​មនុស្ស៤៩នាក់បន្ថែម បានឆ្លងកូវីដ-១៩ និង១៣៣នាក់បានជាសះស្បើយខណៈ អ្នកស្លាប់មានដល់ទៅ៣នាក់ទៀត។  ក្នុងចំណោមអ្នកវិជ្ជមានទាំង ៤៩នាក់នោះភាគច្រើនជាអ្នករស់នៅ​ក្រុងកំពង់ចាម ​ស្រុកកំពង់សៀម ​បាធាយ ​ស្រីសន្ធរ ​ជើងព្រៃ ​ចំការលើ ​ព្រៃឈរ និងស្រុកកងមាស។ អ្នកជំងឺម្នាក់ជាអ្នកខេត្តពោធិ៍សាត់, ម្នាក់ពីខេត្តត្បូងឃ្មុំ និងអ្នកខេត្តក្រចេះមានម្នាក់ដែរ។

​

ចំពោះអ្នកស្លាប់ទាំង ៣នាក់ គឺសុទ្ធតែជាស្ត្រីទាំងអស់ ដោយម្នាក់មានវ័យ៧៤ឆ្នាំ រស់នៅភូមិរូង ឃុំទំនប់ ស្រុកបាធាយ។ ស្រ្តីរូបនេះ បានចូលព្យាបាលជំងឺនៅមន្ទីរពេទ្យបង្អែកស្រុកបាធាយ នៅថ្ងៃទី១ ខែកក្កដា ក្នុងសភាពហត់ បង្ហក់ ក្រុមគ្រូពេទ្យ បានធ្វើតេស្តរហ័សកូវីដ-១៩ បន្ទាប់ក៏ទទួលបានលទ្ធផលវិជ្ជមាន។ អ្នកជំងឺកាន់តែធ្ងន់ធ្ងរ ទើបបាត់បង់ជីវិត ម៉ោង១០ព្រឹក ថ្ងៃទី២ ខែកក្កដា។ ស្ត្រីម្នាក់ទៀត វ័យ៦០ឆ្នាំ រស់នៅភូមិដីក្រហម ឃុំសូភាស ស្រុកស្ទឹងត្រង់​។ ស្ត្រីរូបនេះបានធ្វើតេស្តរកឃើញមានកូវីដ-១៩ កាលពីថ្ងៃ២២ ខែមិថុនា ហើយស្ថាន​ជំងឺកាន់តែធ្ងន់ធ្ងរឡើង រហូតបាត់បង់ជីវិតនៅម៉ោង៣ទៀតបភ្លឺថ្ងៃទី២ ខែកក្កដា។ អ្នកស្លាប់ម្នាក់ទៀត មានវ័យត្រឹមតែ ២៧ឆ្នាំប៉ុណ្ណោះ និងមានមានផ្ទៃពោះ៦ខែផង។ អ្នកជំងឺរស់នៅភូមិកោះបីពៃ ឃុំកោះពីរ ស្រុកក្រូចឆ្មារ ​និងបានរកឃើញមានវិជ្ជមានកូវីដ-១៩ នៅថ្ងៃទី២៨ ខែមិថុនា។ ដោយសារតែរលាកសួតធ្ងន់ធ្ងរ និងមានវិជ្ជមានកូវីដ​-១៩ ផង អ្នកជំងឺបានស្លាប់នៅទៀបភ្លឺថ្ងៃទី២ ខែកក្កដា។

រដ្ឋបាលខេត្តត្បូងឃ្មុំ បន្តរកឃើញអ្នកវិជ្ជមាន​កូវីដ-១៩ ចំនួន៥៥នាក់បន្ថែម និង​ ៤នាក់បានជាសះស្បើយ។ អ្នកជំងឺទាំង៥៥នាក់ មានអាសយដ្ឋាន នៅស្រុកក្រូចឆ្មារ២៦នាក់, ក្រុងសួង១៥នាក់,ស្រុកតំបែរ៧នាក់, ស្រុកអូររាំងឪ២នាក់, ស្រុកត្បូងឃ្មុំ២នាក់,ស្រុកមេមត់២នាក់ និងស្រុកពញាក្រែក១នាក់។ ដោយសារតែ ស្ថានភាពកូវីដ-១៩ ក្នុងខេត្តត្បូងឃ្មុំ កាន់តែរាលដាលខ្លាំង ទើបរដ្ឋបាលខេត្តសម្រេចបិទខ្ទប់តំបន់មួយចំនួន រួមមានផ្សារមេមត់ , ផ្សារអូររាំងឪ និងរោងចក្រសុស្យេង អ៊ីនដាសស្ទ្រេល ស្ថិតក្នុងក្រុងសួង ដើម្បីទប់ស្កាត់ការឆ្លងរាលដាលកាន់តែខ្លាំងទៅសហគមន៍ផ្សេង។

 

គិតមកទល់ពេលនេះ កម្ពុ​ជា មាន​អ្នក​ឆ្លង​កូ​វីដ​-១៩ សរុប ៥៣ ៩២៨នាក់ ក្នុងនោះ ២ ៩១៦ ​នាក់​ករណី​នាំចូល​។ អ្នកជា​សះស្បើយ​មាន  ៤៦ ១២៣នាក់ និង​ស្លាប់​សរុប  ៦៩៦ ​នាក់​៕