ទោះបីចិនបានទប់ស្កាត់កូវីដ-១៩ បានជោគជ័យនៅតាមព្រំដែនរបស់ខ្លួនតាមរយៈការរឹតបន្តឹងការធ្វើដំណើរ និងបិទខ្ទប់ក៏ដោយ តែការផ្ទុះឡើងករណីក្នុងស្រុកជាបន្តបន្ទាប់ទាក់ទងនឹងវីរុសបំប្លែងថ្មីដែលតា បានធ្វើឱ្យអាជ្ញាធរប្រុងប្រយ័ត្នខ្ពស់។ វីរុសដែលតានៅមិនទាន់គ្រប់គ្រងបានស្រួលបួលផង អូមីក្រុងក៏លេចមុខជាថ្មីទៀត។
 

បើតាមការផ្សាយរបស់ទីភ្នាក់ងារព័ត៌មាន AFP អ្នករៀបចំកម្មវិធីកីឡាអូឡាំពិកប៉េកាំង សារភាពថា វីរុសបំប្លែងថ្មីអូមីក្រុងនឹងក្លាយជាបញ្ហាប្រឈមដ៏ធំបំផុត ក្នុងការធ្វើជាម្ចាស់ផ្ទះរបស់ចិន។
 

ចំណែកលោក Zhao Lijian អ្នកនាំពាក្យក្រសួងការបរទេសចិន លើកឡើងពីបញ្ហាប្រឈមនានាដែលទាក់ទងនឹងការការពារ និងការគ្រប់គ្រងនៅអូឡាំពិករដូវរងានឹងកើតមានដោយសារអូមីក្រុង។ លោក Zhao សរសើរអាហ្វ្រិកខាងត្បូងដែលបានផ្តល់ព័ត៌មានទាន់ពេលជុំវិញវត្តមានវីរុសថ្មីនេះ។
 

បើទោះយ៉ាងនេះក្តីលោក Zhao នៅតែជឿជាក់ថា ប្រទេសចិនដែលមានបទពិសោធន៍ច្រើនក្នុងការគ្រប់គ្រងជំងឺកូវីដ-១៩ នឹងដឹកនាំកីឡាអូឡាំពិករដូវរងាដោយរលូន។
 

ម្ចាស់ផ្ទះចិនប្ដេជ្ញាចិត្តរៀបចំអូឡាំពិកឱ្យបានជោគជ័យតាមរយៈយុទ្ធសាស្ត្រម៉ឺងម៉ាត់ និងមិនធ្វេសប្រហែសឡើយ។ អត្តពលិក អ្នកសារព័ត៌មាន និងអ្នកចូលរួមរាប់ពាន់នាក់ដែលទៅដល់ប្រទេសចិនដើម្បីចួលរួមកីឡារដូវរងាដែលនឹងចាប់ផ្តើមពីថ្ងៃទី៤ ខែកុម្ភៈ ត្រូវទទួលការពិនិត្យ និងតាមដានដ៏តឹងរ៉ឹងគ្រប់ពេល៕