ជាតិ
កាំរស្មីព្រះអាទិត្យ UV ល្អសម្រាប់ស្បែក តែការត្រូវពន្លឺយូរពេកអាចបង្កគ្រោះថ្នាក់
18, Aug 2021 , 7:29 pm
ស្រ្តីម្នាក់កំពុងរត់ហាត់ប្រាណនៅខេត្ត British Columbia ប្រទេសកាណាដា។ រូបថត Xinhua
×![]()
ដោយ: សារព័ត៌មានថ្មីៗ
កាំរស្មីស្វាយអ៊ុលត្រា (Ultraviolet) ដែលគេនិយមស្គាល់ដោយអក្សរកាត់ UV ជាពន្លឺដែល បញ្ចេញ ដោយប្រភពធម្មជាតិមានព្រះអាទិត្យ និងប្រភពសិប្បនិម្មិតមានគ្រែបញ្ចេញកាំរស្មី (Tanning Bed),អំពូលភ្លើង និងឡាស៊ែរ។ ដូចដែលធ្លាប់ដឹង ពន្លឺបញ្ចេញដោយព្រះអាទិត្យ ជាវត្ថុធាតុដើមសម្រាប់ការលូតលាស់របស់រុក្ខជាតិ និងស្បែកមនុស្ស។ ប៉ុន្តែការកើនឡើងខ្លាំងនៃសន្ទស្សន៍កាំរស្មី UV ដែលបញ្ចេញដោយព្រះអាទិត្យ នឹងបង្កគ្រោះថ្នាក់ទៅវិញ។
កាំរស្មី UV ចែកជាបីប្រភេទមាន កាំរស្មីស្វាយអ៊ុយត្រា A (UVA), កាំរស្មីស្វាយអ៊ុយត្រា B (UVB) កាំរស្មីស្វាយអ៊ុយត្រា C (UVC) ដែលកំណត់ទៅតាមជំហានរលករបស់កាំរស្មីនីមួយៗតាមខ្នាតណាណូម៉ែត្រ។ កាំរស្មី UVC ត្រូវបានស្រូបយកទាំងស្រុងដោយស្រទាប់អូស្សូន ឯ កាំរស្មី UVB ត្រូវបានអូស្សូនស្រូបយកស្ទើរទាំងស្រុងដែរ។ ដូចនេះ ភាគច្រើននៃកាំរស្មីដែលមកដល់ផែនដី គឺកាំរស្មី UVA ។
សម្រាប់មនុស្ស កាំរស្មីស្វាយអ៊ុលត្រារបស់ព្រះអាទិត្យ ជាប្រភពនៃការបង្កើតវីតាមីន D ដែលមានសារសំខាន់សម្រាប់សុខភាពមនុស្ស។ វីតាមីន D មានតួនាទីស្រូបយកកាល់ស្យូម និងផូស្វរដើម្បីពង្រឹងឆ្អឹងមនុស្ស។ អង្គការសុខភាពពិភពលោក ណែនាំឱ្យមនុស្សហាលថ្ងៃពី៥នាទីទៅ១៥នាទី ដោយមួយសប្ដាហ៍អាចធ្វើពីរទៅបីដង។ ចំណែកកាំរស្មីសិប្បនិម្មិតខ្លះ ត្រូវបានប្រើដើម្បីព្យាបាលជំងឺមួយចំនួនដែលមិនអាចព្យាបាលតាមវិធីសាស្រ្តផ្សេង។
ទោះមានគុណសម្បត្តិក្ដី ការរងពន្លឺថ្ងៃយូរពេក ពិសេសអំឡុងពេលក្ដៅខ្លាំង នឹងបង្កគ្រោះថ្នាក់ទៅវិញ។ រលាកស្បែក ជារឿងដែលជួបប្រទះញឹកញាប់ ប៉ុន្តែករណីធ្ងន់ធ្ងរខ្លះក៏អាចកើតមានដូចជាជំងឺស្បែក មហារីកស្បែកជាដើម។ ពេលខ្លះ កាំរស្មី UV ក៏បង្កើនឱកាសជំងឺភ្នែក បើគ្មានការការពារត្រឹមត្រូវ។ ខណៈមនុស្សគ្រប់សុទ្ធតែអាចជួបបញ្ហាបែបនេះ អ្នកដែលងាយរងគ្រោះមានមនុស្សដែលត្រូវពន្លឺថ្ងៃយូរ អ្នកមានពណ៌ស្បែកស្រាលៗ អ្នកមានបញ្ហាស្បែក និងអ្នកមានវ័យលើស៥០ឆ្នាំជាដើម។
របៀបការពារមានការចៀសវាងហាលថ្ងៃយូរ, ពាក់មួក ឬវ៉ែនតាការពារ, ស្លៀកបំពាក់បិទជិតដៃជើង, ប្រើប្រាស់ឡេ និងគ្រឿងសម្អាងការពារពន្លឺថ្ងៃជាដើម៕
Tag:
ចំណេះដឹងទូទៅ
© រក្សាសិទ្ធិដោយ thmeythmey.com
