ជាតិ
សង្គមជាតិ
InterNations៖ កម្ពុជាជាប់លេខ៤ជាប្រទេសដែលរួសរាយរាក់ទាក់ដាក់ជនបរទេសជាងគេបំផុត 21, Aug 2021 , 8:59 pm
× កម្ពុជាស្ថិតក្នុងចំណោមប្រទេសដែលស្វាគមន៍រួសរាយបំផុតសម្រាប់ជនបរទេស (Most Welcoming Countries for Expats) ។ នេះជាលទ្ធផលនៃការស្ទង់មតិរបស់គេហទំព័រ InterNations ដែលមានមូលដ្ឋាននៅក្រុងមុយនិច ប្រទេសអាល្លឺម៉ង់។
ចាប់ផ្តើមពីខែមករា ដោយមានការចូលរួមពីមនុស្សជាង១២០០០នាក់ ដែលរស់នៅក្រៅប្រទេសកំណើតខ្លួន ការស្ទង់មតិ Expat Insider របស់ InterNations បង្ហាញថា កម្ពុជាស្ថិតក្នុងចំណាត់ថ្នាក់លេខ៤ បន្ទាប់ពីព័រទុយហ្គាល់ កោះតៃវ៉ាន់ និងម៉ិកស៊ិក។
ទោះឆ្នាំ២០២១ ដែលត្រូវបានចាត់ទុកជាឆ្នាំដែលមិនមានភាពច្បាស់លាស់ដោយសារកូវីដ-១៩ ពលរដ្ឋកម្ពុជានៅតែអាកប្បកិរិយារួសរាយរាក់ទាក់ប្រកបដោយស្នាមញញឹម និងមិត្តភាពជាមួយពលរដ្ឋបរទេស។ ទឹកដីនៃស្នាមញញឹមនេះ ក៏ធ្លាប់បានចំណាត់ថ្នាក់លេខ៤ម្តងហើយកាលពីឆ្នាំ២០១៧។
ការស្ទង់មតិ Expat Insider បង្ហាញថា ជនបរទេសផ្តល់អត្រាពិន្ទុ៩៦ភាគរយកាយវិការរាប់អានប្រកបដោយមិត្តភាពពីសំណាក់ពលរដ្ឋខ្មែរ ខណៈអត្រាពិន្ទុមធ្យមគឺត្រឹមតែ៧០ភាគរយប៉ុណ្ណោះ។ ជនជាតិអូស្ត្រាលីម្នាក់ បានអះអាងថា គេពិតជាមានការរីករាយក្នុងការភ្ជាប់ទំនាក់ទំនងជាមួយពលរដ្ឋមូលដ្ឋាន។
បើតាម InterNations ជនបរទេសលើស៨នាក់ក្នុងចំណោម១០នាក់ ថា ពលរដ្ឋខ្មែរនៅមូលដ្ឋានស្វាគមន៍ពួកគេខ្លាំង ហើយ៨៣ភាគរយ យល់ស្របចំពោះការលើកឡើងថា ពួកគេងាយសម្របខ្លួនក្នុងការរស់នៅក្នុងប្រទេសកម្ពុជា។ ជាមួយគ្នានេះ ៣៩ភាគរយ អះអាងថា នៅកម្ពុជា មានអារម្មណ៍ដូចជានៅប្រទេសកំណើតរបស់ខ្លួនយ៉ាងដូច្នោះដែរ។
សម្រាប់ឆ្នាំនេះ ព័រទុយហ្គាល់បានឡើងពីចំណាត់ថ្នាក់លេខ៩ ទៅឈរលើកំពូលតារាង Most Welcoming Countries for Expats បន្ទាប់មកកោះតៃវ៉ាន់ ម៊ិកស៊ិក កម្ពុជា បារ៉ែន កូស្តារីកា អូម៉ង់ កូឡុំប៊ី វៀតណាម និងកាណាដា។
សម្រាប់ប្រទេសផ្សេងទៀតនៅតំបន់អាស៊ីអាគ្នេយ៍ ហ្វីលីពីនលេខ១១ មីយ៉ាន់ម៉ាលេខ១៨ ថៃលេខ២០ ឥណ្ឌូណេស៊ីលេខ២១ ម៉ាឡេស៊ីលេខ២២ និងសិង្ហបុរីលេខ៤០។
លទ្ធផលក៏បានបង្ហាញផងដែរថា គូវែតជាប្រទេសដែលមានការរាក់ទាក់ដាក់ជនបរទេសកម្រិតទាបបំផុត ក្រៅពីនេះ មានអូទ្រីស ស្វីស សាធារណរដ្ឋឆែក ហ្វាំងឡង់ ដាណឺម៉ាក អារ៉ាប៊ីសាអូឌីត ហុងគ្រី អាហ្វ្រិកខាងត្បូង និងចក្រភពអង់គ្លេស៕
© រក្សាសិទ្ធិដោយ thmeythmey.com