ជ័យជម្នះ ២-១ លើក្រុម Watford នៅរាត្រីថ្ងៃទី១ ខែធ្នូ បានជួយក្រុមតោខៀវរក្សាតំណែងកំពូលតារាងដដែល។ Mason Mount និង Hakim Ziyech​ រកបានម្នាក់មួយគ្រាប់ឱ្យក្រុមលោក Thomas Tuchel ឯ Emmanuel Dennis ជាអ្នកសម្រេចទីសម្រាប់ក្រុមលោក Claudio Ranieri។
 

Chelsea រកបាន៣៣ពិន្ទុ ពីការប្រកួត១៤លើក នាំមុខគូប្រជែងដែលជាម្ចាស់ការពារតំណែងជើងឯក Man City ១ពិន្ទុ និង Liverpool ២ពិន្ទុ។
 

Man City​ រកបានជ័យជម្នះ៤ប្រកួតជាប់ៗគ្នាចុងក្រោយក្នុងលីគ បន្ទាប់ពីយកឈ្នះ Aston Villa ២-១។ កីឡាករព័រទុយហ្កាល់ពីររូប Ruben Dias និង Bernardo Silva ជាអ្នកសម្រេចទីឱ្យក្រុមមេឃខៀវ។ ក្រុមលោក Pep Guardiola ស្ថិតនៅចំណាត់ថ្នាក់ទី២ មាន៣២ពិន្ទុ។
 

Liverpool​ ឯណោះវិញ ក៏រកបាន៣ពិន្ទុបន្ថែមផងដែរ តាមរយៈការយកឈ្នះ Everton ៤-១។ Mohamed Salah រកបាន២គ្រាប់ម្នាក់ឯង ឯ Jordan Henderson និង Diogo Jota សម្រេចម្នាក់១គ្រាប់។
 

តាមរយៈជ័យជម្នះនេះ ក្រុមលោក Jurgen Klopp នៅរក្សាចំណាត់ថ្នាក់ទី៣ក្នុងតារាង Premier League សម្រាប់សប្តាហ៍ទី១៤ ដោយរកបាន៣១ពិន្ទុ។

លទ្ធផលការប្រកួតដទៀតសុទ្ធតែស្មើមាន Southampton ស្មើ Leicester City ២-២, Wolverhampton ០-០ Burnley និង West Ham United ២-២ Brighton & Hove Albion៕