ជាតិ
អគារថ្មីស្នងការនគរបាលរាជធានីភ្នំពេញកម្ពស់៩ជាន់ មានចំណតចុះឧទ្ធម្ភាគចក្រ
09, Feb 2022 , 5:08 pm
×![]()
ដោយ: សារព័ត៌មានថ្មីៗ
សម្តេចឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ នៅថ្ងៃទី៩ ខែកុម្ភៈ បានទៅពិនិត្យការិយាល័យថ្មីនៃអគារស្នងការដ្ឋាននគរបាលរាជធានីភ្នំពេញ ដែលនឹងសម្ពោធដាក់ឲ្យប្រើប្រាស់នាពេលខាងមុខ។ អគារមានកម្ពស់៩ជាន់ ទំហំ៤០ម៉ែត្រគុណ៥០ម៉ែត្រ បំពាក់ដោយសម្ភារៈ បច្ចេកវិទ្យាទំនើប លើដំបូលអគារមានចំណតចុះឧទ្ធម្ភាគចក្រ។
យោងតាមគេហទំព័រអគ្គស្នងការដ្ឋាននគរបាលជាតិ អគារថ្មីស្នងការដ្ឋាននគរបាលរាជធានីភ្នំពេញកម្ពស់០៩ជាន់នេះ សាងសង់សម្រេចបានលទ្ធផល៩០ភាគរយហើយ ដោយគ្រោងនឹងកសាងឱ្យរួចរាល់នៅមុនថ្ងៃចូលឆ្នាំខាងមុខ។
កាលពីថ្ងៃទី៧ ខែកុម្ភៈ កន្លងមក លោក ស ថេត អគ្គស្នងការរង និងជាស្នងការរាជធានីភ្នំពេញ បានរៀបចំពិធីសូត្រមន្តប្រោះព្រំ សុំសេចក្តីសុខ សិរីសួស្តី ជ័យមង្គល តាមជំនឿសាសនា ខណៈ មន្ត្រីនគរបាលការិយាល័យជំនាញ បានចូលទៅបំរើការងារជាបណ្តើរៗហើយ។
សូមបញ្ជាក់ថា អគារធ្វើការថ្មីកម្ពស់៩ជាន់របស់ស្នងការដ្ឋាននគរបាលរាជធានីភ្នំពេញកសាងមានទំហំ៤០ម៉ែត្រគុណ៥០ម៉ែត្រ កសាងឡើងដើម្បីជំនួសអគារចាស់ដែលមានសភាពទ្រុឌទ្រោម ។ អគារថ្មីនេះ ត្រូវបានបំពាក់នូវឧបករណ៍សម្ភារៈប្រើប្រាស់ទំនើបៗឱ្យមន្ត្រីនគរបាលបំពេញភារកិច្ច សម្រាប់លើកកម្ពស់នៃការផ្តល់សេវាសន្តិសុខនិងសេវាសាធារណៈជូនប្រជាពលរដ្ឋនិងភ្ញៀវជាតិ-អន្តរជាតិឱ្យកាន់តែមានប្រសិទ្ធភាព៕
Tag:
នគរបាល
© រក្សាសិទ្ធិដោយ thmeythmey.com
