទំនេរច្រើន ក្នុងនាមជានិសិ្សតផ្នែកកសិកម្មម្នាក់ ដែលបានទៅហាត់ការនៅប្រទេសអ៊ីស្រាអែល រយៈពេល១១ខែ ខ្ញុំចង់ចូលរួមចែករំលែកចំណេះដឹងដែលមាន ផ្តល់ទៅកាន់កសិករ។ ខ្ញុំចង់ឲ្យកសិករយកចំណេះដឹងដែលមាននេះ ធ្វើការដាំដុះលើដីទំនេរ ដែលគាត់ទុកចោល»។ នេះការយល់ឃើញរបស់និសិ្សត ឃឹម សុប៉ុច។
 

បើតាមយុវជន ឃឹម សុប៉ុច កម្ពុជា ជាប្រទេសកសិកម្ម ពិសេសមានដីទំនេរច្រើន ដូច្នេះក្នុងនាមជានិស្សិត សុប៉ុច មានបំណងចង់ចូលរួមចែករំលែកចំណេះដឹងដល់កសិករ និងឲ្យកសិករយកចំណេះដឹងទៅអនុវត្ត និងដាំដុះលើដីទំនេរដែលបានទុកចោលនោះ។ សូមបញ្ជាក់ថា យុវជន ឃឹម សុប៉ុច ជានិស្សិតឆ្នាំទី៤ សិក្សាជំនាញវិទ្យាសាស្រ្តកសិកម្ម ដែលបានជាប់ការហាត់ការរយៈពេល១១ខែ នៅប្រទេសអ៊ីស្រាអែល កាលពីឆ្នាំ២០១៩៕