អន្តរជាតិ
UN ព្រមានមេដឹកនាំយោធាមីយ៉ាន់ម៉ាពីផលវិបាកធ្ងន់ធ្ងរ បើបង្ក្រាបប្រជាជនតវ៉ា
16, Feb 2021 , 10:28 am
ក្រុមប៉ូលិសបង្រ្កាបបាតុកម្ម ជាមួយនឹងប្រជាជនមីយ៉ាន់ម៉ា។ រូបភាព៖ AFP
×![]()
ដោយ: ធៀន ភារិន្ទ
ប្រេសិតពិសេសអង្គការសហប្រជាជាតិ (UN) លោកស្រី Christine Schraner Burgener នៅថ្ងៃទី១៥ ខែកុម្ភៈ បានព្រមានមេដឹកនាំយោធាដោយផ្ទាល់ថា អាចនឹងរងផលវិបាកធ្ងន់ធ្ងរ ប្រសិនបើមានសកម្មភាពឆ្លើយតបយ៉ាងចាស់ដៃបែបណាមួយលើប្រជាជនមីយ៉ាន់ម៉ាដែលកំពុងធ្វើបាតុកម្មតវ៉ា។ ការព្រមាននេះ ធ្វើឡើងស្របពេលក្រុមយោធាបញ្ជូនទាហានបន្ថែមទៀត មកក្នុងទីក្រុងធំៗ។ 
ជាងពីរសប្តាហ៍បន្ទាប់ពីរដ្ឋប្រហារយោធានៅមីយ៉ាន់ម៉ា រដ្ឋាភិបាលយោធា បានបញ្ជូនទាហានបន្ថែមទៀត មកក្នុងទីក្រុងធំនៅមីយ៉ាន់ម៉ា ទោះចំនួនប្រជាជនចូលរួមបាតុកម្ម មានការថយចុះនៅថ្ងៃទី១៥ ខែកុម្ភៈ បើធៀបនឹងថ្ងៃទី១៤ ខែកុម្ភៈ កន្លងទៅ។ ការបញ្ជូនកម្លាំងទាហានចូលមកក្នុងទីក្រុងធំៗរបស់មីយ៉ាន់ម៉ាបែបនេះ វាគឺជាសញ្ញាមួយ ដែលបង្ហាញថា របបសឹក អាចនឹងចាត់វិធានការបង្ក្រាបហិង្សាលើក្រុមអ្នកតវ៉ា។
ស្របពេលនឹងការបញ្ជូនកម្លាំងយោធាចូលក្រុងបែបនេះ ប្រេសិតពិសេសអង្គការសហប្រជាជាតិសម្រាប់បញ្ហាមីយ៉ាន់ម៉ា បានព្រមានរបបយោធាដោយផ្ទាល់ថា អាចនឹងរងផលវិបាក។ «លោកស្រី Schraner Burgener ប្រាប់មេដឹកនាំយោធាថា រាល់ការឆ្លើយតបយ៉ាងខ្លាំងណាមួយលើប្រជាជន ទំនងជាត្រូវប្រឈមនឹងផលវិបាកធ្ងន់ធ្ងរ»។ អ្នកនាំពាក្យ UN លោក Farhan Haq ស្រង់សម្តីរបស់លោកស្រី Schraner Burgener មកអះអាងបែបនេះ ក្នុងសន្និសីទសារព័ត៌មានមួយ ដោយបន្ថែមថា ពិភពលោក កំពុងតាមដានយ៉ាងដិតដល់ លើស្ថានការណ៍នយោបាយនៅមីយ៉ាន់ម៉ា។
ការព្រមាននេះធ្វើឡើងនៅក្នុងកិច្ចសន្ទនារវាងលោកឧត្តមសេនីយ៍ Soe Win អគ្គមេបញ្ជាការរងកងទ័ពមីយ៉ាន់ម៉ា និងលោកស្រីប្រេសិតពិសេសរបស់អង្គការសហប្រជាជាតិតែម្ដង។ ប្រេសិតរូបនេះ ក៏បានជំរុញឱ្យក្រុមយោធា គោរពសិទ្ធិក្រុមអ្នកតវ៉ា និងការជួបជុំដោយសន្តិភាពផងដែរ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
ក្រៅពីបញ្ហាខាងលើ លោកស្រី Schraner Burgener បានលើកឡើងពីផលវិបាកមួយចំនួនជុំវិញការកាត់ផ្តាច់អ៊ីនធឺណិតនៅមីយ៉ាន់ម៉ា ដែលអាចមានបញ្ហាជាច្រើនដូចជា ប៉ះពាល់វិស័យធនាគារ, ភាពតានតឹងនៅក្នុងស្រុក និងវិស័យផ្សេងទៀត។ នៅព្រឹកថ្ងៃទី១៥ ខែកុម្ភៈ អ៊ីនធឺណិត ត្រូវបានតភ្ជាប់មកកម្រិតធម្មតាវិញក្តី ប៉ុន្តែនៅយប់ថ្ងៃដដែលនោះ អ៊ីនធឺណិត ត្រូវបានកាត់ផ្តាច់ជាលើកទីពីរ។
សូមបញ្ជាក់ថា មកទល់ពេលនេះ រដ្ឋាភិបាលមីយ៉ាន់ម៉ា មិនទាន់ចាត់វិធានការធ្ងន់ធ្ងរណាមួយ លើប្រជាជនតវ៉ានៅឡើយទេ ពោលគឺមានត្រឹមតែសកម្មភាពបំបែកក្រុមបាតុករ តាមរយៈការបាញ់ចំពាមកៅស៊ូ បាញ់ទឹក និងគ្រាប់កាំភ្លើងជ័រជាដើម។ ចំណែកក្រុមបាតុករ បានបានចោលដុំឥដ្ឋ និងវត្ថុផ្សេងទៀត ដាក់ក្រុមប៉ូលិសបង្ក្រាបបាតុកម្មវិញដែរ៕
Tag:
UN
មីយ៉ាន់ម៉ា
© រក្សាសិទ្ធិដោយ thmeythmey.com
