អន្តរជាតិ
អង្គការលើកលែងទោសអន្តរជាតិ៖ ការឈ្លានពានរបស់រុស្ស៊ីនៅអ៊ុយក្រែន ស្រដៀងសង្គ្រាមនៅស៊ីរី 29, Mar 2022 , 12:09 pm
ស្រ្តីម្នាក់ដើរកាត់អាគារបែកបាក់ក្នុងទីក្រុង Mariupol របស់អ៊ុយក្រែន។ រូបថត Xinhua
× អគ្គលេខាធិការនៃអង្គការរលើកលែងទោសអន្តរជាតិ Agnes Callamard នៅថ្ងៃទី២៩ ខែមីនា បានប្រដូចសកម្មភាពលុកលុយរបស់រុស្ស៊ីនៅអ៊ុយក្រែនទៅនឹងសកម្មភាពដែលរុស្ស៊ីបានធ្វើឡើងក្នុងសង្គ្រាមនៅស៊ីរី។ លោកស្រីក៏បារម្ភពីឧក្រិដ្ឋកម្មសង្គ្រាមដែលកំពុងកើតឡើងខណៈដែលសង្រ្គាមនៅអ៊ុយក្រែនឆក់យកឱ្យជនស៊ីវិលស្លាប់អស់ជាច្រើនតាំងពីចុងខែកុម្ភៈមក។
កងកម្លាំងរុស្ស៊ី នៅតែធ្វើប្រតិបត្តិការនៅអ៊ុយក្រែន ដោយបានប្រើយន្តហោះ និងមីស៊ីលវាយប្រហារទីក្រុងនានារបស់អ៊ុយក្រែន។ ស្របគ្នានេះ របាយការណ៍ពីការស្លាប់របស់ជនស៊ីវិល ក៏បន្តមានឥតឈប់ឈរ ពិសេសនៅទីក្រុង Mariupol ដែលរុស្ស៊ីឡោមព័ទ្ធជាច្រើនថ្ងៃមកហើយ។ មន្ត្រីជាន់ខ្ពស់អ៊ុយក្រែនបានប្រាប់ទីភ្នាក់ងារព័ត៌មាន AFP ថា តាំងពីផ្ទុះសង្គ្រាម មនុស្សជាង៥ពាន់នាក់នៅក្រុង Mariupol បានស្លាប់ ក្នុងនោះរួមមានកុមារ២១០នាក់។
កាលពីសប្តាហ៍មុន រដ្ឋាភិបាលអាម៉េរិក ក៏បានអះអាងថា ខ្លួនមានព័ត៌មាន និងព័ស្តុតាងដ៏រឹងមាំដើម្បីបង្ហាញថាយោធារុស្ស៊ីពិតជាបានប្រព្រឹត្តឧក្រិដ្ឋកម្មសង្គ្រាមនៅអ៊ុយក្រែនមែន។
ទាក់ទងរឿងអ៊ុយក្រែននេះ អគ្គលេខាធិការអង្គការរលើកលែងទោសអន្តរជាតិលោកស្រី Agnes Callamard លើកឡើងថា អ្វីដែលកំពុងកើតឡើងនៅអ៊ុយក្រែនគឺជារឿងដដែលៗ ដែលពិភពលោកធ្លាប់បានឃើញនៅស៊ីរី។ លោកលើកឡើងបែបនេះអំឡុងពិធីសម្ពោធរបាយការណ៍ប្រចាំឆ្នាំស្តីពីស្ថានភាពសិទ្ធិមនុស្សលើពិភពលោកនៅថ្ងៃទី២៩ ខែមីនា។
«ពួកយើងកំពុងស្ថិតក្នុងការវាយប្រហារដោយចេតនាលើហេដ្ឋារចនាសម្ព័ន្ធស៊ីវិល។ ពួកយើងឃើញរឿងដូចគ្នា ដូចរុស្ស៊ីបានធ្វើនៅស៊ីរីដែរ»។ លោកស្រី Callamard បានសង្កត់ធ្ងន់បែបនេះ មុនរិះគន់រុស្ស៊ីថា ជាអ្នកធ្វើឱ្យឱ្យប្រព័ន្ធសណ្ដាប់ធ្នាប់អន្តរជាតិខូចខាត និងមានអស្ថិរភាព។ លោកស្រី ក៏បានប្រៀបធៀបទីក្រុង Mariupol ទៅនឹងទីក្រុង Aleppo ទីដែលស្ថានភាពជនស៊ីវិលធ្លាក់ចុះខ្លាំងរហូតក្លាយជាវិបត្តិមនុស្សធម៌ធ្ងន់ធ្ងរ។ លោកស្រីក៏បាននិយាយថា ការសង្កេតរបស់ក្រុមសិទ្ធិមនុស្សនៅពេលនេះបានបញ្ជាក់ថា សកម្មភាពរបស់រុស្ស៊ីគឺជាការកើនឡើងនៃឧក្រិដ្ឋកម្មសង្គ្រាម។
ប្រមុខអង្គការឃ្លាំមើលសិទ្ធិមនុស្សដ៏ធំមួយនេះ ក៏បានបរិហារពីភាពអសកម្មរបស់អង្គការសហប្រជាជាតិ (UN) ក្នុងការដោះស្រាយ និងទប់ស្កាត់វិបត្តិជាច្រើននាពេលថ្មីៗនេះ ដែលរួមមានវិបត្តិមីយ៉ាន់ម៉ា អាហ្វហ្កានីស្ថាន និងស៊ីរី ហើយព្រមទាំងវិបត្តិនៅអ៊ុយក្រែន-រុស្ស៊ីនេះផងដែរ។
ពីទីក្រុងប៉ារីសវិញ នាយកអង្គការលើកលែងទោសអន្តរជាតិនៅតំបន់អឺរ៉ុបខាងកើត និងអាស៊ី លោកស្រី Marie Struthers បានប្រាប់សន្និសីទសារព័ត៌មានដាច់ដោយឡែកមួយថា អ៊ុយក្រែនបានកត់ត្រាអំពីការប្រើប្រាស់យុទ្ធសាស្ត្រដូចគ្នានឹងសង្រ្គាមនៅស៊ីរី និងនៅតំបន់ Chechnya រួមមានការវាយប្រហារលើជនស៊ីវិល និងការប្រើប្រាស់អាវុធដែលត្រូវបានហាមឃាត់ដោយច្បាប់អន្តរជាតិពីសំណាក់រុស្ស៊ី៕
Tag:
រុស្ស៊ី
ស៊ីរី
អ៊ុយក្រែន
© រក្សាសិទ្ធិដោយ thmeythmey.com