COVID-19
ជាតិ
របាយការណ៍ពី៨ខេត្តទៀត ខេត្តកំពត បន្ទាយមានជ័យ និងស្វាយរៀង មានអ្នកឆ្លងច្រើនជាងគេ
05, Jun 2021 , 5:59 pm
×![]()
ដោយ: ថ្មីៗ
កំពត បន្តរកឃើញអ្នកវិជ្ជមានកូវីដ-១៩ ចំនួន៤៦នាក់ ខណៈបន្ទាយមានជ័យ រកឃើញមនុស្ស ៣៦នាក់ទៀតឆ្លងកូវីដ-១៩ ក្នុងនោះ៤នាក់បានត្រឡប់មកពីប្រទេសថៃ។ ចំណែក ខេត្តស្វាយរៀង បានរកឃើញអ្នកវិជ្ជមានថ្មី៣៣នាក់ ភាគច្រើនជាកម្មករោងចក្រ។ ខេត្តកំពង់ចាម ក៏មានអ្នកឆ្លងថ្មី២៧នាក់បន្ថែម ខណៈកំពង់ឆ្នាំងមាន ១៩នាក់។ ខេត្តកោះកុង បន្តរកឃើញ៦នាក់ ប៉ៃលិនមាន៤នាក់ខណៈខេត្តឧត្តរមានជ័យ៣នាក់។ 
កំពត៖ វិជ្ជមាន៤៦នាក់ទៀត ជាករណីឆ្លងក្នុងសហគមន៍
រកឃើញមនុស្ស៤៦នាក់ទៀត មានវិជ្ជមានកូវីដ-១៩ ភាគច្រើនមានមុខរបរជាកសិករ។ បើតាមរដ្ឋបាលខេត្តកំពត មនុស្សទាំង៤៦នាក់មានអាសយដ្ឋាននៅស្រុកកំពង់ត្រាច៣១នាក់,ស្រុកអង្គរជ័យ២នាក់,ស្រុកឈូក២នាក់,ស្រុកបន្ទាយមាស១នាក់,ស្រុកទឹកឈូ១នាក់,អ្នកខេត្តតាកែវ២នាក់, បាត់ដំបង២នាក់,កំពង់ចាម១នាក់,ក្រចេះ១នាក់ និងភ្នំពេញ១នាក់។ បច្ចុប្បន្ន អ្នកជំងឺទាំងអស់ រដ្ឋបាលខេត្តបានបញ្ជូនទៅព្យាបាលនៅមន្ទីរពេទ្យបង្អែកស្រុក និងកំពុងស្រាវជ្រាវ រកអ្នកដែលពាក់ព័ន្ធបន្ត។
បន្ទាយមានជ័យ៖ រកឃើញ៣៦នាក់ថ្មី វិជ្ជមានកូវីដ-១៩ ក្នុងនោះ៤នាក់មកពីប្រទេសថៃ
រកឃើញមនុស្ស៣៦នាក់ទៀត វិជ្ជមានកូវីដ-១៩ នៅថ្ងៃទី៤ ខែមិថុនា ភាគច្រើនជាអ្នកប៉ោយប៉ែត និងជាកម្មកររោងចក្រហាយថេក។ បើតាមការប្រកាសរដ្ឋបាលខេត្តបន្ទាយមានជ័យ មនុស្សទាំង៣៦នាក់ មានអាសយដ្ឋាននៅក្រុងប៉ោយប៉ែត២៨នាក់,ស្រុកសិរីសោភណ្ឌ៣នាក់,ព្រះនេត្រព្រះ២នាក់,ស្រុកម៉ាឡៃ១នាក់,ស្រុកអូរជ្រៅ១នាក់ និងស្រុកមង្គលបូរី១នាក់។ រដ្ឋបាលខេត្តកំពុងស្រាវជ្រាវ រកអ្នកពាក់ព័ន្ធបន្ត និងអំពាវនាវដល់បងប្អូនដែលបានប៉ះពាល់ជាមួយបុគ្គលខាងលើ ដាក់ខ្លួនឯងអោយនៅដាច់ដោយឡែករយៈពេល១៤ថ្ងៃ។
ស្វាយរៀង៖ ៣៣នាក់ទៀតវិជ្ជមាន ភាគច្រើនជាកម្មកររោងចក្រ
