ប៉េរូឈ្នះកៅអី Play-Off នៅមួយប្រកួតចុងក្រោយ បន្ទាប់ពីយកឈ្នះលើក្រុមប៉ារ៉ាហ្គាយ ហើយបញ្ចប់ក្នុងចំណាត់ថ្នាក់លេខ៥ ពីលើក្រុមកូឡំប៊ី និងស៊ីលីដែលធ្លាក់ចេញត្រឹមវគ្គជម្រុះតំបន់។

ជ័យជម្នះនេះបានន័យថា ប៉េរូដែលឈ្នះកៅអីលេខ៥ នឹងត្រូវបន្តការប្រកួតជាមួយក្រុមដែលឈ្នះការប្រកួតរវាងអូស្ត្រាលីឬក៏អេមីរ៉ាត់អារ៉ាប់រួម។ កៅអីតំណាងអាស៊ី នឹងប្រកួតជំនួប Play-Off នាទីក្រុងឌូហា ខែមិថុនា។ ឯការប្រកួត Play-Off អន្តរទ្វីប ក៏នឹងត្រូវប្រកួតមួយនៅទីក្រុងឌូហាថ្ងៃទី១៣ ឬទី១៤ ខែមិថុនាដែរ។
 

លោក Ricardo Gareca បានបង្ហាញអារម្មណ៍សប្បាយចិត្តក្រោយពេលទទួលបានឱកាសមួយថ្មី។ លោក Gareca ជាគ្រូបង្វឹកក្រុមប៉េរូ សរសើរកូនក្រុមដែលធ្វើបានល្អខ្លាំង។

 

«ខ្ញុំត្រូវអបអរសារទដល់កូនក្រុមទាំងអស់ហើយអ្នកគាំទ្រយើងទាំងអស់ នេះជារឿងដែលអស្ចារ្យមួយសម្រាប់ពួកយើង នៅពេលដែលខ្ញុំបានចុះកិច្ចសន្យាបន្តដឹកនាំជាថ្មី នេះជាអ្វីដែលខ្ញុំចង់បាន។» លោក Gareca បញ្ជាក់បែបនេះ។
 

លោក Ricardo Gareca បានចូលដឹកនាំក្រុមជម្រើសជាតិប៉េរូតាំងពីឆ្នាំ ២០១៥ មកម្ល៉េះ ដោយលោកបានជួយឱ្យប៉េរូឡើងទៅការប្រកួត World Cup លើកដំបូងក្នុងរយៈពេល៣៦ឆ្នាំ ក្នុងឆ្នាំ ២០១៨ និងការប្រកួតផ្តាច់ព្រ័ត្រ Copa America ឆ្នាំ ២០១៩៕