ប្រមុខការទូតសិង្ហបុរី លោក Vivian Balakrishnan នៅថ្ងៃទី១៦ ខែកុម្ភៈ បានលើកឡើងពីការព្រួយបារម្ភចំពោះការទណ្ឌកម្មដែលមានលក្ខណៈទូលាយលើមីយ៉ាន់ម៉ាឡើយ ព្រោះវានឹងប៉ះពាល់ខ្លាំងលើជនស៊ីវិល។ លោករដ្ឋមន្ត្រី នៅតែសង្ឃឹមផងដែរថា យោធាមីយ៉ាន់ម៉ា នឹងដោះលែងអ្នកជាប់ឃុំទាំងអស់ រួមទាំងលោកស្រី អ៊ុងសាន ស៊ូជីផងដែរ។
ថ្លែងនៅក្នុងកិច្ចសភានៅថ្ងៃទី១៦ ខែកុម្ភៈ លោក Vivian Balakrishnan រដ្ឋមន្ត្រីការបរទេសសិង្ហបុរី បានលើកឡើងពីការព្រួយបារម្ភ និងស្ថានភាពអាសន្ន ដែលកំពុងវិវឌ្ឍនៅមីយ៉ាន់ម៉ា។ ជាមួយគ្នានេះ ប្រមុខការទូតរូបនេះ ក៏បានលើកឡើងពីផលវិបាកនៃការដាក់ទណ្ឌកម្ម ដើម្បីឆ្លើយតបនឹងរដ្ឋប្រហារផងដែរ។
«យើងមិនគួរប្រើប្រាស់ទណ្ឌកម្មមិនរើសមុខឡើយ ដោយសារអ្នកដែលរងគ្រោះខ្លាំងជាងគេ គឺប្រជាជនសាមញ្ញនៅមីយ៉ាន់ម៉ា»។ លោក Balakrishnan បានលើកឡើងបែបនេះ បន្ទាប់ពីអាមេរិកបានដាក់ទណ្ឌកម្មលើមេដឹកនាំយោធា និងក្រុមហ៊ុនចំនួន៣ និងប្រទេសផ្សេងទៀត ព្រមានដាក់ទណ្ឌកម្ម។
ក្នុងនាមជាសមាជិកអាស៊ានដូចគ្នា ប្រមុខការទូតសិង្ហបុរី បានជំរុញឱ្យរដ្ឋាភិបាលយោធាមីយ៉ាន់ម៉ាចៀសវាងប្រើប្រាស់អំពើហិង្សាលើប្រជាជនស៊ីវិល និងអនុវត្តវិធានការផ្សេងៗ ដើម្បីបន្ធូរបន្ថយភាពតានតឹងនៅក្នុងប្រទេស។ សិង្ហបុរីសង្ឃឹមថា មីយ៉ាន់ម៉ា នឹងមានសេចក្តីសម្រេចដោយសន្តិវិធីមួយ ក្នុងការដោះស្រាយបញ្ហានៅក្នុងប្រទេស។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
ទន្ទឹមនេះ រដ្ឋមន្ត្រីការបរទេសសិង្ហបុរី បានបង្ហាញក្តីបារម្ភលើស្ថានការណ៍ចុងក្រោយនៅមីយ៉ាន់ម៉ាដូចជាការប៉ះទង្គិចរវាងប៉ូលិស និងក្រុមបាតុករ, ការផ្តាច់អ៊ីនធឺណិត, ការចាប់ខ្លួនមន្ត្រីរដ្ឋ និងការចល័តកងទ័ពចូលក្នុងក្រុងធំៗជាដើម។ មិនតែប៉ុណ្ណោះ រដ្ឋមន្ត្រីរូបនេះ ក៏បានលើកឡើងពីផលប៉ះពាល់សេដ្ឋកិច្ចរបស់មីយ៉ាន់ម៉ា ដោយសារតែការថយក្រោយនៃលទ្ធិប្រជាធិបតេយ្យនៅមីយ៉ាន់ម៉ាផងដែរ។ បន្ទាប់ពីរដ្ឋប្រហារយោធា ក្រុមហ៊ុនបរទេសមួយចំនួន បានផ្អាកដំណើរការក្រុមហ៊ុនបណ្តោះអាសន្ន។
កន្លងមក ប្រធានាធិបតីឥណ្ឌូណេស៊ី លោក ចូកូ វីដូដូ និងនាយករដ្ឋមន្ត្រីម៉ាឡេស៊ី លោក មូហ៊ីឌីន យ៉ាស៊ីន ក៏បានជជែកពីស្ថានការណ៍នៅមីយ៉ាន់ម៉ា ហើយស្នើរៀបចំកិច្ចប្រជុំពិសេសមួយ ដើម្បីជជែកពីបញ្ហានៅមីយ៉ាន់ម៉ា។ ព្រុយណេ ជាប្រធានប្ដូរវេនរបស់អាស៊ាននៅឆ្នាំ២០២១។ មកទល់ពេលនេះ ប្រទេសអាស៊ានទាំងអស់ សុទ្ធតែបានបង្ហាញជំហររៀងៗខ្លួនទាំងអស់ លើស្ថានការណ៍មីយ៉ាន់ម៉ា លើកលែងតែឡាវ និងវៀតណាមប៉ុណ្ណោះ ដែលមិនទាន់មានប្រតិកម្មអ្វី។
សូមបញ្ជាក់ថា សិង្ហបុរី មានទំហំវិនិយោគច្រើនជាងគេបង្អស់នៅក្នុងមីយ៉ាន់ម៉ា ក្នុងនោះមានដូចជា មន្ទីរពេទ្យ, ឧស្សាហកម្ម, និងអចលនទ្រព្យជាដើម។ តាមការចុះផ្សាយរបស់ទូរទស្សន៍ Channel News Asia ទំហំវិនិយោគរបស់សិង្ហបុរីមានចំនួនសរុប ២២,៧ពាន់លានដុល្លារ គិតត្រឹមខែមករា ឆ្នាំ២០២០ ៕