ខេត្តស្វាយរៀងរកឃើញមនុស្ស៣៣នាក់បន្ថែមមានវិជ្ជមានកូវីដ-១៩ ដែលភាគច្រើនជាកម្មកររោងចក្រ អ្នកលក់ដូរ និងក្រុមគ្រួសាររបស់ពួកគេ។ បើតាមរដ្ឋបាលខេត្តស្វាយរៀង អ្នកជំងឺ២៦នាក់បានបញ្ជូនទៅព្យាបាលនៅមណ្ឌលព្យាបាលជំងឺកូវីដ-១៩ក្រុងបាវិត,មនុស្ស៤នាក់បានបញ្ជូនទៅព្យាបាលនៅមន្ទីរពេទ្យបង្អែកសាមគ្គីរំដួល និង៣នាក់បញ្ជូនទៅព្យាបាលនៅមន្ទីរពេទ្យបង្អែកស្វាយជ្រំ។ បច្ចុប្បន្នខេត្តស្វាយរៀង មានជំងឺកូវីដ-១៩ សរុប៩៦៣នាក់ អ្នកជាសះស្បើយមានចំនួន ៤៧៩នាក់ ខណៈអ្នកស្លាប់មានចំនួន៦នាក់។
កំពង់ចាម៖ វិជ្ជមានថ្មី២៧នាក់ ភាគច្រើនជាកម្មកររោងចក្រ
មនុស្សចំនួន ២៧នាក់ទៀត តេស្តឃើញកូវីដ-១៩ នៅថ្ងៃទី៤ មិថុនា ដែលភាគច្រើនជាកម្មកររោងចក្រ និងអ្នកដែលបានប៉ះពាល់អ្នកវិជ្ជមានកូវីដ-១៩កន្លងមក។ បើតាមការប្រកាសរបស់រដ្ឋបាលខេត្តកំពង់ចាម អ្នកទាំងនោះមានអាសយដ្ឋាន នៅស្រុកជើងព្រៃ៨នាក់,ស្រុកស្រីសន្ធរ៦នាក់,ស្រុកកំពង់សៀម៦នាក់,ស្រុកព្រៃឈរ៣នាក់,ស្រុកស្ទឹងត្រង់២នាក់,ស្រុកចំការលើ១នាក់ និងមកពីខេត្តត្បូងឃ្មុំ១នាក់។
មន្ទីរសុខាភិបាលខេត្តបានបញ្ជូនអ្នកជំងឺទាំង២៧នាក់ ទៅសម្រាកព្យាបាលនៅមន្ទីរពេទ្យមេគង្គកំពង់ចាម និងកន្លែងព្យាបាលកម្រិតស្រាល នៅវិទ្យាល័យព្រះសីហនុ។ បច្ចុប្បន្នរដ្ឋបាលខេត្តកំពុងស្រាវជ្រាវបន្ត រកអ្នកពាក់ព័ន្ធបន្ថែមទៀត។
កំពង់ឆ្នាំង៖ ១៩នាក់បន្ថែម ភាគច្រើនជាកម្មកររោងចក្រ
រដ្ឋបាលខេត្តកំពង់ឆ្នាំងចេញរបាយការណ៍រួមចាប់ពីថ្ងៃទី២-៤មិថុនា បានរកឃើញមនុស្ស១៩នាក់ថ្មីទៀត វិជ្ជមានកូវីដ-១៩ ដែលភាគច្រើនជាកម្មកររោងចក្រ និង២នាក់ផ្សេងទៀត ជាពលករមកពីប្រទេសថៃ។ បើតាមការប្រកាសរបស់រដ្ឋបាលខេត្ត មនុស្សទាំង១៩នាក់ខាងលើ មានអាសយដ្ឋាននៅស្រុកសាមគ្គីមានជ័យ១២នាក់,ស្រុកកំពង់ត្រឡាច៦នាក់ និងស្រុកបរិបូរណ៍១នាក់។ បច្ចុប្បន្ន កំពង់ឆ្នាំងមានអ្នកជំងឺសរុប ២៨៧នាក់ អ្នកជាសះស្បើយ២១នាក់ អ្នកកំពុងសម្រាកព្យាបាល២០១នាក់ ខណៈអ្នកស្លាប់ចំនួន៤នាក់។
