គិតត្រឹមថ្ងៃទី២ ខែមីនា រុស្ស៊ី បានវាយប្រហារលើអ៊ុយក្រែនចូលដល់ថ្ងៃទី៧ ហើយ ដោយហេដ្ឋារចនាសម្ព័ន្ធជាច្រើន ត្រូវបានបំផ្លាញដោយមីស៊ីល និងការបំផ្ទុះ។ ប្រជាជនស៊ីវិលហោចណាស់ ៣៥០នាក់ បានបាត់បង់ជីវិត ខណៈប្រជាជនជាច្រើនម៉ឺននាក់ បានភៀសខ្លួនទៅប្រទេសជិតខាង។ 

 

ដោយមើលឃើញអ៊ុយក្រែន កំពុងប្រឈមបញ្ហាលំបាកបែបនេះ ប្រធានាធិបតីតៃវ៉ាន់ លោកស្រី សៃ អ៊ីងវេន បានប្រកាសបរិច្ចាគប្រាក់ខែរបស់ខ្លួនចំនួន១ខែ ជាមួយអនុប្រធានាធិបតី លោក William Lai និង លោកនាយករដ្ឋមន្រ្តី Su Tseng-chang សម្រាប់ជំនួយមនុស្សធម៌ឱ្យអ៊ុយក្រែន។ 

 

ថ្លែងនៅក្នុងកិច្ចប្រជុំបក្សប្រជាធិបតេយ្យ​ជឿនលឿន (DPP) នៅថ្ងៃទី២ ខែមីនា លោកស្រី សៃ បានយល់ថា ការប្តេជ្ញារបស់ប្រជាជនអ៊ុយក្រែន បានបង្ហាញទៅពិភពលោក និងប្រជាជនតៃវ៉ាន់។ ក្នុងន័យនេះ កម្លាំងលទ្ធិប្រជាធិបតេយ្យ នឹងគាំទ្រអ៊ុយក្រែនខ្លាំងឡើយ។ 

 

«ក្នុងនាមជាសមាជិកនៃប្រទេសប្រកាន់ប្រជាធិបតេយ្យ តៃវ៉ាន់គាំទ្រអ៊ុយក្រែនយ៉ាងពេញលេញ»។ លោកស្រីសៃ បានសង្កត់ធ្ងន់បែបនេះ ដោយបន្ថែមថា លោកស្រីសង្ឃឹមថា ប្រជាជនតៃវ៉ាន់ និងសមាជិកបក្ស ដែលធ្វើការក្នុងរដ្ឋាភិបាល ដែលជួយអ៊ុយក្រែន ដើម្បីបង្ហាញថា តៃវ៉ាន់ឈរនៅជាមួយអ៊ុយក្រែន និងជាមួយប្រជាធិបតេយ្យ រួមទាំងសេរីភាព។ 

 

តាមប្រភពបញ្ជាក់ប្រាប់ទីភ្នាក់ងារព័ត៌មាន Reuters​ លោកស្រីសៃ ទទួលបានប្រាក់ខែប្រមាណ​១៤២៥០ដុល្លារក្នុងមួយខែ។ ក្រសួងការបរទេសតៃវ៉ាន់ នឹងផ្តល់ព័ត៌មានលម្អិតទាក់ទិននឹងគណនីធនាគារ ដោយបង្កើតដោយសមាគមដោះស្រាយមហន្តរាយតៃវ៉ាន់សម្រាប់អ៊ុយក្រែន ដែលប្រធានាធិបតីតៃវ៉ាន់ អនុប្រធានាធិបតីតៃវ៉ាន់ រួមទាំងនាយករដ្ឋមន្រ្តី ត្រូវបរិច្ចាគ។ 

 

កន្លងទៅ រដ្ឋាភិបាលតៃវ៉ាន់ បានបរិច្ចាគសម្ភារវេជ្ជសាស្រ្តទម្ងន់ ២៧តោន ទៅអ៊ុយក្រែន សម្រាប់ជាជំនួយមនុស្សធម៌។ មិនតែប៉ុណ្ណោះ តៃវ៉ាន់ បានប្រកាសដាក់ទណ្ឌកម្មលើរុស្ស៊ីផងដែរ ដូចជាហាមឃាត់ ការនាំចេញបន្ទះឈីប និងសម្ភារបច្ចេកវិទ្យាផ្សេងៗ ទៅរុស្ស៊ី៕