ជាតិ
លោក វណ្ណា មករា ប្រឹងបន្តទៅមុខក្នុងអាជីវកម្មទេសចរណ៍ ព្រោះជឿជាក់ថា ស្ថានភាពនឹងវិលដូចដើម 05, Sep 2021 , 9:59 am
លោក វណ្ណា មករា អគ្គនាយកក្រុមហ៊ុន យូនីក ហូលីដេ
×
ដោយ៖ សុង សុធាវី
ភ្នំពេញ៖ វិបត្តិកូវីដ-១៩ បានធ្វើឱ្យវិស័យទេសចរណ៍ជាប់គាំង។ សណ្ឋាគារ ភោជនីយដ្ឋាន និងម្ចាស់អាជីវកម្មពាក់ព័ន្ធនឹងវិស័យទេសចរណ៍មួយចំនួន បានសម្រេចចិត្តបោះបង់របស់ក្នុងវិស័យទេសចរណ៍។ ផ្ទុយពីម្ចាស់អាជីវកម្មទាំងនោះ លោក វណ្ណា មករា ជាសហគ្រិនថ្មីមួយរូប បែរជាសម្រេចចិត្តដំណើរការក្រុមហ៊ុន ទេសចរណ៍មួយ ក្នុងស្ថានភាពដ៏លំបាក ដើម្បីចូលរួមលើកស្ទួយវិស័យទេសចរណ៍។ ក្នុងបទសម្ភាសន៍ ជាមួយកម្មវិធី«គំនិតថ្មី» នៃសារព័ត៌មានថ្មីៗ បុរសមានវ័យ ២៧ឆ្នាំរូបនេះ អះអាងថា ដរាបណានៅមានដង្ហើម លោកនឹងបន្តដំណើរជាមួយវិស័យទេសចរណ៍ដែលពោរពេញដោយសក្តានុពល និងស្តាយធនធានមនុស្សដែលមានស្រាប់។
ដើម្បីជ្រាបកាន់តែច្បាស់ សូមលោកអ្នកនាងទស្សនាបទសម្ភាសន៍ រវាងកញ្ញា សុង សុធាវី អ្នកសម្របសម្រួល កម្មវិធី «គំនិតថ្មី» និងលោក វណ្ណា មករា ដូចតទៅ៖
អតីតនិស្សិតជំនាញទេសចរណ៍ នៃសាកលវិទ្យាល័យបៀលប្រាយ មានស្រុកកំណើតនៅខេត្តតាកែវ លោក វណ្ណា មករា បានប្រឡូកចូលក្នុងវិស័យនេះជាង៥ឆ្នាំមកហើយ។ លោក មករា បានចាប់ផ្តើមការងារ ពីបុគ្គលិកតូចតាច រហូតក្លាយជាអ្នកគ្រប់គ្រងទូទៅនៅក្រុមហ៊ុនមួយ។ ក្រោយមានបទពិសោធន៍ការងារ លោក បានសម្រេចចិត្តបើកក្រុមហ៊ុនថ្មីមួយក្នុងស្ថានភាពដ៏លំបាកនេះ ឈ្មោះថា យូនីក ហូលីដេ។
លោក វណ្ណា មករា អគ្គនាយកក្រុមហ៊ុន យូនីក ហូលីដេ
សហគ្រិនថ្មីក្នុងវិស័យទេសចរណ៍រូបនេះ តែងដាក់ចិត្តធ្វើការងារ រៀនសូត្រពីចំណេះដឹងថ្មីៗ គ្រប់ផ្នែកនៅក្នុងក្រុមហ៊ុន និងព្យាយាមរក្សាទំនាក់ទំនងជាមួយបុគ្គលមានគុណភាពជានិច្ច។ លោក វណ្ណា មករា បញ្ជាក់ថា៖«សម្រេចចិត្តបើកក្រុមហ៊ុននេះ ព្រោះតែចិត្តស្រឡាញ់វិស័យទេសចរណ៍ខ្លាំង ចង់ផ្សព្វផ្សាយ ស្តាយធនធានមនុស្សដែលមាន មិនចង់ឱ្យបាត់បង់ ព្រោះមិនងាយកសាងបានភ្លាមៗទេ ខ្ញុំបានដាក់បេះដូងក្នុងវិស័យនេះទៅហើយ»។
បើតាមបុរសសម្បុរស្រអែមរូបនេះ មួយរយៈពេលចុងក្រោយនេះ ឥរិយាបថជនជាតិខ្មែរ ងាកមកចាប់អារម្មណ៍ជាមួយតំបន់ទេសចរណ៍ក្នុងប្រទេសច្រើន ព្រោះថា វិស័យនេះ មានសក្តានុពលវិសេសវិសាសណាស់ ដែលគួរតែរួមគ្នាជំរុញ និ លើកស្ទួយឱ្យខានតែបាន។ តាមរយៈចក្ខុវិស័យ ក្ដីស្រឡាញ់ និងការតាំងចិត្តយ៉ាងមុតមាំ បានជំរុញឱ្យលោក មករា ប្រមូលដើមទុនដែលមានស្រាប់ និងបានខ្ចីប្រាក់ខ្លះពីសាច់ញាតិ ដើម្បីបន្តជីវិតអាជីវកម្មថ្មោងថ្មីមួយនេះ។
លោក វណ្ណា មករា អគ្គនាយកក្រុមហ៊ុន យូនីក ហូលីដេ
កត្តាដែលធ្វើឱ្យម្ចាស់ក្រុមហ៊ុនវ័យ ២៧ឆ្នាំរូបនេះ ហ៊ានដំណើរការក្រុមហ៊ុនទេសចរណ៍ក្នុងបរិបទកូវីដ-១៩ គឺបទពិសោធន៍ក្នុងការដឹកនាំភ្ញៀវ និងការទំនាក់ទំនងល្អជាមួយភ្ញៀវ។ លើសពីនេះ ការសហការក្នុងក្រុម ការតស៊ូលំបាក និងរួមសុខរួមទុក្ខមួយគ្នា។ សហគ្រិនរូបនេះបាន លើកឡើងថា៖ «ធនធានមនុស្សក្នុងវិស័យនេះជាច្រើនបានចាកចេញទៅហើយ តែអ្នកដែលស្មោះស្ម័គ្រមួយចំនួនរួមទាំងខ្ញុំ គឺមិនអាចចាកចេញបានទេ ព្រោះកូវីដមិនអមតៈឡើយ បើគ្រប់គ្នាចាកចេញអស់ តើវិស័យទេសចរណ៍ នឹងទៅជាយ៉ាងណា?»។
លោក វណ្ណា មករា រំពឹងថា នៅពេលដែលស្ថានភាពជំងឺនេះធូរស្បើយ វិស័យទេសចរណ៍ នឹងមានឱកាសច្រើន សំខាន់ត្រូវពង្រឹងសមត្ថភាពទាំងអស់គ្នាពីពេលនេះទៅ។ ទន្ទឹមនឹងនេះ លោកក៏លើកទឹកចិត្តដល់និស្សិត ដែលកំពុងសិក្សាជំនាញទេសចរណ៍ឱ្យខំប្រឹងបន្តទៀត ព្រោះវិស័យនេះ កំពុងរង់ចាំអ្នកមានសមត្ថភាព។ បន្ថែមលើនេះ កុំបារម្ភរឿងគ្មានការងារធ្វើ ព្រោះរៀមច្បងជាម្ចាស់ក្រុមហ៊ុនជាច្រើន ចាំតែសហការជួយគ្នាផ្តល់ឱកាសសម្រាប់យុវជន៕
© រក្សាសិទ្ធិដោយ thmeythmey.com