អន្តរជាតិ
សង្ខេបព្រឹត្តិការណ៍អន្តរជាតិសំខាន់ៗប្រចាំសប្តាហ៍ 07, Mar 2021 , 9:59 pm
× មួយសប្តាហ៍កន្លងផុត ព្រឹត្តិការណ៍អន្តរជាតិជាច្រើនបានកើតឡើង។ បាតុកម្មមីយ៉ាន់ម៉ា នៅតែបន្តជាប្រធានបទដ៏ក្តៅគគុកមួយប្រចាំសប្តាហ៍ ស្របពេលចិនបើកសម័យប្រជុំលើកទី៤ នៃសភាប្រជាជនចិននីតិកាលទី១៣។ ទន្ទឹមនេះ វាក៏មានព្រឹត្តិការណ៍ផ្សេងទៀតផងដែរ ដែលបានកើតឡើងនៅបារាំង កូរ៉េខាងត្បូង និងបណ្តាប្រទេសផ្សេងទៀត។ ខាងក្រោមនេះ គឺជាព្រឹត្តិការណ៍សំខាន់ៗ ដែលបានកើតនៅក្នុងសប្តាហ៍នេះ។
ថ្ងៃទី១ ខែមីនា
- លោកស្រីអ៊ុងសាន ស៊ូជី បានបង្ហាញខ្លួនជាលើកដំបូងនៅក្នុងសវនាការ តាមរយៈប្រព័ន្ធវីដេអូ។ ក្នុងសវនាការនេះ តុលាការ បានចោទលោកស្រីស៊ូជី ពីរករណីបន្ថែមទៀត ដែលមានចែងនៅក្នុងច្បាប់ព្រហ្មទណ្ឌ និងច្បាប់ទូរគមនាគមន៍។
- ផ្សារគ្រឿងសមុទ្រក្នុងខេត្តសមុទ្រសាគរ ដែលជាចំណុចកណ្ដាលនៃការផ្ទុះករណីឆ្លងជំងឺកូវីដ-១៩ នៅថៃ បានបើកឱ្យដំណើការវិញ ប៉ុន្តែវិធានការការពារ ត្រូវអនុវត្តយ៉ាងតឹងរ៉ឹងបំផុតដើម្បីបង្ការការឆ្លងរាលដាលជាជាថ្មី។
- អតីតប្រធានាធិបតីបារាំង នីកូឡាស់ សាកូហ្ស៊ី ត្រូវបានតុលាការរកឃើញថាមានកំហុសពាក់ព័ន្ធអំពើពុករលួយ និងត្រូវកាត់ទោសឱ្យជាប់ពន្ធនាគាររយៈពេល៣ឆ្នាំ។
ថ្ងៃទី២ ខែមីនា
- រដ្ឋមន្ត្រីការបរទេសអាស៊ាន នឹងបើកកិច្ចប្រជុំពិសេសមួយ ជជែកពីបញ្ហាមីយ៉ាន់ម៉ា ប៉ុន្តែកិច្ចប្រជុំនេះ មិនអាចចេញសេចក្តីថ្លែងការណ៍រួមបានទេ ដោយប្រទេសសមាជិកចេញសេចក្តីថ្លែងការណ៍រៀងៗខ្លួនប៉ុណ្ណោះ ។
- អង្គការអ្នកកាសែតគ្មានព្រំដែន (RSF) បានប្តឹងរជ្ជទាយាទអារ៉ាប៊ីសាអូឌីត Mohammed bin Salman ទៅការិយាល័យរដ្ឋអាជ្ញាអាល្លឺម៉ង់លើករណីឃាតកម្មអ្នកកាសែត Jamal Kashoggi កាលពីឆ្នាំ២០១៨ ។
ថ្ងៃទី៣ ខែមីនា
- រដ្ឋមន្ត្រីការបរទេសអាមេរិក អាន់តូនី ប្ល៊ីងខិន បានចាត់ទុកចិន ជាវិញ្ញាសាភូមិសាស្ត្រនយោបាយដ៏ធំបំផុតរបស់អាមេរិកក្នុងសតវត្សរ៍ទី២១។ បើតាមលោក ប្ល៊ីងខិន ចិនជាប្រជាជាតិអាស៊ីតែមួយគត់ដែលមានអំណាចគ្រប់គ្រាន់ក្នុងការបំផ្លាញសណ្តាប់ធ្នាប់ពិភពលោក។
- បាតុករមីយ៉ាន់ម៉ា យ៉ាងហោចណាស់ចំនួន ៣៨នាក់ បានបាត់បង់ជីវិត នៅក្នុងការតវ៉ាស្ទើរតែទូទាំងប្រទេស។ នេះជាចំនួនអ្នកស្លាប់ច្រើនបំផុតក្នុងមួយថ្ងៃ ចាប់តាំងពីរដ្ឋប្រហារយោធាមក។
ថ្ងៃទី៤ ខែមីនា
- ហុងកុង ដែលជាដែនដីឈរនៅកំពូលតារាងនៃសេរីភាពសេដ្ឋកិច្ចរយៈពេលជាច្រើនឆ្នាំ ត្រូវបានក្រុមអ្នកជំនាញThe Heritage Foundation ដកចេញពីបញ្ជីក្នុងឆ្នាំ២០២១។ ការសម្រេចដកហុងកុងចេញពីបញ្ជីសេរីភាពសេដ្ឋកិច្ច ដោយសារហុងកុងបាត់បង់សេរីភាពនយោបាយ និងស្វ័យភាព។
- ក្រសួងពាណិជ្ជកម្មអាមេរិក ប្រកាសរឹតត្បិតការរកស៊ីជាមួយក្រសួងការពារជាតិ និងមហាផ្ទៃមីយ៉ាន់ម៉ា ពិសេសជំនួញអាវុធ ហើយ ក្រុមហ៊ុនអាមេរិក ក៏មិនត្រូវបានអនុញ្ញាតឱ្យរកស៊ីជាមួយក្រុមហ៊ុនគ្រប់គ្រងដោយយោធាមីយ៉ាន់ម៉ា។
ថ្ងៃទី៥ ខែមីនា
- សភាប្រជាជនចិន បើកសម័យប្រជុំលើកទី៤ នៃសភាប្រជាជនចិននីតិកាលទី១៣ ប្រចាំឆ្នាំ២០២១ នៅមហាវិមានប្រជាជនចិន ក្នុងក្រុងប៉េកាំង។ សំណើច្បាប់ជាច្រើនត្រូវលើកយកមកពិភាក្សា និងអនុម័ត ក្នុងនោះមានគោលនយោបាយសេដ្ឋកិច្ច សេចក្ដីស្នើលើការកែទម្រង់ការបោះឆ្នោតនៅហុងកុង និងសេចក្តីព្រាងរបាយការណ៍ហិរញ្ញវត្ថុលើវិស័យការពារជាតិជាដើម។
ថ្ងៃទី៦ ខែមីនា
- កាសែតរដ្ឋមីយ៉ាន់ម៉ាThe Global New Light of Myanmar ចេញផ្សាយថា រដ្ឋាភិបាលយោធាចេញសេចក្តីថ្លែងការណ៍ ចាត់ទុកគណៈកម្មាធិការតំណាងសភាសហភាពមីយ៉ាន់ម៉ា (CRPH) ថាខុសច្បាប់៕
© រក្សាសិទ្ធិដោយ thmeythmey.com