ការយកពន្ធរួមគ្នាលើក្រុមហ៊ុនអន្តរជាតិធំៗ ជារបៀបវារៈមួយក្នុងកិច្ចប្រជុំថ្នាក់រដ្ឋមន្ត្រីហិរញ្ញវត្ថុរបស់ក្រុមប្រទេសមានសេដ្ឋកិច្ចរីកចម្រើនទាំង៧ (G7) ។ កិច្ចប្រជុំពីរថ្ងៃនេះ ជាជំនួបទល់មុខលើកដំបូងក្រោយការផ្ទុះជំងឺកូវីដ-១៩ មក។ អង់គ្លេស ដែលជាប្រធានឆ្លាស់វេនរបស់ G7 ដឹកនាំកិច្ចប្រជុំនេះ។

 

ក្នុងសេចក្ដីថ្លែងការណ៍ក្រោយកិច្ចប្រជុំ រដ្ឋមន្រ្តី G7 មកពីបារាំង អង់គ្លេស អាល្លឺម៉ង់ ជប៉ុន កាណាដា អ៊ីតាលី និងអាមេរិក បានប្ដេជ្ញាចិត្តអនុវត្តការយកពន្ធរួមជាសាកលលើក្រុមហ៊ុនពហុជាតិយ៉ាងតិច១៥ភាគរយ ដោយអត្រានេះអាចប្រែប្រួលតាមប្រទេស។ ការឯកភាពរបស់ G7 នឹងបើកផ្លូវដល់ការចរចាស៊ីជម្រៅដើម្បីសម្រេចឱ្យបានកិច្ចព្រមព្រៀងអន្តជាតិមួយលើការយកពន្ធរួមគ្នានេះនាកិច្ចប្រជុំប្រទេសរីកចម្រើនទាំង២០ (G20) នៅខែកក្កដាខាងមុខ។

 

Facebook, Google និង Amazon សុទ្ធសឹងជាគោលដៅរបស់គម្រោងយកពន្ធរួមគ្នាជាសាកលនេះ។ កន្លងទៅ ក្រុមហ៊ុនទាំងនេះ ដែលរកចំណូលបានរាប់រយលានដុល្លារក្នុងមួយៗឆ្នាំ អាចកេងចំណេញពីការមិនបង់ពន្ធ ឬបង់ពន្ធទាប ដោយដាក់ទីស្នាក់ការប្រតិបត្តិការរបស់ពួកគេនៅប្រទេសដែលអនុគ្រោះដល់ការយកពន្ធ ឬមានអត្រាពន្ធទាប ទោះបើជាពួកគេរកស៊ីនៅប្រទេសផ្សេងក្ដី។ 

 

បារាំង និងអាមេរិក ជាប្រទេសចេញមុខខ្លាំងជាងគេលើការជំរុញយកពន្ធលើក្រុមហ៊ុនអន្តរជាតិទាំងនេះ។ គម្រោងនេះ ទទួលបានភ្លើងបៃតងពីប្រធានាធិបតីអាមេរិក ចូ បៃឌិន ផ្ទាល់ ដោយចង់កំណត់អត្រាពន្ធទាបបំផុត១៥ភាគរយ។ 

 

រដ្ឋមន្រ្តីរតនាគារអាមេរិក Yanet Allen និយាយថា គម្រោងយកពន្ធអប្បរមា១៥ភាគរយនេះ ជាការបញ្ចប់យុទ្ធនាការយកពន្ធលើក្រុមហ៊ុន។ ចំណែករដ្ឋមន្ត្រីហិរញ្ញវត្ថុអង់គ្លេស Rishi Sunak ដែលដឹកនាំកិច្ចប្រជុំនេះ អះអាងថា ការព្រមព្រៀងរបស់ G7 នឹងជួយធ្វើឱ្យប្រសើរឡើងប្រព័ន្ធពិភពលោកក្នុងយុគសម័យឌីជីថល៕