សង្គមអន្តរជាតិ
អន្តរជាតិ
ស្ត្រីអ៊ូហ្កង់ដា Mariam តស៊ូចិញ្ចឹមកូនបង្កើត៣៨នាក់ ក្រោយស្វាមីបោះបង់ចោលគ្រួសារ 22, Aug 2021 , 9:59 am
× ស្ត្រីជនជាតិអ៊ូហ្កង់ដា Mariam Nabatanzi ត្រូវបានឪពុកចាត់ចែងពីរឿងគូស្រករតាំងពីទើបកើតមកម្ល៉េះ។ ចូលដល់វ័យ១២ឆ្នាំ នាងបានរៀបការ ហើយមួយឆ្នាំក្រោយមក នាងក៏មានកូន។ «ជីវិតអាពាហ៍ពិពាហ៍របស់ខ្ញុំ គ្មានពន្លឺឡើយ លើកលែងតែកូនៗខ្ញុំប៉ុណ្ណោះ»។ Mariam បានលើកឡើងយ៉ាងដូច្នេះក្នុងវីដេអូឯកសាររបស់ទូរទស្សន៍រុស្ស៊ី RT។
ស្វាមីដែលមានអាយុបងនាងជាច្រើនឆ្នាំ តែងតែមានស្រីក្រៅ ហើយថែមទាំងយកទៅផ្ទះទៀតផង ប៉ុន្តែ Mariam មិនចាកចេញឡើយ ពីព្រោះក្នុងជីវិតចង់មានស្វាមីតែម្នាក់គត់។ បន្ទាប់ពីបង្កើតបានកូនភ្លោះបីលើកជាប់គ្នា Mariam បានសុំឲ្យវេជ្ជបណ្ឌិតជួយដល់ខ្លួន ព្រោះគាត់មិនចង់បានកូនទៀតឡើយ ប៉ុន្តែពេទ្យបានអះអាងថា ជួយមិនបាននោះទេ ដោយអះអាងគាត់មានកោសិកាស៊ុតច្រើន ដែលត្រូវបន្តសម្រាលកូន បើមិនដូច្នោះទេ ប្រឈមគ្រោះថ្នាក់ដល់ជីវិត រីឯការប្រើថ្នាំពន្យាកំណើត និងមធ្យោបាយផ្សេងៗ សុទ្ធតែធ្វើឲ្យគាត់ឈឺចាប់ក្នុងខ្លួន។
សរុបមក អ្នកស្រី Mariam បង្កើតកូនចំនួន១៥លើក និងមានកូន៤៤នាក់ ហើយបច្ចុប្បន្ននៅរស់៣៨នាក់។ ការសម្រាលម្តងៗ គឺមានភ្លោះពីរ ភ្លោះបី និងភ្លោះ៤ លើកលែងតែកូនពៅម្នាក់ប៉ុណ្ណោះដែលមិនមែនជាកូនភ្លោះ។ ក្រោយរួមរស់នៅជាមួយគ្នាជាង២០ឆ្នាំ ស្វាមីបានចាកចេញពីគ្រួសារ ដែលធ្វើឲ្យស្ត្រីរូបនេះ ក្លាយជាស្ត្រីមេម៉ាយដែលត្រូវតស៊ូចិញ្ចឹមកូនរហូតដល់៣៨នាក់។
បច្ចុប្បន្ន អ្នកស្រី Mariam រស់នៅជាមួយកូនៗនៅភូមិ Kasawo ប្រទេសអ៊ូហ្កង់ដា។ ផ្ទះរបស់គាត់គឺសម្រាប់តែ នៅប៉ុណ្ណោះ ស្ទើរតែគ្មានការតុបតែងសង្ហារឹមអ្វីនោះឡើយ ម្យ៉ាងវិញទៀត ស្ត្រីមេម៉ាយរូបនេះ ត្រូវប្រឹងប្រែងគ្រប់បែបយ៉ាងដើម្បីកូនៗ ជាពិសេសការរៀនសូត្ររបស់ពួកគេ។
ឈានចូលដល់វ័យ៤០ឆ្នាំ អ្នកស្រី Mariam បានបញ្ជូនកូនជាង១០នាក់ហើយទៅសាលារៀន។ ជីវិតគាត់ត្រូវបានម្តាយរត់ចោលតាំងពីតូច ហើយខ្វះការថ្នាក់ថ្នមពីឪពុក និងមិនបានចូលសាលារៀន។ អ្នកស្រីមិនចង់ឲ្យកូនៗឆ្លងកាត់ស្ថានភាពបែបនេះដូចខ្លួននោះឡើយ។
«ខ្ញុំរីករាយណាស់ដែលកូនៗស្រីរបស់ខ្ញុំ ទទួលបាននូវការអប់រំ ពីព្រោះខ្ញុំខ្លួនឯងបានបាត់បង់ឱកាសទាំងនោះ។ ទោះបីខ្ញុំអវិជ្ជា ប៉ុន្តែខ្ញុំនៅតែព្យាយាមចិញ្ចឹម និងថែទាំកូនខ្ញុំ»។ នេះជាការរៀបរាប់របស់អ្នកស្រី Mariam ដែលប្រឹងប្រែងធ្វើការគ្រប់បែបយ៉ាង ដូចជាបោកខោអាវឲ្យគេ បិតស្រាថ្នាំ លក់បន្លែ និងផ្សំឱសថបុរាណជាដើម៕
© រក្សាសិទ្ធិដោយ thmeythmey.com