សង្គមអន្តរជាតិ
អន្តរជាតិ
ទង្វើល្អ! ឆ្នោតរង្វាន់១លានដុល្លារ យុវជនម្នាក់រើសបាន ហើយតាមរកម្ចាស់ដើមដើម្បីឲ្យសន្លឹកឆ្នោត
06, Jun 2021 , 2:19 pm
×![]()
ដោយ: ធីតា
កូនប្រុសរបស់ម្ចាស់ហាងមួយនៅរដ្ឋ Massachusetts សហរដ្ឋអាមេរិក បានប្រទះឃើញឆ្នោតមួយសន្លឹកដែលមិនទាន់កោសសព្វគ្រប់។ ក្រោយការផ្ទៀងផ្ទាត់ នោះជាសន្លឹកឆ្នោតដែលត្រូវរង្វាន់១លានដុល្លារអាមេរិក។ តាមការផ្សាយរបស់ AP យុវជននោះ ប្តូរចិត្តភ្លាមពីគម្រោងរក្សាសន្លឹកឆ្នោតសម្រាប់គ្រួសារទៅជាប្រឹងស្វែងរកម្ចាស់សន្លឹកឆ្នោត។
ករណីនេះ បានកើតឡើងតាំងពីខែមីនា មកម្ល៉េះ។ ស្ត្រីឈ្មោះ Lea Rose Fiega បានអះអាងថា គាត់បានចូលក្នុងហាងដើម្បីទិញឆ្នោតកោស «Diamond Millions»។ ដោយសារតែពេលនោះ គាត់ស្ថិតក្នុងស្ថានភាពបន្ទាន់ពេក ក៏បានកោសយ៉ាងប្រញាប់ប្រញាល់។
«បន្ទាន់ពេក ខ្ញុំបានកោសយ៉ាងលឿន ហើយគិតថា វាជាសន្លឹតឆ្នោតមិនត្រូវរង្វាន់ ខ្ញុំក៏បោះវាចូលតែម្តងទៅ»។ នេះជាការរៀបរាប់របស់ម្ចាស់សន្លឹកឆ្នោតដែលត្រូវបានដកស្រង់ដោយសារព័ត៌មាន Ouest-France។
ជាង១០ថ្ងៃក្រោយម្ចាស់ យុវជនឈ្មោះ Abhi Shah ដែលជាកូនប្រុសម្ចាស់ហាង បានប្រទះឃើញសន្លឹកឆ្នោតនៅក្នុងធុងសំរាម ហើយយកវាទៅកោសបង្ហើយ ទើបដឹងថា ជាសន្លឹកដែលត្រូវរង្វាន់១លានដុល្លារអាមេរិក។
«ភ្លាមៗ ខ្ញុំគិតថា នឹងមានប្រាក់១លានដុល្លារក្នុងដៃ។ ប៉ុន្តែក្រោយមក ខ្ញុំយល់ថា ធ្វើអំពើល្អវិញទើបជារឿងត្រឹមត្រូវ។ នេះជាការលើកឡើងរបស់យុវជនអាយុជាង៣០ឆ្នាំ ដោយសម្រេចចិត្តតាមរកអតិថិជនដែលបានទិញឆ្នោតនៅហាងរបស់ខ្លួន។
ទីបំផុត Abhi Shah បានរកឃើញ Lea Rose Fiega នៅកន្លែងធ្វើការ ហើយឪពុកម្តាយគេបានអះអាងថា ស្ត្រីរូបនោះ ពិតជាបានទៅទិញឆ្នោតនៅហាងរបស់ខ្លួនពិតប្រាកដមែន។
ក្រោយទទួលបាន១លានដុល្លារ Fiega ក៏បានបែងចែកប្រាក់រង្វាន់នេះទៅគ្រួសាររបស់ Shah ផងដែរ។ ព្រមជាមួយគ្នា ម្ចាស់ហាងទទួលបានប្រាក់លើកចិត្ត១០០០០ដុល្លារបន្ថែមទៀតពីក្រុមហ៊ុនឆ្នោតរដ្ឋ Massachuetts៕
Tag:
ឆ្នោត
© រក្សាសិទ្ធិដោយ thmeythmey.com