កោះកុង៖ ៦នាក់បន្ថែម សុទ្ធសឹងជាអ្នកស្រែអំបិល
នៅថ្ងៃទី៤ មិថុនា ខេត្តកោះកុង បានរកឃើញមនុស្ស៦នាក់ទៀត វិជ្ជមានកូវីដ-១៩។ បើតាមរដ្ឋបាលខេត្តកោះកុង អ្នកទាំង៦នាក់ មានអាសយដ្ឋាននៅស្រុកស្រែអំបិល។ រដ្ឋបាលខេត្ត អំពាវនាវឲ្យអ្នកដែលបានប៉ះពាល់ដោយផ្ទាល់ និងប្រយោល ជាមួយបុគ្គលខាងលើ ប្រញាប់ធ្វើតេសត្តរកមេរោគកូវីដ-១៩ និងដាក់ខ្លួនឯងអោយនៅដាច់ដោយឡែករយៈពេល១៤ថ្ងៃ។
ប៉ៃលិន៖ ៤នាក់ថ្មីវិជ្ជមាន ក្នុងនោះ១នាក់មកពីភ្នំពេញ
មនុស្សចំនួន៤នាក់ បានរកឃើញវិជ្ជមានកូវីដ-១៩ នៅថ្ងៃទី៤ ខែមិថុនា។ ក្នុងនោះមាន៣នាក់ បានប៉ះពាល់អ្នកមានកូវីដ-១៩ និង១នាក់ បានធ្វើដំណើរទៅពីរាជធានីភ្នំពេញ។ បើតាមរដ្ឋបាលខេត្ត មនុស្សទាំង៤នាក់ មានអាសយដ្ឋាននៅក្រុងប៉ៃលិន២នាក់,អ្នកបាត់ដំបង១នាក់ និងអ្នកកំពត១នាក់។ រដ្ឋបាលខេត្តប៉ៃលិន ប្រកាសឲ្យអ្នកដែលបានប៉ះពាល់ដោយផ្ទាល់ និងប្រយោលជាមួយបុគ្គលខាងលើ ប្រញាប់ទៅយកសំណាកធ្វើតេស្តរកមេរោគកូវីដ-១៩ និងតាមដានសុខភាពរបស់ខ្លួនជាប្រចាំ។
ឧត្តរមានជ័យ៖ រកឃើញ ៣នាក់ទៀតទើបមកពីប្រទេសថៃ
មនុស្សចំនួន៣នាក់ ដែលទើបត្រឡប់មកពីប្រទេសថៃ ត្រូវបានរកឃើញមានវិជ្ជមានកូវីដ-១៩។ បើតាមរដ្ឋបាលខេត្តឧត្តរមានជ័យ មនុស្ស៣នាក់ខាងលើ ជាអ្នកខេត្តបាត់ដំបង២នាក់ និងខេត្តសៀមរាប១នាក់។ អ្នកទាំងនោះ បានធ្វើដំណើរពីខេត្តសាមុតប្រាកាន ប្រទេសថៃ និងបានមកដល់កម្ពុជា នៅថ្ងៃទី៤ មិថុនា តាមច្រកព្រំដែនអន្តរជាតិអូរស្មាច់។ បច្ចុប្បន្ន ខេត្តឧត្តរមានជ័យ មានអ្នកឆ្លងកូវីដ-១៩ សរុប៦២នាក់ ដែល៦០នាក់ ជាករណីនាំចូលបរទេស ក្នុងនោះ២២នាក់បានជាសះស្បើយ ខណៈមនុស្ស៤០នាក់ទៀត កំពុងសម្រាកព្យាបាល។
ព្រៃវែង៖វិជ្ជមានថ្មី៥៥នាក់ ភាគច្រើនជាកម្មកររោងចក្រ
