លោក ឃាង ភារម្យ អ្នកនាំពាក្យខេត្តព្រះសីហនុ បានលើកឡើងថា​ ប៉មទាំងនេះសាងសង់ សម្រាប់ឆ្មាំសមុទ្រ​ត្រួតពិនិត្យមើល សុវត្ថិភាពភ្ញៀវទេសចរ​ អាកាសធាតុ និងបញ្ហាផ្សេងៗ ជាយថាហេតុ។ រដ្ឋបាលខេត្តព្រះសីហនុ ដាក់ពង្រាយប៉មចំនួន១២នោះ តាមឆ្នេរអូរឈើទាល ឆ្នេរអូរត្រេះ និងឆ្នេរជំទាវម៉ៅ។
  

អ្នកនាំពាក្យរូបនេះ បញ្ជាក់ប្រាប់សារព័ត៌មានThmeyThmey25ថា៖ « កាលពីមុនយើងក៏ធ្លាប់មានប៉មដែរ ប៉ុន្តែវាមានសភាពចាស់ណាស់ទៅហើយ។ ចំណែកប៉មដាក់ឱ្យប្រើប្រាស់ថ្មីនេះ វាមានលក្ខណៈស្តង់ដា និងមានកម្ពស់សមស្រប។ ឆ្មាំសមុទ្រទាំងអស់បានណែនាំ ឱ្យប្រើប្រាស់ឧបករណ៍ដូចជា កែវពង្រីក កញ្ចែ មេក្រូ និងសម្ភារៈមួយចំនួន ដើម្បីផ្តល់ព័ត៌មាន និងសង្រ្គោះដល់ភ្ញៀវទេសចរ »។
 

កាលពីថ្ងៃទី១៤ ខែមីនា​ លោក គួច ចំរើន អភិបាលខេត្តព្រះសីហនុ បានដាក់ឱ្យប្រើប្រាស់ប៉មយាមទាំង១២កន្លែងនេះហើយ៕