Atletico Madrid បានបើកការនាំមុខលើក្រុមបិសាចក្រហមចាប់តាំងពីនាទី៧មកម្ល៉េះ ដោយកីឡាករ Joao Felix។ ការប្រកួតបានអូសបន្លាយរហូតដល់នាទី៨០ ខ្សែប្រយុទ្ធវ័យក្មេង Anthony Elanga បានជួយស្វែងរកគ្រាប់តាមស្មើ ១-១ ដល់ក្រុម Manchester United។
 

ក្រោយចប់ការប្រកួតខ្សែការពារ Jose Maria Gimenez បានបង្ហាញអារម្មណ៍ឈឺចាប់ ព្រោះក្រុមបានបង្ហាញទម្រង់លេងល្អ នៅក្នុងជំនួបក្រុមបិសាចក្រហម ដែលអាចទទួលជ័យជម្នះបាន ប៉ុន្តែបែរជាបានត្រឹមស្មើទៅវិញ។ ទោះយ៉ាងនេះក្តី លោក Simeone បែរជាបង្ហាញអារម្មណ៍រំភើបហើយនិយាយថា ជាលទ្ធផលដ៏សំខាន់មួយ។
 

«បន្ទាប់ពីឆ្លងផុតវគ្គចែកពូល Champions league អ្នកនឹងត្រូវការឈ្នះ ឬក៏ស្មើដើម្បីបន្តដំណើរក្នុងផ្លូវមួយនេះ ហើយពិតជាសំណាងណាស់ ដែលពួកគេដកច្បាប់គ្រាប់បាល់ក្រៅដី (Away-goal) ចេញ។ ប្រកួតថ្ងៃនេះយើងពិតជាធ្វើបានល្អខ្លាំងណាស់ ហើយរឿងសំខាន់យើងត្រូវបន្តត្រៀមខ្លួនសម្រាប់វគ្គទីពីរ។»លោក Simeone និយាយបែបនេះ ក្រោយចប់ការប្រកួត។
 

ក្នុងរដូវកាល ២០២១-២២ ក្រុមការពារតំណែងជើងឯក Atletico Madrid កំពុងមានគម្លាតពិន្ទុរហូតដល់ ១៥ពិន្ទុ ពីក្រុមកំពូលតារាង Real Madrid ហើយឈរនៅលំដាប់លេខ៥ ពីក្រោមក្រុម Barcelona។
 

ជំនួបជើងទីពីរក្រុម Atletico Madrid នឹងត្រូវធ្វើដំណើរទៅកាន់ទឹកដីកីឡដ្ឋាន Old Trafford ដើម្បីប្រកួតជាមួយក្រុមម្ចាស់ផ្ទះ Manchester United នៅវេលាម៉ោង៣ រំលងអាធ្រាត្រឈានចូលថ្ងៃទី១៦ខែមីនា៕