លោក ហ្វូមីអូ គីស៊ីដា អះអាងថា លោក នឹងពិភាក្សាជាមួយសម្តេចនាយករដ្ឋមន្រ្តី ហ៊ុន សែន ពីការពង្រឹងកិច្ចសហប្រតិបត្តិការជាមួយគ្នា ក្នុងកិច្ចការអន្តរជាតិ និងតំបន់ មាន បញ្ហាអ៊ុយក្រែន និងបញ្ហាមីយ៉ាន់ម៉ា ជាដើម។ លោក ជម្រាបប្រជាជនកម្ពុជាថា លោក មានបំណងសហការជាមួយរដ្ឋាភិបាលកម្ពុជា ដើម្បីសន្តិភាព ស្ថិរភាពក្នុងតំបន់ និងពិភពលោក។

 

លោក និយាយពីបញ្ហាអ៊ុយក្រែនថា៖«ការឈ្លានពានរបស់រុស្សីលើអ៊ុយក្រែន គឺជាការបំពានយ៉ាងច្បាស់លើច្បាប់អន្តរជាតិ ហើយប្រាកដជាមិនអាចទទួលយកបានឡើយ»។ ចំណែកបញ្ហាមីយ៉ាន់ម៉ា លោក បានរម្លឹកថា៖«សម្តេចតេជោនាយករដ្ឋមន្ត្រី ហ៊ុន សែន មានប្រសាសន៍ជាមួយខ្ញុំថា ក្នុងនាមជាប្រធានអាស៊ាន សម្តេច ប្តេជ្ញាចិត្តឆ្ពោះទៅរកដំណោះស្រាយលើបញ្ហានានា ដូចជា ស្ថានភាពនៅមីយ៉ាន់ម៉ាជាដើម»។

 

ចំពោះទំនាក់ទំនងរវាងកម្ពុជា-ជប៉ុន លោក ហ្វូមីអូ គីស៊ីដា មើលឃើញថា រដ្ឋាភិបាលប្រទេសទាំង២ មានការទុកចិត្តគ្នាដ៏ស៊ីជម្រៅ។ លោក បញ្ជាក់ថា៖«ដោយផ្អែកលើទំនាក់ទំនងទុកចិត្តគ្នារបស់យើង ថ្ងៃនេះ ខ្ញុំ នឹងពិភាក្សាយ៉ាងលម្អិតជាមួយសម្តេចតេជោនាយករដ្ឋមន្ត្រី ហ៊ុន សែន អំពីកិច្ចសហប្រតិបត្តិការលើវិស័យសេដ្ឋកិច្ច និងសន្តិសុខ ដើម្បីអភិវឌ្ឍទំនាក់ទំនងរវាងប្រទេសទាំង២ឲ្យកាន់តែរីកចម្រើន»។

 

ឆ្នាំ២០២៣ គឺជាខួបអនុស្សាវរីយ៍លើកទី៧០នៃការបង្កើតទំនាក់ទំនងការទូតកម្ពុជា-ជប៉ុន។  

 

លោកនាយករដ្ឋមន្រ្តីជប៉ុន នឹងមកដល់កម្ពុជា នៅថ្ងៃទី២០ ខែមីនា ឆ្នាំ២០២២នេះ បន្ទាប់ពីលោក បញ្ចប់ទស្សនកិច្ចនៅឥណ្ឌា៕