«យើងតាមដានការវិវត្តនៅមីយ៉ាន់ម៉ាយ៉ាងជិតដិតជាមួយក្ដីបារម្ភ ពិសេសអំពើហិង្សានៅផ្នែកជាច្រើន។» លោក Tanee Sangrat អ្នកនាំពាក្យក្រសួងការបរទេសថៃលើកឡើងបែបនេះក្នុងសេចក្ដីថ្លែងការណ៍ថ្ងៃទី៦ ខែមិថុនា។ ថៃស្នើឱ្យបញ្ចប់ជាបន្ទាន់អំពើហិង្សានៅមីយ៉ាន់ម៉ា ដោះលែងអ្នកជាប់ឃុំទាំងអស់ ហើយស្នើឱ្យមានការអនុវត្តជាក់លាក់អនុសាសន៍៥ចំណុចឱ្យបានលឿនតាមតែអាចធ្វើបាន។

 

ក្រោយរដ្ឋប្រហារខែកុម្ភៈមក ការតវ៉ាប្រឆាំងរបបយោធា បានកើតឡើងស្ទើរមិនលស់ថ្ងៃ ហើយក៏ឈានដល់អំពើហិង្សាទៀតផង ដោយកម្លាំងសន្តិសុខប្រើធម៌ក្ដៅលើអ្នកតវ៉ា។ ស្ថានភាពនៅមីយ៉ាន់ម៉ា ឈានដល់ដំណាក់មួយទៀត ក្រោយការបង្កើតកម្លាំងការពារប្រជាជនពីសំណាក់រដ្ឋាភិបាលស្រមោល ដែលរុញឱ្យមានអំពើហិង្សាប្រដាប់អាវុធនៅតំបន់នានា។ ក្រុមប្រដាប់អាវុធជនជាតិភាគតិចមួយចំនួន ក៏គាំទ្រកម្លាំងទើបបង្កើតថ្មី ប្រឆាំងយោធាផងដែរ។ 

 

កន្លងមក ការបាញ់តទល់រវាងកម្លាំងរដ្ឋាភិបាល និងកម្លាំងរបស់ក្រុមជនជាតិភាគតិចការ៉េន ក៏រាលដាលដល់ព្រំដែនថៃ និងមីយ៉ាន់ម៉ា។ ថៃ ជាអ្នកជិតខាងមីយ៉ាន់ម៉ាមានព្រំដែនជាប់គ្នាវែងជាងគេ។ អំពើហិង្សាទ្រង់ទ្រាយធំណាមួយនៅមីយ៉ាន់ម៉ា នឹងក្លាយជារឿងឈឺក្បាលសម្រាប់ថៃ ពិសេសលំហូរជនភៀសខ្លួនតែម្ដង។ សូម្បីក្នុងស្ថានភាពបច្ចុប្បន្ន ប្រជាជនមីយ៉ាន់ម៉ា ចាប់ផ្ដើមភៀសខ្លួនចូលទឹកដីបណ្ដើរៗទៅហើយដែរ។

 

បើតាមលោក Sangrat រដ្ឋាភិបាល បានធ្វើការងារជាច្រើនដើម្បីបញ្ចប់ជម្លោះនៅមីយ៉ាន់ម៉ា តែមិនធ្វើជាសាធារណឡើយ។ លោកបន្តថា រដ្ឋាភិបាលថៃអនុវត្តតាមគោលនយោបាយស្ងៀមស្ងាត់មិនឈូរឆររវាងអ្នកជិតខាង ព្រោះមានប្រសិទ្ធភាព និងស្របតាមជំហរជាប្រពៃណីរបស់ថៃផង៕