នៅថ្ងៃទី១ នៃវគ្គបណ្ដុះបណ្ដាលនេះ លោក តន ចាន់រិទ្ធារ៉ា ការីនិពន្ធ នៃសារព័ត៌មានថ្មីៗ ជាគ្រូឧទ្ទេសដំបូងបានបង្រៀនពី «តើអ្វីជាព័ត៌មាន? អ្វីជាស្នូល និងឥទ្ធិពលព័ត៌មាន?»។  ចំណែកឯ នៅពេលរសៀលថ្ងៃទី១នេះ លោក សែម វណ្ណា និពន្ធនាយករងនៃសារព័ត៌មានថ្មីៗ២៥ បង្រៀនពី «ការស្វែងរកព័ត៌មាន ជ្រើសរើសមុម»។ លោក អ៊ឹង ចំរើន អគ្គនាយកនៃសារព័ត៌មានថ្មីៗ បានចែករំលែកចំណេះដឹងពាក់ព័ន្ធនឹង «ក្រមសីលធម៌សារព័ត៌មានសម្រាប់អ្នកសារព័ត៌មានសហគមន៍» តាមប្រព័ន្ធអនឡាញ។ 

 

វគ្គបណ្តុះបណ្តាលនេះ គឺផ្នែកមួយនៃគម្រោង«ពង្រឹងសិទ្ធិអំណាចរបស់ស្រ្តីវ័យក្មេង ក្នុងការធ្វើសេចក្តីសម្រេចចិត្ត និងជំរុញការផ្តល់សេវាសាធារណៈ ឱ្យកាន់តែមានគណនេយ្យភាព» ដែលកំពុងអនុវត្តរួមគ្នា ដោយអង្គការអង្គការអាក់សិនអេតកម្ពុជា និងអង្គការតម្លាភាពកម្ពុជា ជាមួយអង្គការ និងស្ថាប័នដៃគូមួយចំនួនទៀត។

 

គម្រោងនេះ គឺទទួលបានជំនួយហិរញ្ញវត្ថុ ពីសហភាពអឺរ៉ុប(EU) និងទីភ្នាក់ងារសហប្រតិបត្តិការអភិវឌ្ឍអន្តរជាតិស៊ុយអែត (SIDA) ដែលមានរយៈពេល៣ឆ្នាំ ដោយចាប់ផ្តើមឆ្នាំ២០២០ ដល់ឆ្នាំ២០២៣។ កោះកុង ជាគោលដៅចុងក្រោយ នៃវគ្គបណ្ដុះបណ្ដាលសារព័ត៌មាន បន្ទាប់ពីខេត្តកំពង់ធំ កំពត និងពោធិ៍សាត់។ វគ្គបណ្តុះបណ្តាលនេះ អាចប្រព្រឹត្តទៅបានក្រោមការសម្របសម្រួលរបស់ អង្គការក្រុមប្រឹក្សាយុវជនកម្ពុជា (YCC)៕