ជាតិ
មន្ទីរជំនាញខេត្ត៖ ទឹកបឹងយក្ខឡោមមានសភាពល្អក់ អាចជាកត្តាបាតុភូតធម្មជាតិ
21, Feb 2021 , 4:47 pm
×![]()
ដោយ: សារព័ត៌មានថ្មីៗ
ចាប់ពីថ្ងៃទី២០ ខែកុម្ភៈ ឆ្នាំ២០២១មក ផ្ទៃបឹងយក្ខឡោមទាំងមូលមានសភាពល្អក់ប្លែកពីធម្មតា។ ប្រធានបរិស្ថាន ប្រធានមន្ទីរទេសចរណ៍ ក៏ដូចជាមន្ត្រីនៃមន្ទីរឧស្សាហ៍កម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានសន្និដ្ឋានជាបឋមថា អាចបណ្តាលមកពីកត្តាធម្មជាតិ។ នេះយោងតាមអត្ថបទដែលផ្សាយដោយមន្ទីរព័ត៌មានខេត្តរតនគិរី។
បឹងយក្ខឡោមស្ថិតនៅសង្កាត់យក្ខឡោមក្រុងបានលុង ខេត្តរតនគិរី ជាតំបន់រមណីយដ្ឋានធម្មជាតិមួយដ៏មានសក្តានុពលបំផុតមួយនៅខេត្តភាគឦសានមួយនេះ។ ទាក់ទងនឹងផ្ទៃទឹកដែលមានសភាពល្អក់ លោក ផុន ខេមរិន្ទ ប្រធានមន្ទីរបរិស្ថានខេត្តរតនគិរី វាយតម្លៃថា អាចមកពីកត្តាបាតុភូតធម្មជាតិ ដូចកាលពីអំឡុងឆ្នាំ២០១១ផងដែរ។
ទោះបីជាយ៉ាងណាក៏ដោយ ប្រធានមន្ទីរបរិស្ថានរូបនេះ មិនទាន់ហ៊ានអះអាងតាមបែបវិទ្យាសាស្ត្រនោះឡើយ ដោយគ្រាន់តែកត់សម្គាល់ភាពល្អក់នៅបឹងយក្ខលោម កើតមាន ខណៈដែលប្រទេសជិតខាងមានព្យុះ ឬបាតុភូតធម្មជាតិអ្វីមួយ។
លោក ផុន ខេមរិន្ទ ក៏បានសង្កេតឃើញ បឹងលំកុដ បឹងយក្ខអោម យក្ខរ៉ា ក៏មានសភាពល្អក់ដែរ ប៉ុន្តែមិនប៉ះពាល់ដល់បរិស្ថានធ្ងន់ធ្ងរនោះឡើយ។
អត្ថបទ ក៏បានបង្ហាញពីការអះអាងស្រដៀងគ្នាពីសំណាក់ លោក ង៉ែត ពិទូ ប្រធានមន្ទីរទេសចរណ៍ខេត្តរតនគិរី ផងដែរ។ លោកបានលើកឡើងពីបាតុភូតធម្មជាតិរៀងរាល់១០ឆ្នាំម្តង ហើយផ្ទៃមានសភាពថ្លាវិញ ជាបណ្តើរៗ។
ដូចគ្នាផងដែរ មន្ត្រីនៃមន្ទីរឧស្សាហ៍កម្ម វិទ្យាសាស្ត្រ បច្ចេកវិទ្យា និងនវានុវត្តន៍ខេត្ត បញ្ជាក់ថា សភាពល្អក់នេះ មិនមែនជាលើកទី១ឡើយ។ កត្តានេះគឺដោយសារបាតុភូតធម្មជាតិនៃបន្ទុះភ្នំភ្លើង ហើយបឹងយក្ខឡោមក៏មានសរសៃឈាមជាប់នឹងបន្ទុះភ្នំភ្លើងមួយទៀតនៅប្រទេសណាមួយនៅក្នុងអាស៊ី ដែលវាមានសរសៃឈាមជាប់នឹងបឹងយក្សឡោមដោយផ្អែកតាមលក្ខណៈវិទ្យាសាស្ត្រ។
តាមឯកសាររដ្ឋបាលខេត្ត បឹងយក្ខឡោមមានទីតាំងប្រមាណ៥គីឡូម៉ែត្រភាគអាគ្នេយ៍ពីទីរួមខេត្តរតនគិរី ។ បឹងដ៏ស្រស់ស្អាតនេះ មានទម្រង់ដោយសារភ្នំភ្លើង បន្ទាប់ពីបន្ទុះភ្នំភ្លើងមួយកាលពីប្រមាណ ៤.០០០ឆ្នាំកន្លងទៅ ។ ការវាស់ជម្រៅបឹងនេះមានរហូតដល់ទៅ៨០០ម៉ែត្រ និងបង្ហាញឲ្យឃើញទឹកថ្លាឈ្វេងជម្រៅប្រហែល ៥០ម៉ែត្រ ។
នៅម្ខាងនៅបឹងមានកំពង់ពីរដែលធ្វើពីឈើសម្រាប់ទេសចរទស្សនាបឹងឲ្យកាន់តែជិត ប៉ុន្តែមនុស្សមួយចំនួនមិនអាចទ្រាំនឹងការត្រាំក្នុងទឹកដើម្បីឲ្យមានកម្ដៅខ្លួនប្រាណ ៕
Tag:
យក្ខឡោម
© រក្សាសិទ្ធិដោយ thmeythmey.com
