កីឡាអន្តរជាតិ
អន្តរជាតិ
Messi ពន្យល់ពីរូបថតជាមួយកីឡាករ PSG ដោយសារភាពថា ការផ្លាស់ទៅ PSG គឺជាជម្រើសមួយ 09, Aug 2021 , 2:43 pm
រូបភាព៖ Marca
×
ដោយ៖ជា យូគៀង
ក្លិបអ្នកមានបុណ្យ Barcelona បានធ្វើសន្និសីទកាសែត សម្រាប់ប្រធានក្រុម Lionel Messi ដែលជាការលាគ្នាចុងក្រោយបង្អោះ មុននឹងការចាកចេញរបស់រូបគេ នាថ្ងៃទី៨ ខែសីហា។
ក្នុងពេលថ្លែងសារលាមិត្តរួមក្រុមនេះ ខ្សែប្រយុទ្ធឆ្នើមសញ្ជាតិអាហ្សង់ទីន Messi ត្រូវបានអ្នកសារព័ត៏មានសួរថា តើការផ្លាស់ទៅកាន់ក្លិប Paris Saint Germain អាចទៅរួចដែរឬយ៉ាងណា? ឆ្លើយនឹងសំនួរដោយលាយឡំនឹងទឹកភ្នែកផងនោះ Messi ក៏បានសារភាពដែរថា ក្លិប PSG នេះ គឺជាជម្រើសមួយសម្រាប់រូបគេផងដែរ។
«PSG គឺជាជម្រើសមួយ ប៉ុន្តែនៅពេលនេះមិនទាន់មានការព្រមព្រៀងជាមួយក្លិបណាមួយនៅឡើយទេ។ នៅពេលសេចក្តីថ្លែងការរបស់ក្លិបបានចេញភ្លាម ខ្ញុំទទួលបានការហៅមកកាន់ទូរស័ព្ទខ្ញុំជាច្រើន ហើយក៏មានក្លិបមួយចំនួនដែលបានចាប់អារម្មណ៍។ ខ្ញុំមិនទាន់យល់ព្រមនៅឡើយ យើងកំពុងស្ថិតក្នុងការចរចា»។Messi បាននិយាយឆ្លើយតបក្នុងសន្និសីទសារព័ត៏មានបែបនេះ។
ទាក់ទងទៅនឹងរឿងរូបថត ដែលរូបគេបានថតជាមួយក្រុមកីឡាករ PSGនោះ Messi អះអាងថា រូបភាពនោះគឺជារូបក្នុងកម្មវិធីមួយនៅផ្ទះរបស់ Neymar ដែលជាអតីតមិត្តរួមក្រុមខ្លួន មុនថ្ងៃទទួលដំណឹងពីក្លិបមួយថ្ងៃ។ Messi បន្ថែមថា រូបភាពនោះ គ្រាន់តែជារឿងចៃដន្យប៉ុណ្ណោះ។
ម្ចាស់ពានរង្វាន់កីឡាករឆ្នើម Ballon d’Or ៦ សម័យរូបនេះ បានផុតកិច្ចសន្យា និងលែងជាកីឡាកររបស់ក្លិបរហស្សនាមអ្នកមានបុណ្យចាប់តាំងពីថ្ងៃទី១ ខែកក្កដាម្លេះ។ ខ្សែបម្រើវ័យ ៣៤ឆ្នាំរូបនេះបានក្លាយជាកីឡាករគ្មានតម្លៃខ្លួន ហើយរូបគេអាចចេញទៅចូលរួមជាមួយក្លិបផ្សេងបានដោយគ្មានតម្លៃខ្លួនឡើយ។
១៨រដូវកាលជាមួយ Barcelona តារាឆ្នើម Messi បានជួយក្រុមលើកពានចំនួន៣៥ រួមមានជើងឯក La Liga ១០លើក Champion Leagues ៤លើក Spanish Super Cup ៨លើក Copa Del Rey ៧លើក Club World Cup ៣លើក និង European Super Cup ចំនួន៣លើក៕
© រក្សាសិទ្ធិដោយ thmeythmey.com