តៃវ៉ាន់កំពុងប្រឈមមុខនឹងការឆ្លងរាលដាលក្នុងតំបន់យ៉ាងគំហុក។ ស្របគ្នានេះ ប្រជាជនតៃវ៉ាន់ប្រហែល៣ភាគរយនៃចំនួនប្រជាជនសរុបប៉ុណ្ណោះ បានទទួលការចាក់វ៉ាក់សាំងការពារជំងឺកូវីដ-១៩។ តៃវ៉ាន់ ត្រូវការវ៉ាក់សាំងរាប់លានដូសដើម្បីចាក់ឱ្យប្រជាជនរបស់ខ្លួន ដើម្បីទប់ស្កាត់ការរាលដាល។

 

ជាកាយវិការមិត្តភាព ជប៉ុន បានបញ្ជូនវ៉ាក់សាំងរបស់ AstraZeneca ចំនួន១,២៤លានដូសឱ្យតៃវ៉ាន់។ បើតាមទីភ្នាក់ងារព័ត៌មាន AFP យន្តហោះដឹកវ៉ាក់សាំង បានទៅដល់អាកាសយានដ្ឋានអន្តរជាតិតៃប៉ិនាពេលរសៀលថ្ងៃទី៤ ខែមថិនា។ រដ្ឋមន្រ្តីសុខាភិបាលតៃវ៉ាន់លោក Chen Shih-chung បានអរគុណជប៉ុនចំពោះការផ្តល់វ៉ាក់សាំងការពារជំងឺកូវីដ-១៩ អំឡុងពេលដ៏តានតឹងមួយនេះ។ លោកបានបន្ថែមថា វាពិតជាមានសារៈប្រយោជន៍សម្រាប់តៃវ៉ាន់ នៅពេលទទួលបានវ៉ាក់សាំងទាំងអស់នេះ។ 

 

លើសពីនោះ តៃវ៉ាន់ ក៏សង្ឃឹមទទួលបានវ៉ាក់សាំងការពារជំងឺកូវីដ-១៩ ក្រោមផែនការសេតវិមានដែលគ្រោងចែកវ៉ាក់សាំងទៅឱ្យពិភពលោកដោយផ្ទាល់ចំនួន២៥លានដូស។ 

 

រហូតមកដល់ពេលនេះ តៃវ៉ាន់ទទួលបានវ៉ាក់សាំងសរុបប្រមាណ២,១លានដូស ដែលភាគច្រើនជាវ៉ាក់សាំងរបស់ AstraZeneca និងមានមួយចំនួនតូចជាវ៉ាក់សាំងរបស់ Moderna។ តៃវ៉ាន់ក៏បានបញ្ជាទិញវ៉ាក់សាំងច្រើនជាង២០លានដូសទៀតពីក្រុមហ៊ុន AstraZeneca និង Moderna ផងដែរ។ ដែនកោះនេះ ក៏កំពុងបង្កើតវ៉ាក់សាំងផ្ទាល់ខ្លួនផងដែរ។

 

តៃវ៉ាន់ មានករណីឆ្លងសរុបចំនួនជាងមួយម៉ឺននាក់ និងមានអ្នកស្លាប់ ១៨៨៕