និស្សិត២នាក់ ដែលមកបំពេញកម្មសិក្សានៅសារព័ត៌មានថ្មីៗនោះ មានកញ្ញា ស៊ូ សុគន្ធា និងលោក  អ៊ុន វឌ្ឍនា។ បច្ចុប្បន្នអ្នកទាំង២ ជានិស្សិតឆ្នាំទី២ ដែលកំពុងសិក្សាលើជំនាញសារព័ត៌មាន នៅដេប៉ាតឺម៉ង់ប្រពន្ធ័ផ្សព្វផ្សាយ និងសារគមនាគមន៍។ 

 

លោក  អ៊ុង ប៊ុនអ៊ី ប្រធានដេប៉ាតឺម៉ង់ប្រពន្ធ័ផ្សព្វផ្សាយ និងសារគមនាគមន៍ បានលើកឡើងថា កម្មវិធីបណ្តុះបណ្តាលអ្នកសារព័ត៌មានវ័យក្មេងនេះ ធ្វើឡើងក្នុងគោលបំណងផ្តល់ឱកាសដល់និស្សិតនៅDMC ឱ្យឈ្វេងយល់បានកាន់តែស៊ីជម្រៅក្នុងវិស័យសារព័ត៌មាន តាមរយៈការចុះអនុវត្តការងារដោយផ្ទាល់ជាអ្នកសារព័ត៌មាននៅតាមបណ្តាស្ថាប័នព័ត៌មានដែលមានវិជ្ជាជីវៈនៅក្នុងស្រុក។ កម្មវិធីនេះ អនុវត្តឡើងក្រោមកិច្ចសហការរវាងដេប៉ាតឺម៉ង់ប្រពន្ធ័ផ្សព្វផ្សាយ និងសារគមនាគមន៍និងមូនិធិខុនរ៉ាដអាឌិនណៅអ៊ែរ (KAS)។

 

បើតាម លោក ប៊ុនអ៊ី  ការចុះអនុវត្តការងាររបស់សិស្សDMCនេះ គឺដើម្បីបន្ថែមពីលើការសិក្សាមុខជំនាញសរសេរនិងរាយការណ៍ព័ត៌មាននៅក្នុងថ្នាក់ ខណៈនិស្សិតទាំងនោះ ធ្លាប់មានបទពិសោធន៍សរសេរមួយចំនួន តាមរយៈគម្រោងនានា ដែលគ្រូបានដាក់ឱ្យអនុវត្ត ឬការហាត់ការកន្លងមក។  

  

ប្រធានដេប៉ាតឺម៉ង់ប្រពន្ធ័ផ្សព្វផ្សាយ និងសារគមនាគមន៍រូបនេះ បាននិយាយដូច្នេះ៖« ពួកយើងក៏ចង់បណ្តុះគំនិតឱ្យពួកគាត់ឱ្យងាកចាប់យកអាជីពជាអ្នកសារព័ត៌មានជំនាញឱ្យបានច្រើន បន្ទាប់ពីបញ្ចប់ការសិក្សានៅDMC ដោយហេតុថា ប្រទេសកម្ពុជានៅមានតម្រូវការអ្នកសារព័ត៌មានដែលមានវិជ្ជាជីវៈច្រើនទៀត»។  

 

សម្រាប់កម្មវិធីនេះ ដេប៉ាតឺម៉ង់ប្រពន្ធ័ផ្សព្វផ្សាយ និងសារគមនាគមន៍ បានបញ្ជូននិស្សិតចំនួន៧នាក់ ទៅធ្វើការងារក្នុងរយៈពេល៦ខែ នៅតាមស្ថាប័នសារព័ត៌មានក្នុងស្រុកនានា។ ក្នុងនោះមានសារព័ត៌មានថ្មីៗ,  កាសែតភ្នំពេញប៉ុស្តិ៍, CamboJA, SEA Globe និង VOD។ ការចុះបំពេញកម្មសិក្សារបស់និស្សិតទាំង៧នាក់នៅតាមស្ថាប័នសារព័ត៌មាននានានេះ ក៏ទទួលបានប្រាក់ខែសមរម្យ ណាមួយផងដែរ។ នេះបើតាមការបញ្ជាក់របស់លោក អ៊ុង ប៊ុនអ៊ី៕