អន្តរជាតិ
លោក ស៊ី ជិនភីង ធ្វើទស្សនកិច្ចលើកដំបូងទៅទីបេក្នុងនាមជាប្រធានាធិបតី 23, Jul 2021 , 7:29 pm
ប្រធានាធិបតីចិន លោកស៊ី ជិនភីង ទស្សនកិច្ចនៅតំបន់ទីបេ។ រូបភាព៖ រដ្ឋាភិបាលចិន
× ប្រធានាធិបតីចិន លោកស៊ី ជិនភីង បានធ្វើទស្សនកិច្ចដ៏កម្រមួយទៅតំបន់ស្វយ័តទីបេ ចាប់ពីថ្ងៃទី២១ ដល់ថ្ងៃទី២២ ខែកក្កដា។ នេះបើតាមការចុះផ្សាយរបស់ទីភ្នាក់ងាររដ្ឋចិន Xinhua នៅថ្ងៃទី២៣ ខែកក្កដា។ នេះជាទស្សនកិច្ចលើកដំបូងរបស់មេដឹកនាំកំពូលចិន ទៅតំបន់ទីបេក្នុងពេល៣ទសវត្សរ៍មកនេះ។
ប្រធានាធិបតីចិន លោក ស៊ី ជិនភីង បានទៅដល់តំបន់ទីបេ នៅថ្ងៃទី២១ ខែកក្កដា ដោយមានការទទួលរាក់ទាក់ពីសំណាក់ប្រជាជនក្នុងស្រុក និងមន្រ្តីពីជនជាតិភាគតិចផ្សេងៗ។ ក្នុងទស្សនកិច្ចលើកដំបូងចាប់តាំងពីកាន់តំណែងជាប្រធានាធិបតី លោកស៊ី បានទស្សនកិច្ចនៅស្ពានឆ្លងទន្លេ Nyang ដើម្បីពិនិត្យពីការថែរក្សាប្រព័ន្ធអេកូឡូស៊ី និងមើលទន្លេនោះ។
ទន្ទឹមនេះ មេដឹកនាំចិនរូបនេះ ក៏បានទៅពិនិត្យគម្រោងអភិវឌ្ឍក្រុង ឧទ្យាន និងការអភិវឌ្ឍតំបន់ជនបទជាដើម។ នៅថ្ងៃបន្ទាប់ប្រធានាធិបតីចិនរូបនេះ បានទស្សនកិច្ចនៅស្ថានីយរថភ្លើង Nyingchi ដើម្បីមើលពីការរចនាផ្លូវរថភ្លើងពីទីបេមក ខេត្តស៊ីឈ័ន។
ក្នុងទស្សនកិច្ចស្ងាត់ៗនេះ លោក ស៊ី ក៏បានទៅវិមាន Potala ក្នុងក្រុង Lhasa ដែលជាទីក្រុងធំរបស់ទីបេ និងតំបន់សាសនា ក៏ដូចជាកន្លែងការពារសម្បត្តិវប្បធម៌ផ្សេងទៀតដែរ។ នេះបើតាមការចុះផ្សាយរបស់ទីភ្នាក់ងារព័ត៌មាន Xinhua ។
គួររំលឹកថា កន្លងមក លោកស៊ី ធ្លាប់បានទៅតំបន់ទីបេចំនួនពីរលើករួចហើយ។ នៅក្នុងឆ្នាំ១៩៩៨ លោកស៊ី បានទៅទស្សនកិច្ចម្តង ក្នុងនាមជាលេខាបក្សខេត្តហ្វជាន និងនៅក្នុងឆ្នាំ២០១១ ជាអនុប្រធានាធិបតីចិន។ ប្រធានាធិបតីចិន ចុងក្រោយ ដែលទៅទស្សនកិច្ចនៅតំបន់ទីបេ គឺលោក Jiang Zemin នៅក្នុងឆ្នាំ១៩៩០។
សូមបញ្ជាក់ថា ប្រជាជន នៅក្នុងតំបន់ទីបេ តែងតែបាតុកម្មជាច្រើនលើកប្រឆាំងនឹងចិន ទាមទារសេរីភាព និងការអភិវឌ្ឍចិននៅក្នុងតំបន់មួយនេះ ដែលធ្វើឱ្យប៉ះពាល់ដល់វប្បធម៌របស់ពួកគេ៕
© រក្សាសិទ្ធិដោយ thmeythmey.com