ក្រោមអធិបតីរបស់រដ្ឋមន្រ្តីសុខាភិបាលថៃ លោក Anutin Charnvirakul និងមន្រ្តីជាន់ខ្ពស់ផ្សេងទៀត ថៃបានទទួលវ៉ាក់សាំង ១,៨លានដូស ពីក្រុមហ៊ុន AstraZeneca។ លោករដ្ឋមន្រ្តីសុខាភិបាល បានលើកឡើងថា ពេលនេះ វ៉ាក់សាំងនឹងត្រូវបានចែកចាយទៅគ្រប់ខេត្តទាំងអស់របស់ថៃ មុនកម្មវិធីចាក់វ៉ាក់សាំងទ្រង់ទ្រាយធំ ដែលត្រូវធ្វើឡើងនៅថ្ងៃទី៧ ខែមិថុនាខាងមុខ។ 

 

ទន្ទឹមនេះ លោករដ្ឋមន្រ្តី Anutin ក៏បានតបទៅអ្នករិះគន់លើកម្មវិធីចាក់វ៉ាក់សាំងថៃផងដែរ ដោយលោកបានលើកឡើងថា រដ្ឋាភិបាលថៃ មិនបានផ្អែកតែលើវ៉ាក់សាំង AstraZeneca តែមួយប្រភេទឡើយ ប៉ុន្តែថៃ ក៏បានអនុញ្ញាតឱ្យប្រើប្រាស់វ៉ាក់សាំងផ្សេងទៀតជាបន្ទាន់ផងដែរ ដូចជា វ៉ាក់សាំង Sinovac, វ៉ាក់សាំង Johnson & Johnson, វ៉ាក់សាំង Moderna  និងវ៉ាក់សាំង Sinopharm ជាដើម។

 

ចំណែកប្រធានក្រុមហ៊ុន AstraZeneca ប្រចាំនៅប្រទេសថៃវិញ ចាត់ទុក ការផ្តល់វ៉ាក់សាំងលើកដំបូងនេះ គឺជារឿងសំខាន់ណាស់ ព្រោះវាជាការចាប់ផ្តើមការផ្គត់ផ្គង់វ៉ាក់សាំងប្រកបដោយចីរភាពដល់ថៃ។ 

 

តាមការចុះផ្សាយរបស់កាសែតបាងកកប៉ុស្តិ៍ វ៉ាក់សាំងក្រុមហ៊ុន AstraZeneca ដែលត្រូវបានផលិតដោយក្រុមហ៊ុន Siam Bioscience មានគុណភាពល្អត្រឹមត្រូវ ព្រោះវាត្រូវបានធ្វើតេស្តសាកល្បងដោយមន្ទីរពិសោធន៍នៅអាមេរិក អង់គ្លេស និងថៃ។ 

 

ក្រៅពីផ្គត់ផ្គង់នៅថៃ វ៉ាក់សាំង AstraZeneca មួយនេះ ក៏ផ្គត់ផ្គង់ឱ្យប្រទេសអាស៊ានមួយចំនួនផងដែរ។ ក្នុងថ្ងៃដដែលនេះ ម៉ាឡេស៊ី ក៏បានផ្តល់ការអនុញ្ញាតដោយភ្ជាប់ជាមួយលក្ខខណ្ឌលើវ៉ាក់សាំង ដែលផលិតដោយក្រុមហ៊ុន Siam Bioscience ផងដែរ ស្របពេលកូវីដ-១៩ កំពុងរីកសាយនៅក្នុងប្រទេស។ 

 

តាមទិន្នន័យរបស់ Reuter COVID-19 Tracker ថៃចាក់វ៉ាក់សាំង បានជាង ៣លានដូសឱ្យប្រជាជនខ្លួន។ ចំណែកអ្នកទទួលបានវ៉ាក់សាំងពេញលេញ មានប្រមាណជាង ២ភាគរយ នៃប្រជាជនសរុប៕