មនុស្សចំនួន ៥នាក់ទៀត តេស្តវិជ្ជមានកូវីដ-១៩ នៅថ្ងៃទី៤ មិថុនា ដែលភាគច្រើនជាកម្មករោងចក្រ និងអ្នកដែលធ្លាប់ប៉ះពាល់នឹងអ្នកវិជ្ជមានកន្លងមក រួមទាំងមានអ្នកដែលទើបត្រឡប់ពីរាជធានីភ្នំពេញដែរ។ យោងតាមសេចក្តីប្រកាសព័ត៌មានរបស់រដ្ឋបាលខេត្តព្រៃវែង ក្នុងចំណោមអ្នកវិជ្ជមានទាំងអស់ មាន២៩នាក់ ជាពលរដ្ឋរស់នៅស្រុកព្រះសស្តេច , ១០នាក់ នៅស្រុកបាភ្នំ, ក្រុងព្រៃវែង ស្រុកស្វាយអន្ទរ និងស្រុកពាមរក៍ មាន ៣នាក់រៀងខ្លួន។ ចំណែកស្រុកមេសាង និងស្រុកពាមជរ មាន២នាក់រៀងខ្លួន ខណៈស្រុកពោធិ៍រៀង កំពង់ត្របែក និងស្រុកកំចាយមារ មាន១នាក់រៀងខ្លួន។ បច្ចុប្បន្ន ខេត្តព្រៃវែង មានអ្នកឆ្លងកូវីដ-១៩ សរុប ៦១៣នាក់ ក្នុងនោះសះស្បើយ ២៥៣នាក់ ៦នាក់ស្លាប់ និង៤៥៤នាក់ទៀតកំពុងបន្តព្យាបាល។
បាត់ដំបង៖ មាន ២៦នាក់ទៀត ក្នុងនោះ១០នាក់ជាពលករខ្មែរមកពីប្រទេសថៃ
រដ្ឋបាលខេត្តបានរកឃើញពលរដ្ឋ២៦នាក់ទៀត វិជ្ជមានកូវីដ-១៩ ក្នុងនោះ ១០នាក់ ជាពលករខ្មែរ ដែលត្រឡប់មកពីប្រទេសថៃ។ ជាមួយគ្នានេះ ក៏មានអ្នកជំងឺ ៣នាក់ទៀត ដែលបានជាសះស្បើយ។ តាមសេចក្តីប្រកាសប័ត៌មានរបស់រដ្ឋបាលខេត្តបាត់ដំបង ក្នុងចំណោមអ្នកឆ្លងថ្មីទាំង ២៦នាក់នោះ មាន ១៣នាក់ ជាពលរដ្ឋរស់នៅស្រុកកំរៀង, ៤នាក់នៅស្រុករតនមណ្ឌល, ៤នាក់នៅស្រុកមោងឫស្សី, ២នាក់ នៅស្រុកសង្កែ, ១នាក់នៅស្រុកភ្នំស្រុក។ ចំណែកអ្នកជំងឺ ២នាក់ទៀត ជាពលរដ្ឋនៅសង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។ បច្ចុប្បន្ន ខេត្តបាត់ដំបង មានអ្នកវិជ្ជមានកូវីដ-១៩ សរុប ៣៥២នាក់ ដែលប្រមាណជាពាក់កណ្តាលជាករណីនាំចូលពីប្រទេសថៃ។ ក្នុងចំណោមអ្នកជំងឺដែលរកឃើញមាន ១១៩នាក់ហើយបានជាសះស្បើយ ស្លាប់២នាក់ និងអ្នកជំងឺ២៣១នាក់ទៀត បន្តព្យាបាលនៅមន្ទីរពេទ្យបង្អែកនានាក្នុងខេត្តបាត់ដំបង។
គួរបញ្ជាក់ដែរថា នៅយប់ថ្ងៃទី ៤ ខែមិថុនា ក្រសួងសុខាភិបាល បានប្រកាសពីការរកឃើញប្រភេទវីរុសបំប្លែងថ្មី B.1.617 (ដែលតា) លើអ្នកជំងឺ៣រូប ដែលជាពលករទើបត្រឡប់ពីថៃ តាមច្រកអូរស្មាច់។ ក្នុងចំណោមអ្នកជំងឺនោះ មាន២នាក់កំពុងសម្រាកព្យាបាលនៅពេទ្យបង្អែកឯកភ្នំ និងពេទ្យមោងឫស្សី ខេត្តបាត់ដំបង ខណៈម្នាក់ទៀត ជាអ្នកជំងឺដែលកំពុងសម្រាកព្យាបាលនៅមន្ទីរពេទ្យក្នុងខត្តឧត្តរមានជ័យ។
