លោក ឈ្នាង សុវុត្ថា បញ្ជាក់ដូច្នេះ៖ «នេះគឺជាករណីដំបូងនៅខេត្តយើង(ក្រចេះ)»។ ប្រធានមន្ទីរសុខាភិបាលខេត្តក្រចេះ បានឱ្យដឹងទៀតថា មកទល់ពេលនេះខេត្តក្រចេះ បានរកឃើញករណីឆ្លងសរុប ១៤នាក់ ក្នុងនោះ ៧នាក់បានជាសះស្បើយ និង៦នាក់ទៀតកំពុងបន្តព្យាបាល និងមាន១នាក់បានស្លាប់ដែលជាករណីដំបូងនៅក្នុងខេត្តនេះ។ 

 

បើតាមរដ្ឋបាលខេត្តក្រចេះ ស្ត្រីរូបនេះ បានចូលសម្រាកព្យាបាលនៅមន្ទីរពេទ្យ នៅម៉ោង ៣រសៀល ថ្ងៃទី ៤មិថុនា ជាមួយនឹងអាការឈឺដើមទ្រូងខ្លាំង និងពិបាកដកដង្ហើម។ ដោយមានការសង្ស័យ គ្រូពេទ្យ បានយកសំណាកធ្វើតេស្តរហស័យ ហើយបានរកឃើញថា គាត់មានវិជ្ជមានកូវីដ-១៩។ នេះបើតាមសេចក្តីជូនដំណឹងដដែល ដោយបានបន្តថា ស្ថានភាពរបស់អ្នកជំងឺមានសភាពធ្ងន់ ដោយសារមានវិបត្តិផ្លូវដង្ហើមធ្ងន់ធ្ងរស្រួចស្រាវ មិនអាចសង្គ្រោះបាន។ ក្រុមគ្រូពេទ្យសន្និដ្ឋានថា អ្នកជំងឺ បានបាត់បង់ជីវិត ដោយសារវិបត្តិផ្លូវដង្ហើមធ្ងន់ធ្ងរស្រួចស្រាវបណ្តាលមកពីជំងឺកូវីដ-១៩។

៕