Visin កើតនៅអេត្យូពី ប៉ុន្តែបានផ្លាស់ទៅរស់នៅឯអ៊ីតាលី និងធ្លាប់លេងឱ្យក្រុមថ្នាលរបស់ AC Milan និង Benevento។ ទោះជាយ៉ាងណា យុវជនរូបនេះបានសម្រេចចិត្តបោះបង់អាជីពបាល់ទាត់ ដោយផ្តោតលើការសិក្សាកាលពីឆ្នាំ ២០១៦ ប៉ុន្តែបន្តលេងឱ្យក្រុមហ្វូតសាល Atletico Vitalica។
 

ក្លិប Atletico Vitalica បានប្រកាសពីមរណភាពដ៏គួរឱ្យសោកសៅរបស់ Visin ក្រោយរូបគេបានធ្វើអត្តឃាតនៅផ្ទះរបស់ខ្លួន។ នេះបើតាមការផ្សាយរបស់កាសែតអ៊ីតាលី Corriere ដែលបញ្ជាក់ថាមូលហេតុនៃការស្លាប់ បណ្តាលមកពីយុវជនវ័យ២០ឆ្នាំរូបនេះរងទុក្ខក្នុងជីវិតដោយសារការរើសអើងជាតិសាសន៍មកលើខ្លួន។
 

Visin បានសរសេរសំបុត្រមុនរូបគេស្លាប់ ហើយសំបុត្រត្រូវបានបង្ហាញអំឡុងពេលពិធីបុណ្យសពរបស់គេដែលធ្វើឡើងនៅថ្ងៃទី៥ ខែមិថុនា ឆ្នាំ២០២១។ នៅក្នុងលិខិតនោះ អតីតយុវជនក្រុម AC Milan រូបនេះ រៀបរាប់ពីការទទួលរងសម្ពាធជុំវិញខ្លួន តាមរយៈការរើសអើងដែលរូបគេចាត់ទុកជាទង្វើគួរឱ្យស្អប់ខ្ពើម និងគួរឱ្យខ្លាច។
 

សមាជិកក្រុម AC Milan មួយចំនួនដែលរួមមានអ្នកចាំទី Gianluigi Donnarumma ផងបានបង្ហាញការសោកស្តាយចំពោះដំណឹងដ៏សោកសៅនេះ។ អ្នកចាំទីក្រុមជម្រើសជាតិអ៊ីតាលី វ័យ២២ឆ្នាំរូបនេះ ប្រាប់កាសែត ANSA ថា៖«ខ្ញុំធ្លាប់រស់នៅជាមួយ Visin កាលនៅ AC Milan ជាមួយគ្នា។ ខ្ញុំមិនអាចភ្លេចស្នាមញញឹមរបស់គាត់ទេ។ មិនគួរឱ្យជឿដែលរឿងនេះកើតឡើង»៕