ការប៉ះទង្គិចរវាងយោធាមីយ៉ាន់ម៉ា និងក្រុមប្រដាប់អាវុធជនជាតិភាគតិចកាឈិន កើតមានជាញឹកញាប់នៅក្នុងក្រុង Momauk ក្នុងរដ្ឋ Kachin។ យោធាមីយ៉ាន់ម៉ា តែងបញ្ជូនយន្តហោះចម្បាំងទៅវាយប្រហារក្រុមកាឈិនជាញឹកញយ។ 

 

កងទ័ពឯករាជ្យកាឈិន បានវាយប្រហារលើរថយន្ត៧គ្រឿងដែលដឹកសាំងសម្រាប់ចាក់យន្តហោះដែលនាំចូលពីចិន។ ការវាយប្រហារនេះ ធ្វើឡើងដោយសារសង្ស័យថា សាំងទាំងនោះ យកទៅចាក់យន្តហោះចម្បាំងយោធាមីយ៉ាន់ម៉ាតែម្ដង។ 

 

«ប្រជាជនប្រាប់យើងថាសាំងនោះ មិនមែនសម្រាប់ប្រើប្រាស់ជាសាធារណៈឡើយ ប៉ុន្តែសម្រាប់ក្រុមប្រឹក្សាយោធាមីយ៉ាន់ម៉ា ដូច្នេះយើងបានបើកការវាយប្រហារទៅ»។ វរសេនីយឯក លោក Naw Bu មន្រ្តីព័ត៌មាន KIA បានលើកឡើងបែបនេះ ដោយបន្ថែមថា រថយន្តចំនួន ៥គ្រឿង ត្រូវបានវាយប្រហារលើមហាវិថីសហព័ន្ធ និងពីរគ្រឿងទៀត ត្រូវបានបាញ់កម្ទេចក្នុងរដ្ឋ Shan នៅថ្ងៃទី១៧ និង១៨ ខែឧសភា។ 

 

បើតាមការបញ្ជាក់របស់ក្រុមប្រដាប់អាវុធជនជាតិភាគតិចមួយនេះ គ្មានការប្រយុទ្ធគ្នាណាមួយកើតឡើងឡើយ បន្ទាប់ពីបាញ់កម្ទេចរថយន្តដឹកសាំងនោះមក។ នេះបើតាមការចុះផ្សាយរបស់សារព័ត៌មាន The Irrawaddy។ 

 

គួររំលឹកថា នៅមុនរដ្ឋប្រហារយោធាដើមខែកុម្ភៈ ក្រុមប្រដាប់អាវុធកាឈិន បានចរចាស្វែងរកបទឈប់បាញ់ជាមួយយោធាមីយ៉ាន់ម៉ាជាច្រើនលើកហើយ ប៉ុន្តែចាប់តាំងពីមានការបាញ់សម្លាប់លើអ្នកតវ៉ាមីយ៉ាន់ម៉ាមក ក្រុមប្រដាប់អាវុធជនជាតិភាគតិចមួយនេះ បានបើកការវាយប្រហារលើយោធាឡើងវិញ៕