រយៈពេល ៩ថ្ងៃហើយ ដែលក្រុមហាម៉ាស់ និងអ៊ីស្រាអែលមានជម្លោះប្រដាប់អាវុធជាមួយគ្នា និងបង្កឱ្យអ្នកស្លាប់នៅក្នុងដែនដីទាំងពីរយ៉ាងហោចណាស់ ២៣០នាក់ និងអ្នករបួសជាង ១ពាន់នាក់។ ស្របគ្នា នឹងជម្លោះរវាងក្រុមអាម៉ាស់ និងអ៊ីស្រាអែល ប្រជាជនប៉ាឡេស្ទីន ដែលមានវត្តមាននៅតំបន់ត្រើយខាងលិច (West Bank) ក៏បានផ្ទុះការតវ៉ា និងត្រូវបានអ៊ីស្រាអែលបង្រ្កាប តាមរយៈការបាញ់គ្រាប់ពិតផងដែរ។ វិបត្តិកាន់តែផុងជ្រៅ ដែលទាមទារឱ្យមានការដោះស្រាយជាបន្ទាន់។ 

 

ទាក់ទិននឹងបញ្ហាបែបនេះ រដ្ឋមន្រ្តីការបរទេសសហភាពអឺរ៉ុប បានចេញសេចក្តីថ្លែងការណ៍មួយនៅថ្ងៃទី១៨ ខែឧសភា ដោយអំពាវនាវហាម៉ាស់ និងអ៊ីស្រាអែលឱ្យមានបទឈប់បាញ់ជាមួយគ្នា និងពន្លឿនការផ្តល់ជំនួយមនុស្សធម៌ទៅតំបន់កាហ្សា ដែលកំពុងរងគ្រោះខ្លាំងដោយសារការវាយប្រហារពីសំណាក់អ៊ីស្រាអែល។ 

 

«អាទិភាពរវាងដែនដីទាំងពីរ គឺត្រូវបញ្ឈប់រាល់ហិង្សាទាំងអស់ភ្លាមៗ និងអនុវត្តបទឈប់បាញ់»។ លោក Josep Borrell ប្រធានគោលនយោបាយការបរទេសអឺរ៉ុប បានបញ្ជាក់ពីការឯកភាពរបស់រដ្ឋមន្រ្តីការបរទេសអឺរ៉ុបបែបនេះ  នៅក្នុងកិច្ចប្រជុំតាមរយៈប្រព័ន្ធវីដេអូ។ បើតាមប្រធានគោលនយោបាយការបរទេសអឺរ៉ុប រដ្ឋមន្រ្តីការបរទេសអឺរ៉ុបទាំងអស់ សុទ្ធតែបានយល់ព្រមលើបញ្ហាខាងលើ លើកលែងតែហុងគ្រីដែលបដិសេធ។ 

 

ការជំទាស់របស់ហុងគ្រី ធ្វើឡើងដោយសារ វាមិនអាចជួយដោះស្រាយអ៊ីស្រាអែល និងប៉ាឡេស្ទីនបានច្រើន។ «សេចក្តីថ្លែងការណ៍នេះ មិនអាចជួយបាន ជាពិសេសនៅក្នុងស្ថានការណ៍ដែលមានពេលភាពតានតឹងឡើងខ្ពស់»។ លោក Peter Szijjarto រដ្ឋមន្រ្តីការបរទេសហុងគ្រី ថ្លែងប្រាប់ទីភ្នាក់ងារព័ត៌មាន AFP។ 

 

ស្របគ្នានេះដែរ រដ្ឋមន្រ្តីការបរទេសបារាំង លោក Jean-Yves Le Drian បានព្រមានយ៉ាងច្បាស់ៗថា ជម្លោះអាចនឹងរីកសាយនៅក្នុងតំបន់ ប្រសិនបើគ្មានបទឈប់បាញ់។ មិនតែប៉ុណ្ណោះ រដ្ឋមន្រ្តីបារាំងរូបនេះ បានបន្តទៀតថា លោកសង្ឃឹមថា អ៊ីស្រាអែល នឹងមិនបើកប្រតិបត្តិការទ័ពថ្មើរជើងវាយប្រហារលើតំបន់កាហ្សា ឡើយ៕