អន្តរជាតិ
ប្រមុខយោធាមីយ៉ាន់ម៉ាប្រាប់ប្រេសិតអាស៊ាន៖ ការបោះឆ្នោតធ្វើឡើងពេលស្ថានការណ៍ប្រក្រតី 05, Jun 2021 , 10:29 pm
ប្រមុខរបបយោធាមីយ៉ាន់ម៉ា ឧត្តមសេនីយ៍ មីន អ៊ុងឡាំង ជួបលោក Erywan Pehin Yusof រដ្ឋមន្រ្តីទីពីរក្រសួងការបរទេសព្រុយណេ។ រូបថត AFP
× ការបោះឆ្នោតថ្មីនៅមីយ៉ាន់ម៉ាដែលរៀបចំដោយយោធា ទំនងជាអាចកើតឡើងនៅពេលខ្លីខាងមុខឡើយ។ ប្រមុខរបបយោធាមីយ៉ាន់ម៉ា ឧត្តមសេនីយ៍ មីន អ៊ុងឡាំង ប្រាប់ប្រតិភូអាស៊ាននៅថ្ងៃទី៤ ខែមិថុនា ថា ការបោះឆ្នោត នឹងធ្វើឡើងនៅពេលស្ថានការណ៍វិលទៅរកភាពប្រក្រតីប៉ុណ្ណោះ។ លោក ក៏សារភាពថា របបសឹករបស់លោក នៅមិនទាន់អាចគ្រប់គ្រងសភាពការណ៍ក្នុងប្រទេសបានគ្រប់ជ្រុងជ្រោយនៅឡើយ។
មេដឹកនាំរបបសឹកមីយ៉ាន់ម៉ា ឧត្តមសេនីយ៍ មីន អ៊ុងឡាំង បានជួបជាមួយបេសកកម្មមួយក្រុមរបស់អាស៊ានដែលដឹកនាំដោយប្រមុខការទូតព្រុយណេ Erywan Pehin Yusof និងអគ្គលេខាធិការអាស៊ាន លោក Lim Jock Hoi ។ នេះបើតាមសេចក្ដីប្រកាសរបស់ក្រុមការងារព័ត៌មានរបស់រដ្ឋាភិបាលសឹកមីយ៉ាន់ម៉ា។
បើតាមសេចក្ដីប្រកាសព័ត៌មាន ភាគីទាំងពីរ បានជជែកពីលទ្ធផលជំនួបមេដឹកនាំអាស៊ានលើបញ្ហាមីយ៉ាន់ម៉ានៅទីក្រុងហ្សាការតា ការអនុវត្តអនុសាសន៍របស់អាស៊ាន ក៏ដូចជាបញ្ហាវ៉ាក់សាំងផងដែរ។ ទាក់ទងស្ថានការណ៍នយោបាយវិញ លោក មីន អ៊ុងឡាំង ប្រាប់មន្ត្រីព្រុយណេ និងអាស៊ានថា ការបោះឆ្នោតនឹងធ្វើឡើងនៅពេលស្ថានការណ៍មីយ៉ាន់ម៉ា វិលត្រឡប់ទៅរកសភាពដើមវិញ។ ប្រមុខកងទ័ពមីយ៉ាន់ម៉ា មិនបានបញ្ជាក់លម្អិតពីរឿងនេះឡើយ។
កន្លងមក របបសឹកមីយ៉ាន់ម៉ាធ្លាប់ប្រកាសថា ការបោះឆ្នោតនឹងធ្វើឡើងអំឡុងពេលពីរឆ្នាំ។ ប៉ុន្តែក្រុមប្រឆាំងទាមទារឱ្យយោធាទទួលស្គាល់លទ្ធផលបោះឆ្នោតឆ្នាំ២០២០ ហើយប្រគល់អំណាចឱ្យរដ្ឋាភិបាលស៊ីវិលវិញ។
កាលពីជំនួបនៅអគ្គលេខាធិការដ្ឋានអាស៊ាន មេដឹកនាំអាស៊ានបានឯកភាពគ្នាលើចំណុច៥ ដើម្បីឈានទៅបញ្ចប់វិបត្តិនយោបាយក្នុងប្រទេសសមាជិកមួយនេះ។ ប៉ុន្តែរបបយោធាមីយ៉ាន់ម៉ា ហាក់មិនធ្វើតាមឡើយដូចជាការបញ្ឈប់អំពើហិង្សាជាបន្ទាន់ និងដំណើរទស្សនកិច្ចរបស់បេសកជនអាស៊ានជាដើម។ ក្នុងកិច្ចសម្ភាសជាមួយទូរទស្សន៍ហុងកុងកន្លងមក លោក មីន អ៊ុងឡាំង និយាយថា មីយ៉ាន់ម៉ាមិនទាន់អាចអនុវត្តតាមផែនការអាស៊ានឡើយ។
មកទល់ពេលនេះ អាស៊ាន ក៏មិនទាន់តែងតាំងបេសកជនពិសេសដែរ។ គេក៏មិនច្បាស់ថា ទស្សនកិច្ចលោក Yusof និងលោក Lim ដែលជួបមេដឹកនាំមីយ៉ាន់ម៉ាពេលនេះ ធ្វើឡើងក្នុងនាមជាបេសកជនពិសេសឬយ៉ាងណាឡើយ។
ក្រុមប្រឆាំងឯណោះវិញ ហាក់បោះបង់ក្ដីសង្ឃឹមលើអាស៊ានក្នុងការដើរតួនាទីសម្របសម្រួល។ អនុរដ្ឋមន្រ្តីការបរទេសនៃរដ្ឋាភិបាលស្រមោល លោក Moe Zaw Oo អះអាងថា រដ្ឋាភិបាលរួបរួមជាតិ មានទំនុកចិត្តតិចតួចលើអាស៊ាន៕
© រក្សាសិទ្ធិដោយ thmeythmey.com