កីឡាអន្តរជាតិ
អន្តរជាតិ
Floyd បានត្រឹមស្មើជាមួយតារា Youtube កីឡាករ Logan ក្រោយវាយគ្នា៨ទឹក 07, Jun 2021 , 11:01 am
× Floyd Mayweather អតីតស្តេចប្រដាល់សកលពិភពលោក បានត្រឹមស្មើគ្នាជាមួយតារា Youtube កីឡាករ Logan Paul ក្រោយវាយគ្នា៨ទឹកនៅលើសង្វៀនពិព័រណ៍នៅទឹកដីអាមេរិក នាព្រឹកថ្ងៃទី៧ ខែមិថុនា។
មិនមានការប្រកាសលទ្ធផលឈ្នះចាញ់ពីសំណាក់ចៅក្រមក្នុងជំនួបរវាង Floyd និង Logan ឡើយ។ ប៉ុន្តែយ៉ាងណា អ្នកទាំងពីរសុទ្ធតែអះអាងពីជ័យជម្នះរៀងៗខ្លួន ក្រោយវាយគ្នា៨ទឹកលើសង្វៀនសប្បុរសធម៌នាកីឡដ្ឋាន Hard Rock ក្នុងក្រុង Miami រដ្ឋ Florida សហរដ្ឋអាមេរិក។
Floyd វ័យ៤៤ឆ្នាំ ដែលជាកំពូលអ្នកប្រដាល់មិនស្គាល់ចាញ់សញ្ជាតិអាមេរិក បានបញ្ចប់អាជីពក្រោយការប្រកួតលើកទី ៥០ របស់ខ្លួនកាលពីឆ្នាំ ២០១៧ ដោយផ្តួលអ្នកប្រដាល់គុនចម្រុះ Conor McGregor ឱ្យសន្លប់។ នៅឆ្នាំ២០២១នេះ អ្នកប្រដាល់មានទ្រព្យច្រើនជាងគេ បានបង្ហាញថ្វីដៃជាថ្មីជាមួយ Youtuber ដ៏ល្បីល្បាញរបស់អាមេរិក។
Logan Paul វ័យ២៦ឆ្នាំ ដែលមានអ្នកចុច subscribe ក្នុងគណនី Youtube រហូតដល់ទៅជិត២៣លាននាក់ បានបង្កើតប្រវត្តិសាស្ត្រថ្មីរបស់ខ្លួន ដោយប្រកួតស្មើជាមួយអតីតម្ចាស់ខ្សែក្រវាត់ពិភពលោក ៥ ស្ថាប័ន។ Logan ធ្លាប់មានប្រវត្តិប្រកួតម្ដងរួចមកហើយ កាលពីខែវិច្ឆិកា ឆ្នាំ២០១៩ ដោយចាញ់កីឡាករ KSI ដែលជាមិត្តរួមអាជីព Youtuber ដូចគ្នា៕
© រក្សាសិទ្ធិដោយ thmeythmey.com