COVID-19
ជាតិ
កូវីដ-១៩៖ សៀមរាបមាន២៣នាក់ ដោយ១១នាក់ជាអធិការ អធិការរង និងមន្ត្រីនគរបាលស្រុកសូទ្រនិគម 06, Jun 2021 , 9:48 am
មន្ត្រីសុខាភិបាល កំពុងយកសំណាកអ្នកពាក់ព័ន្ធនៅអធិការដ្ឋាននគរបាលស្រុកសូត្រនិគម។ រូបភាពពីហ្វេសប៊ុក Lim Bunsam
× មនុស្ស២៣នាក់ទៀត មានតេស្តវិជ្ជមានកូវីដ-១៩ នៅខេត្តសៀមរាប នៅថ្ងៃទី៥ មិថុនា ក្នុងនោះមាន១១នាក់ ជាមន្ត្រីនគរបាលស្រុកសូទ្រនិគម។ នេះបើតាមសេចក្តីប្រកាសព័ត៌មានរបស់រដ្ឋបាលខេត្តសៀមរាប។
សេចក្តីប្រកាសព័ត៌មានដដែលបញ្ជាក់ថា លោក ទេព ចាន់ណា អធិការ នៃអធិការដ្ឋាននគរបាលស្រុកសូទ្រនិគម និងអធិការរងស្រុកចំនួន ៣នាក់ បានឆ្លងកូវីដ-១៩។ ក្រៅពីអធិការ និងអធិការង នាយក និងនាយករងផ្នែក នៃអធិការដ្ឋាននគរបាលស្រុកសូទ្រនិគម ៥នាក់ ក៏មានតេស្តវិជ្ជមានកូវីដ-១៩ ដែរ ខណៈនាយរងប៉ុស្តិ៍ និងមន្ត្រីប៉ុស្តិ៍នគរបាលនៃឃុំកំពង់ឃ្លាំង ស្រុកសូទ្រនិគម ២នាក់ ក៏បានឆ្លងដែរ។
អ្នកវិជ្ជមានកូវីដ-១៩ ផ្សេងទៀត គឺជាស្ត្រីមេផ្ទះ, ជាងអ៊ុតសក់ អ្នកលក់ដូរ និងអ្នកដំណើរពីខេត្តកណ្តាល។ សេចក្តីប្រកាសព័ត៌មានដដែលបញ្ជាក់ដូច្នេះ និងឱ្យដឹងទៀតថា ក្នុងចំណោមអ្នកឆ្លងថ្មីទាំង ២៣នាក់ មាន១៨នាក់ ជាអ្នករស់នៅក្នុងស្រុកសូត្រនិគម, ៣នាក់ នៅស្រុកជីក្រែង និង២នាក់នៅក្រុងសៀមរាប។
បច្ចុប្បន្នខេត្តសៀមរាប មានអ្នកឆ្លងកូវីដ-១៩ សរុប១៥៩នាក់ អ្នកជាសះស្បើយ៨០នាក់។ ចំណែកឯ អ្នកកំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាបមាន៧៧នាក់ ខណៈអ្នកស្លាប់មាន២នាក់។ នេះបើតាមរដ្ឋបាលខេត្តសៀមរាប៕
© រក្សាសិទ្ធិដោយ thmeythmey.com