ជាតិ
ពីនេះ ពីនោះ
អ្នកនាំពាក្យ៖ ពលរដ្ឋត្រូវឈប់ចាញ់បោកមេខ្យល់ ទៅទិញដីតំបន់ការពារទៀត ព្រោះគ្មានការទទួលស្គាល់ឡើយ 16, Mar 2022 , 12:09 pm
ព្រៃមួយកន្លែង ក្នុងតំបន់ជួរភ្នំក្រវាញ ត្រូវបានជនខិលខូចលួចឈូសឆាយ នាពេលកន្លងមក។ រូបភាពពី ទំព័រហ្វេសប៊ុក Wildlife Alliance។
× លោក នេត្រ ភក្ត្រា អ្នកនាំពាក្យក្រសួងបរិស្ថាន បានរម្លឹកដល់ពលរដ្ឋឱ្យប្រុងប្រយ័ត្នកុំចាញ់បោកមេខ្យល់ ឬជនខិលខូច ដែលនាំទៅទិញដី ក្នុងតំបន់ការពារធនធានធម្មជាតិ។ ដីទាំងនោះ មិនមានការទទួលស្គាល់ពីអាជ្ញាធរ ដែលអាចប្រឈមផ្លូវច្បាប់។
ថ្លែងក្នុងពិធីបើកសិក្ខាសាលាផ្សព្វផ្សាយច្បាប់ពាក់ព័ន្ធនឹងវិស័យបរិស្ថាន និងធនធានធម្មជាតិ នៅរដ្ឋបាលខេត្តកែប កាលពីថ្ងៃទី១៥ មីនា អ្នកនាំពាក្យក្រសួងបរិស្ថានរូបនេះ បានបន្ថែមថា មានក្រុមជនខិលខូចមួយចំនួន បានជួលពលរដ្ឋទៅទន្ទ្រានដីឱ្យខ្លួន សម្រាប់ដាក់លក់ក្នុងតម្លៃថោកៗ។ ជាពិសេសប្រើប្រាស់ពលរដ្ឋ ធ្វើជាខែលក្នុងការតវ៉ា ជាមួយអាជ្ញាធរ ដើម្បីស្នើសុំកាត់ឆ្វៀលដីឱ្យខ្លួនថែមទៀត។
«គ្មានជនណាម្នាក់ មានសិទ្ធិទិញឬលក់ដីធ្លី ក្នុងតំបន់ការពារធម្មជាតិ និងរបៀងអភិរក្សជីវៈចម្រុះ នៅតាមបណ្ដាខេត្តនានាបានឡើយ។ ក្រសួងបរិស្ថានស្នើឱ្យពលរដ្ឋឈប់ចាញ់បោកមេខ្យល់ ឬក្រុមជនខិលខូច ដោយនាំគ្នាទៅទិញដី ឬទន្ទ្រានយកដីរដ្ឋធ្វើជាកម្មសិទ្ធិ ព្រោះមិនមានការទទួលស្គាល់ និងអាចប្រឈមមុខនឹងវិធានការច្បាប់»។ នេះជាសម្ដីរបស់ លោក នេត្រ ភក្ត្រា។
រដ្ឋលេខធិការក្រសួងបរិស្ថានរូបនេះ ក៏បានអំពាវនាវដល់ជនខិលខូច ឱ្យបញ្ឈប់វប្បធម៌ចូលទន្ទ្រានដីព្រៃរដ្ឋខុសច្បាប់ និងបន្លំប្រើប្រាស់ឯកសារក្លែងក្លាយ ដើម្បីទាមទារកាត់ឆ្វៀលដីមកកាន់កាប់ទៀត ខណៈករណីមិនប្រក្រតីជាច្រើន ត្រូវបានសមត្ថកិច្ចរកឃើញ និងចាត់ការតាមនីតិវិធីច្បាប់។
បន្ថែមពីនេះ លោក នេត្រ ភក្ត្រា ក៏បានស្នើដល់រដ្ឋបាលឃុំ សង្កាត់ និងស្រុក ត្រូវបញ្ឈប់រាល់ការចុះហត្ថលេខា បញ្ជាក់លើលិខិតផ្ទេរសិទ្ធិ ,ពាក្យស្នើសុំកាន់កាប់ប្រើប្រាស់ដីធ្លី ,លិខិតទិញលក់ដីធ្លី ,លិខិតទិញលក់ដីរដ្ឋ ឬការបញ្ជាក់លើប្លង់បង្ហាញទីតាំងដីជាអាទិ៍ នៅលើដីស្ថិតក្នុងតំបន់ការពារធម្មជាតិ និងរបៀងអភិរក្សជីវៈចម្រុះ ក្នុងដែនសមត្ថកិច្ចខ្លួន៕
Tag:
ThmeyThmey25
បរិស្ថាន
ការទិញដីតំបន់ការពារ
© រក្សាសិទ្ធិដោយ thmeythmey.com