កំពង់ធំ ៖ មានវិជ្ជមានថ្មី៨នាក់ទៀត ក្នុងនោះ១នាក់បានស្លាប់
រដ្ឋបាលខេត្តកំពង់ធំ បានរកឃើញអ្នកវិជ្ជមានជំងឺកូវីដ-១៩ ចំនួន៨នាក់បន្ថែមទៀត ក្នុងនោះមានអ្នកជំងឺ១នាក់បានស្លាប់។ អ្នកជំងឺដែលស្លាប់ គឺជាស្ត្រីវ័យ ៦៤ឆ្នាំ មានអាសយដ្ឋាននៅភូមិបល្ល័ង្គលិច សង្កាត់ដំរីជាន់ខ្លា ខេត្តកំពង់ធំ។ នេះបើតាមតាមសេចក្តីប្រកាសព័ត៌មានរបស់រដ្ឋបាលខេត្តកំពង់ធំ ដែលបានឱ្យទៀតថា អ្នកជំងឺ ៦នាក់ទៀត មានអាសយដ្ឋានៅភូមិបេង ឃុំបន្ទាយស្ទោង ស្រុកស្ទោង និង១នាក់រស់នៅភូមិបល្ល័ង្គលិច សង្កាត់ដំរីជាន់ខ្លា ខេត្តកំពង់ធំ។ គិតត្រឹមថ្ងៃទី ៤មិថុនា ខេត្តកំពង់ធំ រកឃើញអ្នកវិជ្ជមានកូវីដ-១៩ សរុប២៩០នាក់ ក្នុងនោះ ១២០នាក់ បានជាសះស្បើយ ស្លាប់១នាក់ និងអ្នកជំងឺ ១៦៩នាក់ទៀត កំពុងសម្រាកព្យាបាល។
សៀមរាប៖ មានករណីថ្មី៥នាក់ និងសះស្បើយ១២នាក់
រដ្ឋបាលខេត្តសៀមរាប បន្តរកឃើញមនុស្ស៥នាក់ទៀត វិជ្ជមានកូវីដ-១៩ ក្នុងនោះ២នាក់ជាអ្នកទើបត្រឡប់ពីរាជធានីភ្នំពេញ។ តាមសេចក្តីប្រកាសព័ត៌មានរបស់រដ្ឋបាលខេត្តសៀមរាប ក្នុងចំណោមអ្នកទាំង៥នាក់នេះ មាន៣នាក់ មានអាសយដ្ឋាននៅភូមិត្របែក ឃុំដំដែក ស្រុកសូទ្រនិគម, និង២នាក់ទៀតមានអាសយដ្ឋាននៅភូមិស្រះស្រង់ សង្កាត់នគរធំ ក្រុងសៀមរាប។ ទន្ទឹមនឹងនេះ នៅថ្ងទី៤ មិថុនា ក៏មានអ្នកជំងឺចំនួន ១២នាក់ បានជាសះស្បើយផងដែរ។ បច្ចុប្បន្ន ខេត្តសៀមរាប មានអ្នកវិជ្ជមានជំងឺកូវីដ-១៩ ចំនួន១៣៦នាក់ ក្នុងនោះ ៨០នាក់ជាសះស្បើយ ២នាក់ស្លាប់ និង៥៤នាក់ កំពុងព្យាបាលនៅមន្ទីរពេទ្យបង្អែកខេត្តសៀមរាប។
ករណីសរុបទូទាំងប្រទេស
គិតមកដល់ពេលនេះ មានអ្នកឆ្លងកូវីដ-១៩សរុប ៣៣,៦១៣នាក់ អ្នកជាសះស្បើយចំនួន ២៦,០៧៨នាក់ ខណៈអ្នកស្លាប់កើនដល់ ២៥២នាក់។ បើតាមរបាយការណ៍របស់ក្រសួងសុខាភិបាល នៅថ្ងៃទី៥ ខែមិថុនា៕
© រក្សាសិទ្ធិដោយ thmeythmey.com
