ខណៈអាម៉េរិក បណ្ដាប្រទេសអឺរ៉ុប និងប្រទេសមួយចំនួននៅតំបន់អាស៊ី បានថ្កោលទោស និងដាក់ទណ្ឌកម្មលើរុស្ស៊ីដែលបានឈ្លានពានអ៊ុយក្រែន កូរ៉េខាងជើងឯនេះវិញ បានទម្លាក់កំហុសលើអាម៉េរិក និងបណ្តាប្រទេសលោកខាងលិច ថាជាដើមចមនៃវិបត្តិអ៊ុយក្រែន និងរុស្ស៊ី។ នៅក្នុងសេចក្តីថ្លែងការណ៍លើកដំបូងស្តីពីការវាយប្រហាររបស់រុស្ស៊ីលើអ៊ុយក្រែន ក្រសួង ការបរទេសកូរ៉េខាងជើង បានចោទអាម៉េរិក និងប្រទេសលោកខាងលិចពីកំហុសនៃការបំពានអំណាច។ 

 

«ដើមចមនៃវិបត្តិអ៊ុយក្រែន ស្ថិតនៅលើគោលនយោបាយអនុត្តរភាពអាម៉េរិក និងប្រទេសលោកខាងលិចដែលបានចាត់វិធានការខ្លាំងជ្រុល និងប្រើអំណាចរំលោភបំពានប្រទេសដទៃ»។ អ្នកនាំពាក្យក្រសួងការបរទេសកូរ៉េខាងជើង បានសង្កត់ធ្ងន់បែបនេះ។ 

 

ទន្ទឹមនេះ ក្រុងព្យុងយ៉ាង បានចោទក្រុងវ៉ាស៊ីនតោន និងសម្ព័ន្ធមិត្តថា មិនអើពើនឹងការទាមទារសមហេតុផល និងស្របច្បាប់របស់រុស្ស៊ី សម្រាប់ការធានាសន្តិសុខ ហើយបែរជាចង់ពង្រីកសម្ព័ន្ធយោធាណាតូនៅតំបន់អឺរ៉ុបខាងកើត រួមទាំងការដាក់ពង្រាយប្រព័ន្ធសព្វាវុធសម្រាប់វាយប្រហារថែមទៀត។ 

 

បើតាមកូរ៉េខាងជើង ដរាបណាអាម៉េរិក នៅតែបន្តគោលនយោបាយឯកតោនិយម ដែលគំរាមកំហែងដល់សន្តិភាព សុវត្ថិភាព និងអធិបតេយ្យភាពរបស់ប្រទេសផ្សេងៗ នោះពិភពលោក នឹងមិនមានសន្តិភាពឡើយ។

 

សេចក្ដីថ្លែងការណ៍មួយនេះ បានធ្វើឡើងតែមួយថ្ងៃប៉ុណ្ណោះបន្ទាប់ពីកូរ៉េខាងជើង បានតេស្តមីស៊ីល លើកទីមួយ ក្នុងខែកុម្ភៈ។ ទីក្រុងវ៉ាស៊ីនតោនបានអំពាវនាវឱ្យបន្តការចរចារលើការរំសាយកម្មវិធីនុយក្លេអ៊ែរឡើងវិញ ប៉ុន្តែកូរ៉េខាងជើងបានច្រានចោលសំណើនោះ ហើយទាមទារឱ្យអាម៉េរិកទម្លាក់គោលនយោបាយអរិភាព និងស្តង់ដារពីរជាន់ជាមុនសិន៕