អន្តរជាតិ
ការសិក្សា៖ ការសម្រេចគោលដៅអាកាសធាតុសកល នឹងជួយបង្កើនឱកាសការងារជាង៨លានកន្លែង 01, Aug 2021 , 10:29 pm
រូបថត Xinhua
× ក្រុមអ្នកស្រាវជ្រាវ បានរកឃើញថា ការសម្រេចគោលដៅកិច្ចព្រមព្រៀងទីក្រុងប៉ារីសស្តីពីបម្រែបម្រួលអាកាសធាតុ នឹងរួមចំណែកបង្កើនឱកាសការងារប្រមាណ៨លានកន្លែងនៅលើពិភពលោកត្រឹមឆ្នាំ២០៥០ តាមរយៈកំណើនឧស្សាហកម្មផលិតថាមពលដើរដោយពន្លឺព្រះអាទិត្យ និងកម្លាំងខ្យល់។ កិច្ចព្រមព្រៀង អាកាសធាតុក្រុងប៉ារីស ត្រូវបានអនុម័តដើម្បីរក្សាកម្តៅផែនដីមិនឱ្យកើនឡើងបន្ថែមលើស២អង្សា។
ភពផែនដីនាពេលបច្ចុប្បន្ន កំពុងជួបប្រទះបញ្ហាកើនឡើងកម្តៅ ដែលបណ្តាលមកពីសកម្មភាពប្រចាំថ្ងៃមួយចំនួនរបស់មនុស្ស។ កំណើនកម្តៅផែនដី ជាកត្តាបង្កផលវិបាកយ៉ាងខ្លាំងដល់ជីវិតជាសកល។ ដូច្នេះការសម្រេចគោលដៅអាកាសធាតុសកល ពិតជាត្រូវធ្វើដើម្បីដោះស្រាយបញ្ហានេះ។ មិនត្រឹមតែប៉ុណ្ណោះ ការសិក្សាបង្ហាញថា ការសម្រេចគោលដៅអាកាសធាតុសកលនឹងជួយបង្កើនឱកាសការងារប្រមាណ៨លាន នៅត្រឹមឆ្នាំ២០៥០ខាងមុខ។
តាមការចុះផ្សាយនៅលើទិនានុប្បវត្តិ One Earth ការសិក្សាលើឱកាសការងារនេះ បានធ្វើឡើងដោយសេដ្ឋវិទូផ្នែកបរិស្ថាននៃវិទ្យាស្ថានសេដ្ឋកិច្ចអឺរ៉ុប RFF-CMCC លោក Johannes Emmerling និងក្រុមការងាររបស់លោក ដោយប្រមូលទិន្នន័យការងារពីបណ្តាប្រទេសប្រមាណ ៥០។ ក្រុមអ្នកស្រាវជ្រាវ បានរកឃើញថា ការខិតខំសម្រេចគោលដៅកិច្ចព្រមព្រៀងទីក្រុងប៉ារីសស្តីពីអាកាសធាតុសកល នឹងអាចជួយបង្កើនឱកាសការងារប្រមាណ៨លានបន្ថែមទៀត នៅត្រឹមឆ្នាំ២០៥០ តាមរយៈកំណើនឧស្សាហកម្មផលិតថាមពលដើរដោយពន្លឺព្រះអាទិត្យ និងកម្លាំងខ្យល់។
«បច្ចុប្បន្ននេះ តាមរយៈការប៉ាន់ប្រមាណ មានកម្មករប្រមាណ ១៨លាននាក់ កំពុងធ្វើការក្នុងរោងចក្រផលិតថាមពល ហើយចំនួនការងារនឹងត្រូវកើនឡើងទៅដល់ ២៦លាន ឬលើសពីនេះប្រសិនបើយើងសម្រេចដល់គោលដៅអាកាសធាតុសកល»។ លោក Emmerling បានអះអាងបែបនេះ។
តាមការស្រាវជ្រាវអំពីអត្រាការងារសរុបក្នុងឆ្នាំ២០៥០ គេរកឃើញថា វិស័យការងារផលិតថាមពលប្រើប្រាស់ឡើងវិញមានប្រមាណ ៨៤ភាគរយ ខណៈចំនួនការងារ ១១ភាគរយផ្សេងទៀតនឹងស្ថិតក្នុងវិស័យឥន្ធនៈ និង ៥ភាគរយទៀតនៅក្នុងវិស័យនុយក្លេអ៊ែរ។ ដោយឡែក ការងារចម្រាញ់ឥន្ធនៈប្រមាណ ៨០ភាគរយនៃចំនួនការងារបច្ចុប្បន្ន អាចនឹងកាត់បន្ថយ ហើយត្រូវបានជំនួសមកវិញដោយការងារក្នុងឧស្សាហកម្មផលិតថាមពលដោយពន្លឺព្រះអាទិត្យនិងកម្លាំងខ្យល់ជាដើម៕
© រក្សាសិទ្ធិដោយ thmeythmey.com